بلوچ نیشنل موومنٹ ءِ سروک ڈاکٹر نسیم بلوچ ءَ ماں چاگردی رسانکدر ایکس ءَ وتی درشان ءَ گوشتگ کہ شپیک مینگل بنامیں زمانگ ءِ ناشرکار ءُ ریاستی سروکی ءَ کارکنوکیں کشندہ ٹولیءِ سروکے، یک رندے پد ءَ پاکستانی لشکر ءِ نیمگ ءَ بلوچستان ءِ ھند توتک ءَ آرگ بیتگ۔
آئی ءَ گوشتگ کہ اے زوراکی ءِ پژدر ءَ شیھانی سر ءَ ارش ءِ شوندات، کمشیر ءُ اوگانستان ءَ پاکستانی چیریں ادارھانی جنگ ءَ باڑھی ءِ پارست ءَ کرد پیلو کنگ ءُ بلوچستان ءَ ریاستی چیردستی ءَ برجاھیں ناشرکاری ءِ سروکی ءِ وڑیں میارباری ھم ھوار اَنت۔
ڈاکٹر نسیم بلوچ ءَ گوشتگ کہ توتک اود ءَ مچی مانش دزکپتگ اَنت ھمے زوراکیانی ترانگ ءَ گیج ایت۔ اے کبراں زور بیگواھین ءُ درکانودی کوش ءِ آماچ بیتگ ایں بازیں بلوچانی ھڈ گندگ بیتگ اَنت کہ انسانی ھکانی ناھکیں بگیریاں پیش دار اَنت۔
آئی ءَ گوشتگ کہ شپیک مینگل ءِ پاکستان ریاست ءِ نیمگ ءَ سروکی اے راستی ءَ گیش پدر کنت کہ کشندہ ٹولی ءَ مھکم کنت ءُ جتائیں سیاسی بگیریانی دارگ ءُ ناشرکاری ءِ پارست ءَ وتی واک ءِ برجاہ دارگ ءَ ایشی کارمرز کنگ ءَ اِنت۔
ڈاکٹر نسیم ءَ گوشتگ کہ ایشی واتر توتک ءَ آرگ یک جوانیں گامگیجے نہ بیت بلکیں پہ لس بلوچاں یک تچکیں ترسے، اے ریاستی سروکی ءَ آوارجنی، کشت ءُ کوش ءُ آدگہ انسانی ھکانی بگیریانی درچ ءِ گمانءَ دنت۔
بی این ایم ءِ سرکماش ءَ گوشتگ کہ میان استمانی تک ءَ اے جاورانی سر ءَ زوت دلگوش دیگ لوٹ ایت۔ پاکستان نہ تیوک ءَ ناشرکارانی پھازداری ءَ کنگ ءَ اِنت بلکیں آیاں پہ بلوچ گھگیری ءِ دارگ ءَ کارمرز کنگ ءَ اِنت۔ بلوچستان ءِ آجوئی اے دمگ ءِ ایمن ءُ سلامتی ءِ مانزمان اِنت۔
