ھزدار: کشندہ ٹولی ءِ کارمندانی دست ءَ بیگواہ کنگ بیتگیں آسمہ جتک آجوئی ءَ پد زھرشانی نندانک ءَ ساڑی بیتگ۔ آئی ءَ گوشتگ کہ شپ ءِ دو ءَ مئے گس ءَ ارش کنگ بیتگ ءُ منی کھول لٹ ءُ شاپ اِش کرتگ ءُ پد ءَ بستگ اَنت، ۔ منی پہ زور دپ اش بستگ ءُ گردن ءَ گدے بستگ ءُ گاڑی ءَ تہ ءَ چگل داتگ۔ پد ءَ من تستگ آں ءُ نزاناں کہ آیاں من ءَ کج ءَ برتگ۔
آئی ءَ گوشتگ دانکہ من سما کرتگ گڑا آیاں پہ زور منی تامربند جوڑ کناھینتگ۔ من ءَ گوشتگ اِش کہ اگاں تو تامربند ءِ تہ ءَ نہ گوشت کہ من چہ وتی رزا ءَ اتکگ آں گڑا ما تئی پت ءُ برات ءَ کُش ایں۔ اے تامربند کہ شمادیستگ اِے من چہ وتی پیسلہ ءَ جوڑ نہ کرتگ بلکیں من پہ زور پرماھگ بیتگ آں۔
آسمہ ءَ گوشتگ کہ من ءَ گوشگ بیتگ تو آمیدگس ءَ ھمے بہ گوش کہ من پہ رزا شتگ آن ءُ سانگبندی کنگ لوٹ آں۔ منی واھگ ھمے بیتگ کہ من وتی گس ءَ سر بباں پاکیں ھاوند ءَ من ءَ سر کرتگ۔
آئی ءَ گوشتگ کہ من اے سے روچاں نہ نان وارتگ ءُ نہ آپ وارتگ، شپ ءُ روچ ءَ آگہ بیتگ آں۔ اے ھم ھدا ءِ شکر اِنت کہ من سلامتی وتی کھول ءِ کِر ءَ سر بیتگ آں، من بس انساپ ءِ لوٹ ءَ کن آں۔
