سرکماش ڈاکٹر نسیم ءِ پاگواجھی ءَ بیتگیں بلوچ راجی زْْرمبشت ( بی این ایم ) ءِ دری کارانی تک ءِ نیاد ءَ نیاز راھوتکار ءُ گلام رسول کمک راھوتکار نامینگ بیتگ۔
دری کارانی کارگشاد فھیم ءَ اے رد ءَ درائینتگ گلام رسول زْرمبشت ءِ دیریگین ءُ بودیگیں ھمراھے کہ دری کارانی تک ءَ پرارزشتیں کردے پیلو کرت کنت۔ ھما دمگ ءَ کہ جاھمنند اِنت آ ھم سکا پرارزشت ، سیاست ءُ سپارت ءِ بنجاہ زانگ بیت۔انچوش کہ دری کارانی تک یورپی ڈیھاں کار کنگ ءَ اِنت ھمے پیم امریکا ءِ دمگ ءَ ھم گل برجم دارگ ءُ سپارتی تک ءَ وتی کوشست تیز کنگی اَنت۔
گوں نیاد ءَ تْران کنان پاگواجہ ڈاکٹر نسیم ءَ گْوشتگ ما سرپد بہ ایں کہ گل ءِ جتائیں تک ءُ بھرگانی دیمروئی ناں ایوک ءَ پہ گل ءِ مگیمی ءَ جْوان اِنت بلکیں پہ راجی آجوئی ءِ جھد ءَ ھم پرارزشتیں دیمروئی یے۔ بلوچ راجی زْرمبشت ( بی این ایم ) ءِ باسک شپ ءُ روچ کار کنگ ءُ جھانی تک ءَ بلوچ راجی جیڑہ ءِ سھرا کنگ ءِ جھد ءَ اَنت۔
آئی ءَ چد ءُ دیم گْوشتگ مارا باور اِنت کہ اے یکشل ءُ شول کشیں جھد ءَ گل ءِ کار ، گچینی سپارتی تک ءَ بلوچ ءِ جیڑہ ءَ برجمیں توارے جوڑ کنگ ءِ جھد ، جھانی تک ءَ الم ءَ سوبمند بیت۔
نیاد ءَ بی این ایم ءِ دری کارانی کارگشاد ءَ تک ءِ کارانی سر ءَ گپ جنان ءَ گْوشتگ ما تیوک ءَ یک دمگ ءُ پرگنگے ءِ تہ ءَ سپارتی کار کنگ نہ لوٹ ایں بلکہ ھرچ دمگ ءُ ھند ءَ وتی توار ءَ سر کن ایں۔ امریکا ءُ کینیڈا ءَ پارٹی ءِ باسک ھست اَنت ءُ آیانی کوشست ءُ کارانی لوٹ ھمیش اِنت کہ آ اود ءَ ھم گل ءِ مراگش تْرام ، پرکار ءُ سانمندیں رنگے ءَ دیم ءَ برگ بہ بیت داں ما وتی مول بزاں بلوچستان ءِ آجوئی ءِ سپارتی سنگر ءَ چد ءُ گیش اجیر اِت ( محکم کرت ) بہ کن ایں۔
نیاد ءَ دری کارانی کارگشاد فھیم ، کمک راھوتکار نیاز ءُ جھگیر ھکیم واڈیلہ ءَ بھر زرتگ۔
