بلوچ نیشنل موومنٹ ءِ بنجاھی سرکماش ڈاکٹر نسیم بلوچ ءَ ماں چاگردی رسانکدر ایکس ءَ نبشتگ کہ کریم ءُ مھراج دو ورنائیں بلوچ ازمکار ءُ کسانی ءِ ھمبل ھمے ماہ ءَ دو جتائیں ویلاں پاکستانی لشکر ءِ جوڑ کرتگیں کشندہ ٹولی ءِ دست ءَ ناھک ءَ کشگ بیتگ اَنت۔ اے دوئیں چہ وتی ازم ءِ رد ءَ زوراکیانی بگیری ءَ گھگیری ءِ چیدگ بیتگ اَنت، بلے ریاست ءَ آیان ءَ تیر جتگ ءُ بے توار کرتگ۔
آئی ءَ گوشتگ کہ کریم بلوچ ءِ کھول ءَ لوٹ کرتگ دانکہ کشندہ دزگیر کنگ ءُ جست گرگ نہ بیتگ اَنت ما لاش ءَ گلزمین ءِ میار نہ کن ایں، کھول ءُ زھرشانی کنوک ڈی بلوچ تربت ءَ زھرشانی کنگ ءُ انساپ ءِ لوٹ ءَ کنگ ءَ اَنت۔ لس مردم ءُ انسانی ھکانی کارکن زھرشانی ءَ ھوار بہ بنت ءُ توار چست بہ کن اَنت۔
ڈاکٹر نسیم بلوچ ءَ گوشتگ کہ میان استمانی تک ءِ یکشلیں بے تواری بزاں اکوام متھدہ، انسانی ھکانی گل ءُ میان استمانی توانمندانی نادزرسی پاکستان ءِ بلوچ چکچینی ءَ گیش کمک کنگ ءَ اِنت۔ اے بے تواری زوراکیاں گیش کمک کنت میان استمان زوت گامگیج بزور ایت۔
