بلوچ یکجھتی کمیٹی ءِ سروک ڈاکٹر ماہ رنگ بلوچ ءَ ماں چاگردی رسانکدر ءَ نبشتگ کہ اوتل زانشتجاہ ءِ نودربرانی بک اسٹال انتزامیہ ءُ پولیس ءَ پہ زور ھلاس کرتگ، اود ءَ پولیس گوشگ ءَ اِنت کہ آ چہ برزا پرمان دیگ بیتگ اَنتءُ دومی نیمگ ءَ ریاست بلوچستان ءَ وتگڑیں کتاب میڑہ ءُ پیسٹیول برجم دارگ ءُ وانگ دوستی ءِ نیمون کنگ ءَ اِنت ایشی مول تیوک ءَ ریاست ءِ گپ ءِ دیم ءَ آرگ اِنت۔
آئی ءَ گوشتگ کہ بلوچستان ءَ کتاب کاروان ءِ رد ءَ بلوچ اسٹوڈنٹس ایکشن کمیٹی ءِ نودربراں گوستگیں یک ماھے بیت کہ سرجمیں بلوچستان ءِ جتائیں شھر ءُ میتگاں سد ءَ گیش بک اسٹال جتگ۔ اے کتاب دوستی ءِ تکشام ءِ میان ءَ گوادر، نسیرآباد، ھب چوکی، راجن پور ءَ ھوار جتائیں جاھاں نودربر دزگیر کنگ بیتگ اَنت ءُ آیانی سر ءَ دروگیں ایپ آئی آر نبیسگ بیتگ ءُ کتاب ھم برگ بیتگ اَنت، اے لاھور ءُ کراچی ءَ تچک ءَ بھا بوگ ءَ اَنت۔ اے ریاست ءِ نیمگ ءَ بلوچ راج ءِ باسما بوگ درساں مستریں میارباری یے لیکگ بیتگ۔
