کیچ: چه بلوچ یکجھتی کمیٹی ءِ نیمگ ءَ تمپ ءِ میتگ گومازی ءَ پاکستانی لشکر ءِ جوڑ کرتگیں کشنده ٹولی ءِ دست ءَ شھید کنگ بیتگیں ورنا کریم ء منزور ءُ مھراج ء ابدُلھالک ءِ ناھکیں کوش ءِ بگیری ءَ زھرشانی روانکے کشگ بیتگ. روانک ءَ جنین ءُ زھگاں ھوار مردمانی بازیں کچے ءَ بھر زرتگ.
روانک ءَ بھر زرتگیں مردماں اوگام جتگ ءُ کشگ بیتگیں ورناھانی کشندھانی دزگیر کنگ ءِ لوٹ کرتگ۔ روانک گومازی نادراھجاه ءِ دیم ءَ مچ بوتگ۔
آیاں کرتگ ءُ گوشتگ که چه اِے وڑیں ویلاں لس مھلوک ترس آماچ اِنت بلے سرکار ءُ آئی ءِ اداره اِے بابت ءَ بے توار اَنت ءُ ھچ وڑیں گامگیج زورگ ءَ نہ اَنت۔
زھرشانی کنوکاں گوشتگ که گومازی ءَ ھوار سرجمیں بلوچستان ءَ ناھکیں کوش گیش بوگ ءَ اَنت اے سکا بژنی گپے۔ اگاں کشنده زوت دزگیر کنگ مه بنت ما وتی زھرشانیاں گیش ءَ چه گیش ترند کن ایں۔
زھرشانی کنوکاں گوں سرکار ءَ لوٹ کرتگ ءُ گوشتگ که سرکار گوں ناھک ءَ کشگ بوتگیں ورنایانی کھولاں انساپ بہ کنت ءُ ھند ءِ ایمن کنگ ءَ وتی کرد ءَ پیلو به کنت۔
