کیچ: پاکستانی لشکر ءِ دست ءَ زوربیگواہ کنگ بیتگیں سھیل ابدالله ءِ کھول ءَ تربت پریس کلب ءَ پریس کانپرس کرتگ ءُ گوشتگ که سھیل ابدالله تمپ دازن ءِ جاہ منند اِنت کہ 11 اکتوبر 2024 ءَ چه تربت ءِ ھند بھمن ءَ زوربیگواه کنگ بیتگ. آئی ءِ زوریں بیگواھی ءَ پنچ ماه سرجم اِنت بلے انگت آئی بابت ءَ مارا ھچ وڑیں ھال سر نه بیتگ۔ ما پہ آئی آجوئی ءَ یکشل ءَ توار چست کرتگ بلے مئے توار گوش دارگ نہ بیتگ۔
کھول ءَ گوشتگ که سھیل ابدالله سسائی نادراھے ءُ ما آئی ءِ الاج ءَ بیتگ اِیں. چه ایشی ءَ پیش آ یکبرے 2022 ءَ ھم زوربیگواه کنگ بیتگ ءُ ماھے ءَ پد یل کنگ بیتگ ، ھمے میان ءَ آ سکا جانی ءُ سسائی آزارانی دیمپان بیتگ.
کھول ءَ دیمتر ءَ گوشتگ که سھیل چه گوادر ءَ دیم په تربت ءِ آیگ ءِ میان ءَ چہ دگ ویلے ءَ آئی ءِ دست ءُ پاد پرشتگ اَنت، چه اے ویل ءَ سکا ٹپی بیتگ ءُ آ الاج کنگ لوٹ ایت۔ آ په الاج ءَ بھمن ءَ وتی سیادانی کر ءَ شتگ دانکه شریں وڑے ءَ آئی ءِ الاج کنگ به بیت بلے 11 اکتوبر 2024 ءَ زور بیگواه کنگ بیتگ.
کھول ءِ گوشگ اِنت که سھیل ءِ ھواری ءَ دگه چار مردم ھم چه بھمن ءَ آوار جنگ بیتگ بلے چار ماه ءَ پد یل کنگ بیتگ اَنت بلے سھیل انگت ءَ بیگواه اِنت۔
کھول ءَ گوشتگ که چه سھیل ءِ زوریں بیگواھی ءَ آئی ءِ پت سکا سسائی نادراہ بیتگ آ یک ماھے پیش بیران بیتگ. آ وتی زھگ ءِ آجوئی ءِ اوست ءَ شپ ءُ روچ وداریگ بوتگ بلے آئی ءَ انساپ نہ رستگ ءُ بیران بیتگ۔
کھول ءَ گوں انسانی ھکانی اداره، سول سوسائٹی ءُ میان استمان ءَ لوٹ کرتگ که په سھیل ءِ آجوئی ءَ وتی کرد ءَ پیلو به کن اَنت۔
آئی ءَ گوشتگ کہ ما پہ سھیل ءِ زندگی ءَ ترسگ ءَ ایں چی ءَ کہ آ سلامتیں مردمے نہ بیتگ ءُ سکا نادراہ بیتگ۔ اگاں آ گیشتر بیگواہ بہ بیت گڑا گیشتر جنجال بیت۔
