سیئٹل ، واشنگٹن : بلوچ راجی زْرمبشت ( بی این ایم ) ءَ چہ امریکی شھر مننداں دزبندی کرتگ کہ آ بلوچ راجی وتواجھی ھک ءِ پلہ مرزی بہ کن اَنت ، بلوچستان ءَ برجاھیں پاکستانی زوراکیانی بگیری ءَ توار چست بہ کن اَنت ءُ چہ وتی سرکار ءَ بہ لوٹ اَنت کہ آ پاکستان ءِ مالی ءُ لشکری کمک ءَ زیت ءَ زیت بند بہ کنت۔
بی این ایم ءِ باسکاں امریکا ءِ مردم سھی کرتگ اَنت کہ امریکا ءَ چہ وتی سنگ دیوکانی زراں پاکستان ءَ اربانی ڈالر ءِکمک کرتگ کہ ایشاں پاکستانی لشکر پہ بلوچ راج ءِ چکچینی ءَ کارمرد کنگ ءَ اِنت۔
اے رد ءَ بی این ایم ءِ باسکاں سیئٹل ءَ سدانی کچ ءَ پنتاک بھر کرتگ ، کہ آئی ءِ تہ ءَ بلوچستان ءِ جاور سھرا کنگ بیتگ ’’ بلوچستان : چیردستیں راجے ‘‘ ءِ سرگپ ءَ اے پنتاک ءَ پاکستان ءِ زورگری ، برجاھیں مھترھندی زوراکی ءُ مزنیں کچے ءَ مردمی ھکانی بگیریانی سر ءَ گپ نبشتہ اِنت۔
پنتاک ءَ چہ پاکستان ءِ نیمگ ءَ تْرام اتگیں رنگے ءَ زور بیگواھی ءُ در آمیدگسی کوشانی بارہ ءَ ھم نبشتہ کنگ بیتگ۔ بی این ایم ءِ رد ءَ چہ 2009 ءَ پد پاکستان ءَ ’’ آپریشن سائلنس ‘‘ ءِ نام ءَ آوار جنگ ءُ در آمیدگسی کوشانی شوندات تیز کرتگ۔ ھزاراں بلوچ زور بیگواہ کنگ بیتگ کہ چہ ایشاں گیشتر پد ءَ بھ واتر نہ بیتگ۔
بی این ایم ءِ انسدانی ھکانی تک پانک ءِ دیم ءَ آرتگیں گزارشانی رد ءَ تیوک ءَ پروری 2025 ءَ 65 ءَ گیش مردم زور بیگواہ کنگ ءُ سئے بلوچ در آمیدگسی کشگ بیتگ۔
بی این ایم ءَ دلگوش پرینتگ کہ نوک آبادی باریگ ءِ ٹپ دنیگت دْراہ نہ بیتگ اَنت ءُ زورگریں واکانی کش اتگیں دروگیں سیمسر مروچی ھم مردم کشگ ءَ اَنت۔پاکستان ءِ 27 مارچ 1948 ءَ بلوچستان ءِ زورگرگ ءَ پد بلوچ چکچینی برجاہ اِنت۔ بلوچ ءِ پجار ءُ ربیدگ ءِ گمسار کنگ ءِ تْرام اتگیں کوشست برجاہ اَنت، وانگ ، جاندْراھی ءُ روزگار پہ بلوچ ءِ ایرجیگ کنگ ءَ جنگ ابزارانی (ھتھیار ) رنگ ءَ کارمرد بیگ ءَ اَنت۔ پجیگ ءَ سیاسی کارکن ، نودربر ءُ زانتکار گچین کنگ ءُ کشگ بیگ ءَ اَنت۔
