ھب چوکی: زور بیگواھیں جنید ھمید ءُ یاسر ھمید ءِ گھار یاسمین ھمید ءُ نسیر بلوچ ءُ ندیم بلوچ ءِ برازتک رشیدہ بلوچ ءَ چیئرمین امران بلوچ ءِ ھمراھی ءَ لسبیلہ پریس کلب ءَ پریس کانپریس کرتگ ءُ گوشتگ کہ بلوچستان ءَ زوریں بیگواھی ءُ درکانودی کوش دودے جوڑ بیتگ۔
آئی ءَ گوشتگ کہ اے درکانودی کار ءِ دارگ ءَ سرکار سرجم ءَ بے سوب بیتگ۔ مرچی اے پریس کانپریس ءِ مول دمگی انتزامیہءُ سرکاری ادارھانی دلگوش دیگ اِنت۔ چہ ایشی ءَ پیش ما ھمے پریس کلب ءِ دیمءَ سے روچی زھرشانی گدانے جتگ ءُ نشتگ ایںءُ بوانی ءَ پہ وتی برات یاسرھمید ءُجنید ھمید ءِ آجوئی ءَ زھرشانی کرتگ۔
آئی ءَ گوشتگ کہ ھمے میان ءَ نسیر بلوچ ءُ ندیم بلوچ ءِ کھولاں بھر زرتگ، اودءَ داں سے روچءَ زھرشانی ءِ برجاہ بوگ ءَ پد ھب انتزامیہ پہ گپ ءُ تران ءَ اتکگ ءُ گوں دمگی انتزامیہ ءُ زھرشانی کنوکانی میان ءَ نبشتھی کول کنگ بیتگ، ایشی دمگی انتزامیہ ھب ءِ کمک دمگدار ءُ ایس ایس پی ءُ آدگہ مردم گوں بیتگ اَنت۔
آئی ءَ گوشتگ کہ ھمے نبشتھی کول ءَ مارا ھمے دلجمی داتگ کہ مارا بیست روچ ءِ وھد بہ دے اِت ھمے بیست روچانی میان ءَ تئی برات پہ سلامتی آجو کنگ بنت یا آیانی بابت ءَ سرپدی دیگ بیت۔ ھمے درچ ءَ یک جے آئی ٹی دیوانے کنگ بیت ءُ ھمے ادارہ لوٹائینگ بنت ءُ پہ اے مردمانی آجوئی ءَ جھد کنگ ءُ جست کنگ بیت، سیاد ھم سرپد کنگ بنت۔ بلے اے درس کاگدی نبشتہ بوتگ اَنت، نہ منی برات آجو بوتگ اَنت ءُ نہ دیوان ءِ بابتءَ مارا ھال دیگ بوتگ۔
آئی ءَ گوشتگ کہ مرچی ھمے پریس کانپریسءِ رد ءَ گوشگ لوٹ ایں کہ اگاں داں چل ءُ ھشت اداراں مئے برات یاسر ھمید ءُ جنید ھمید ءَ ھوار نسیر بلوچ ءُ ندیم بلوچ آجو نہ بوت اَنت گڑا ما زھرشانیءَ دگ ءَ بند کن ایں،ایشی درسیں زمہ واری دمگی واکدار ءُ سرکاری ادارھانی سر ءَ بنت۔
