بلوچستان لبریشن پرنٹ ءِ جارکش میجر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ 21 پروری 2025 ءَ گل ءِ ھمبل سرمچار سکی بکش پنام کندیل ءُ بالاچ پنام اسلم آواران ءِ ھند تیرتیج ءَ گل ءِ کارے ءِ میان ءَ پاکستانی لشکر ءُ آئی جوڑ کرتگیں کشندہ ٹولیءِ گون ءَمیڑ ءَشھید بیتگ اَنت۔
آئی ءَ گوشتگ کہ شھید سکی بکش پنام کندیل ء الی بکش آواران تیرتیج ءِ جاہ منند 2023 ءَ بلوچستان لبریشن پرنٹ ءَ ھوار بیتگءُ بلوچستان ءِ جتائیں ھنداں جنگاں شریں وڑے ءَ وتی کرد پیلو کرتگ۔
جارکش ءَ گوشتگ کہ سکی بلوچ بلوچی زبان ءِ ورنائیں شائرءُ نبشتہ کارے بیتگ۔ آئی چہ وتی شائری ءُ نبشتہ کاری ءَ شھید ءُ سرڈگار ءِ زیبائی جوانیں وڑے ءَ درشان کرتگ ۔
آئی ءَ گوشتگ کہ شھید بالاچ پنام اسلم ء الی بکش ھزدار ءِ ھند گریشگ ءِ جاہ منند 2024 ءَ بلوچستان لبریشن پرنٹ ءَ ھوار بوتگ ءُ آواران ءُ کولواہ ءَ بازیں جنگاں ھوار بیتگ۔ شھید بالاچ یک نودربرے بوتگ بلے راجی آجوئی ءِ لیکہ ءَ سرپد بوگ ءَ پد سلاہ بندیں جھد ءَ بھر زرتگ۔
جارکش ءَ گوشتگ کہ دوئیں سرمچار آواران ءِ ھند تیرتیج ءَ پاکستانی لشکر ءِ جوڑ کرتگیں کشندہ ٹولی کہ اورنگزیب بزنجو ءِ سروکی ءَ بلوچ چکچینی کنگ ءَ اِنت، گوں آئی ءَ میڑ ءَ شھید بیتگ اَنت۔
آئی ءَ گوشتگ کہ کشندہ ٹولی ءُ سرمچارانی میان ءَ بیتگیں میڑ ءَ کشندہ ٹولی ءِ نزیکیں کارمند شبیر ( بیدی ءِ جاہ منند ) ءَ ھوار باز کارمند ٹپی بیتگ۔ کشندہ ٹولی ءَ زورگریں دژمنیں لشکر ءِ کمک گون اِنت۔
جارکش ءَ گوشتگ کہ بی ایل ایپ آواران ءُ کولواہ ءِ درسیں شرپمندیں مردماں سرپد کنت کہ چہ اورنگزیب ءُ آئی ھمراھیں درسیں مردماں وت ءَ گستا بدار اِت چی ءَ کہ آ بلوچ چکچینی ءَ ھوار اَنت۔
میجر گھرام ءَ گوشتگ کہ بی ایل ایپ ھمبلیں سرمچاراں آیانی شھیدی ءَ ستک شانی ندر کنت ءُ آیانی واھشت داں بلوچستان ءِ آجوئی ءَ جنگ ءَ برجاہ دار ایت۔
