بلوچ یکجھتی کمیٹی ءِ سروک ڈاکٹر ماہ رنگ ءَ ماں رسانکدر ءَ وتی شنگ کرتگیں درشانے ءَ گوشتگ کہ بلوچ ورنایانی درکانودی کوش داں ترسناکیں ھدے ءَ گیش بوگ ءَ اِنت۔ تیوک ءَ مکران ءَ گوستگیں دوماہ ءِ میان ءَ باز ورنا نشانگ کنگ ءُ کشگ بیتگ اَنت۔ مرچی ریاستی کشندہ ٹولی ءَ تمپ گومازی ءَ نشانگ ءِ رد ءَ بلوچی زبان ءِ ورنائیں شائر کریم بلوچ شھید کرتگ۔ وھدے کہ سے روچ پیش ھمے ھند ءَ کسان سالیں مھراج بلوچ ریاستی کشندہ ٹولی ءِ کارمنداں شھید کرتگ اَت۔
آئی ءَ گوشتگ کہ بلوچ چکچینی وتی گڈی آسر ءَ سر بیتگ ءُ ایشی نوکیں دروشم سکا ترسناک اِنت۔ پیسر ءَ ورنا زور بیگواہ کنگ بیتگ اَنت بلے نوں تچک ءَ نشانگ کنگ ءُ کشگ بوگ ءَ اَنت۔
ڈاکٹر ماہ رنگ ءَ گوشتگ کہ مارا راج ءِ بستار ءَ یکجاہ بوگ ءُ اے ترسانکیں کارشونی ءِ ِ شریں وڑے ءَ دیم پہ دیمی کنگ لوٹ ایت۔ چی ءَ کہ ریاست ءَ بلوچ سرڈگار ءِ سر ءَ بلوچسانی گوں ترندی ءَ کشگ ءِ شوندات ٹھینتگ۔
