بلوچستان لبریشن پرنٹ ( بی ایل ایپ ) ءِ جارکش میجر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ 23 پروری ءِ بیگاہ ءَ بی ایل ایپ ءِ سرمچاراں بولان، سبی شھدگ گم آپ گرین ھوٹل ءُ پیرگیب ءِ دوراھی ءَ جتائیں جاھاں بستگ ءُگاڑی پٹ ءُ پول کرتگ اَنت۔
آئی ءَ گوشتگ کہ سرمچاراں راجی آجوئی جھد ءِ میان ءَ کارشونی ءِ رد ءَجتائیں جاھاں وتی راجی لیکہ ءُ آشوبی کرد پیلو کنگ لوٹ ایت۔ تیوک ءَ شھدگ ءُ لس مردمانی میان ءَ وتی راجی پرز ءِ پیلو کنگ ءِ وھد ءَ چیرجنگی رپک ءَآشوبی راھبندانی پاسداری کنگی اِنتءُ گل ءِ راھبندانی پابند بوگ ءُ آشوبی کرد پیلو کنگ سکا گرانیں ساھتے۔ بلے ھمے وڑیں اشتاپیں جاورانی تہ ءَ گل ءُ لس مردمانی میان ءَ لیکھی ھمگرنچی ءِ برجاہ دارگ ءُ راجی آجوئی سپاھیانی وتی نشانگ ءَ سر بوگ آئی درساں مستریں سوبمندی اِنت۔
جارکش ءَ گوشتگ کہ زی بیگاہ ءَ بی ایل ایپ ءِ سرمچاراں بولانءَ شھدگ چار جتائیں جاھاں بستگءُ پٹ ءُ پول کرتگ۔ ھمے میان ءَ یک سیاسی ٹولی یے ءِ ایم پی اے گوزگ ءَ بیتگ، سرمچاراں سرکاری سلاہ پچ گپتگ اَنت ءُ گل ءِ راھبندانی ھساب ءَ بلوچ ءِ بستارءَ آئی شرپ کرتگ ءُیل داتگ۔
آئی ءَ گوشتگ کہ دگ ءِ بندگ ءِ میان ءَ پاکستانی لشکرءِ یک پیکپ ءُ یک بکتربند گاڑی یے اتکگ سرمچاراں آئی سرءَ ترندیں ارشے کرتگءُ بکتربند گاڑی راکٹ لانچر ءِ گون ءَ نشانگ کرتگ چہ ایشی ءَ بکتربند گاڑی ءِ یک نیمگے ءَ آس لگ اتگ ءُ باز کارمند مرتگ ءُ ٹپی بیتگ۔
جارکش ءَ گوشتگ کہ پسو ءَ دژمنیں لشکر ءَ مساپر گاڑیانی سر ءَ تیرگواری کرتگ ءُ ھالانی رد ءَ چہ دژمن ءِ تیرگواری ءَ یک رھگوزے بیران ءُ باز ٹپی بیتگ۔ جنگ ءِ میان ءَ نزیکیں ھندانی دژمنیں لشکر ءِ چوکیانی کارمنداں تیرگواری کرتگ ءُ مارٹرءِ گولا آس داتگ۔
آئی ءَ گوشتگ کہ زی بیگاہ ءِ پنچ ءَ داں شپ ءِ دوازدہ ءَ بولان، سبی شھدگ ءِ بند کنگ ءَ پد جتائیں یونٹانی بھرزرتگیں سرمچار وتی بندراں پہ سلامتی سر بوتگ اَنت۔
جارکش ءَ گوشتگ کہ ما ھمے درشان ءِ رد ءَ لس بلوچ ءُ گوں گاڑی واھنداں لوٹ کن ایں کہ دگانی بند کنگ ءِ میان ءَ سرمچارانی پہ پھریزگ ءَ شریں وڑے ءَ آیانی کمک ءَ بہ کن اَنت ءُ ھمے پنت ءَ دلگوش بہ کن اَنت۔
میجر گھرام ءَ ارشانی زمہ واری من اتگ ءُ گوشتگ کہ داں بلوچستان ءِ آجوئی ءَ وتی سرڈگار ءِ سر ءَ زورگریں لشکر ءِ سرءَ ارشاں برجاہ دار ایں۔
