بلوچ وومن پورم ءِ سروک ڈاکٹر شلی بلوچ ءَ ماں چاگردی رسانکدر ایکس ءَ وتی درشان ءَ گوشتگ کہ بلوچ ورنایانی زوریں بیگواھی یکشل ءَ گیش بوگ ءَانت، چہ ایشی ءِ سوب ءَرنج ءُ بے تاھیری گیش بوگ ءَ اَنت۔ دگہ دو بلوچ ورنا یاسر ءُ سابر ھمے گنتریں میارباری ءِ آماچ بیتگ اَنت۔
آئی ءَ گوشتگ کہ یاسر بلوچ بے نزیر زانشتجاہ لیاری ءِ میڈیا سائنس ءِ نودربرے 25 پروری ءَ پاکستانی لشکر ءَ ھما وھد ءَ آوار جتگ کہ آ چہ گلشن اکبال کراچی ءَ گس ءَ ملیر ءَ روگ ءَ بیتگ۔
ڈاکٹر شلی ءَ گوشتگ کہ سابر الی ھزدار ءِ ھند گریشگ ءِ جاہ منند اِنت آ الاج ءَ بیتگ کہ چہ لیاری ءَ زور بیگواہ کنگ ءَ بیتگ۔
آئی ءَ گوشتگ کہ کھولاں آیانی بابت ءَ ھچ وڑیں سرپدی دیگ ءَ نہ اَنت۔ ورنایانی زوریں بیگواھی نوں لس گپے جوڑ بیتگ ءُ کھولانی زندگیاں جنجال کنگ ءَ اِنت۔ ریاستی ادارہ اے درکانودی کار ءَ ھلاس کنگ ءِ ھک ءَ نہ اَنت۔ میان استمانی انسانی ھکانی ادارھاں اے جیڑہ ءِ سر ءَ دزمانجنی کنگ لوٹ ایت۔
