ھزدار: پاکستانی لشکر ءِ دست ءَ زوربیگواه کنگ بیتگیں جھانزیب زھری ءِ کھول ءَ آئی یل نہ کنگ ءِ بگیری ءَ زھرشانی ءَ شال کراچی شھدگ ءِ بند کنگ ءِ جار جتگ.
کھول ءَ گوشتگ که جھانزیب زھری ء وڈیره ابداُلھالک 9 جنوری ءَ پاکستانی لشکرءَ گوں دگه باز مردم ءَ چه سموانی زھری ءَ آوار جتگ ءُ بیگواه کرتگ که آ دگه گیشتریں بیگواھیں مردم چه کھولانی بازیں زھرشانی ءُ سوراب ءِ شھدگ ءِ بند کنگ ءَ پد آجو کنگ بیتگ اَنت بلے جھانزیب انگت بیگواه اِنت.
کھول ءِ گوشگ اِنت ما بلوچستان ءِ پیشیگیں وزیر نواب سناءالله ، ڈپٹی کمشنر ھزدار ءُ انتزامیه ءِ کرا جھانزیب ءِ زوربیگواھی ءِ گپ جتگ که په آئی ءِ آجوئی ءَ وتی کرد ءَ پیلو به کن اَنت. اگاں آ آجو کنگ نه بیت ما باندا پنچ شمبے ءِ سھب ءَ شال کراچی ءِ شھدگ ءَ بندکن اِیں ءُ زھرشانی کن اِیں.
کھول ءَ گوں بلوچ یکجھتی کمیٹی زھری، جھالاوان ھنکین ءُ راج ءَ لوٹ کرتگ که مئے زھگ ءِ آجوئی ءَ مئے پله مرزی ءَ به کن اَنت۔
کھول ءَ گوں چاگردی ءُ رسانکدری کارکناں دزبندی کرتگ که په جھازیب ءِ آجوئی ءَ چاگردی رسانکدراں توار چست به کن اَنت.
