شال: پاکستانی لشکر ءِ دست ءَ زوریبگواھیں مردمانی کھولاں شال ءَ گولیمار چاراه ، کسٹم سریاب ءُ بروری بائی پاس ءَ زھرشانی کرتگ.
اھوالکار ءِ رد ءَ برجاھیں زھرشانیاں زوریبگواھیں بھادر الی ، الی رزا ءُ بشیر اھمد کیازئی ءِ کھول ھوار انت. زھرشانی کنوکانی گوشگ اِنت دانکه زوریبگواھیں مردم یل کنگ نه بنت مئے زھرشانی گیشتر بیت ءُ ما دیمتر ءَ شال ءِ مزنیں شھدگاں بند کن اِیں.
بیگواھیں مردمانی کھولاں گوشتگ که مارا ریاستی ادارھانی سر ءَ ھچ وڑیں اوست نیست ، آ بیت کنت که مئے آزیزاں درکانودی کوش ءُ دروگیں میڑاں نشانگ به کنت.
زھرشانی کنوکاں گوں بلوچ راج ءَ لوٹ کرتگ که آیانی گون ءَ ھوار به بنت ءُ په زوریبگواھیں مردمانی آجوئی ءَ توار چست به کن اَنت.
