گوں زور بیگواھیں مردمانی کھولاں ھمدردی ءِ درشان ءَ بلوچ راجی زْرمبشت ( بی این ایم ) ءِ نیمگ ءَ ماں جرمنی ءَ زھرشانی کنگ بیتگ ، اے زھرشانی ءَ مزنیں کچے ءَ درانڈیھیں بلوچاں بھر زرتگ۔زھرشانی ءِ مول ماں بلوچستان ءَ پاکستانی لشکر ءِ زوراکیانی سھرا کنگ اَت۔ اے زھرشانی ءَ زور بیگواھی ءِ بگیری ءَ برجاھیں زْرمبشت ءِ نیمگ ءَ دلگوش پرینگ بیتگ۔ بلوچ چکچینی ءِ بگیری ءَ پرایمنیں دْراج بندیں روانک ءِ بھر زیروک اسلام آباد پولیس ءَ لٹ داتگ اَنت ، بی این ایم ءَ اسلام آباد پولیس ءِ اے کار گوں تْرندی ءَ ایر جتگ۔
بی این ایم ءِ بنجاھی پتر ءِ باسک ھمل ھان ءَ گوں زھرشانی ءِ بھرزیروکاں تْران کنان ءَ گْوشتگ ، دروگیں میڑاں بالاچ ء مولابکش ءِ دزگیریں کوش ءِ بگیری ءَ چست بیوکیں زْرمبشت پہ مردمے ءِ یا کھولے ءِ بارہ ءَ نہ اِنت بلکیں اے سرجمیں بلوچ راج ءِ جھگیریں زْرمبشت اِنت۔ ایشی ءَ چہ بلوچ گلزمین ءَ در ھم بلوچ ’راجی سنچ ‘ ءِ بنیاد ءَ یکجا کرتگ اَنت۔
بی این ایم جرمنی ءِ کمک کارگشاد شرھسن ءَ چہ پاکستان ءِ نیمگ ءَ مردمی اگبالانی لگتمالی گوں تْرندی ءَ ایرجتگ ءُ آئی ءِ زورگریں شونداتانی بگیری کرتگ۔آئی ءَ گْوشتگ پاکستان ءَ بلوچستان شاھگانیں زندانے جوڑ کرتگ۔
بی این ایم جرمنی ءِ کماش ازگر ءَ زور بیگواھیں مردمانی کھولانی درد ءُ رنج درشان کرتگ اَنت ءُ پہ زْرمبشت ءِ تْرامگ ءَ بلوچ جنینانی گھگیریں کرد ساڑاتگ۔ آئی ءَ چہ سال 2009 ءَ زور بیگواھیں زاکر مجید ءِ مات ءِ مگیمیں واھگ ءُ لوٹ سھرا کرتگ ءُ گْوشتگ اے ماتے ءِ پہ وتی زور بیگواھیں چک ءَ دم نہ بروکیں جھد ءِ درور اِنت۔
بی این ایم جرمنی ءِ کمک سرکماش سمل ءَ بلوچ راج ءِ جیڑھانی سر ءَ رسانکدر ءِ بے تواری ایرجتگ ءُ آیانی توار ءَ میان استمانی تک ءَ رسینگ ءِ بی این ایم ءِ واھگ ءُ مسام درشان کرتگ۔ آئی ءَ بالاچ ءُ چاکر ءِ رندپدانی درور داتگ ءُ گْوشتگ بلوچ راج زیردستی ءِ بگیری ءَ دْراج ءُ برجاھیں جھدے کنگ ءَ اِنت۔
بی این ایم ءِ باسک سادق سئید ءَ گوں دْراج پندیں روانک ءَ ھم دلی درشانتگ ءُ چہ پاکستانی مھترھند ءُ رسانکدر ءِ نیمگ ءَ زوربیگواھیں مردمانی کھولانی جیڑہ گْوشتگ اَنت کہ ترس، بیھار ءُ بے زانگی ءِ دیمپان اَنت۔
سپیا منزور ءَ بلوچستان ءَ مردمی اگبالانی بگیری ءِ پٹ ءُ پول کنگ ءُ اے تک ءَ زمہ واریں مردمانی گر ءُ دار ءُ جست ءُ پرس ءِ سر ءَ زور دیان چہ راجانی سنت ءَ دزمانجنی کنگ ءِ دزبندی کرتگ۔
سلمی ءَ ماں بلوچستان ءَ زور بیگواھیں بلوچانی کھولانی جھد ءِ نیمگ ءَ دلگوش پرینتگ ءُ درائینتگ ، بلوچستان ءِ زور بیگواھی ءُ زوراکی ھم روچ بیوکیں پردردیں ویل جوڑ بیتگ اَنت۔
بھتاور ءَ زور داتگ کہ اسلام آباد ءَ برجاھیں زھرشانی بالاچ مولابکش ءِ کوش ءِ بگیری ءَ بنا بیتگیں نندانک ءِ پدگوانک اِنت۔ آئی ءَ پاکستانی لشکر ایر جتگ ءُ گْوشتگ پاکستانی لشکر بلوچ چکچینی ءَ ھوار اِنت۔
زھرشانی ءَ چاگردی کارکن پلیکس ءِ نیمگ ءَ ھم ھمدردی درشانگ بیتگ، آئی ءَ پرایمنیں بلوچ کارکنانی بگیری ءَ زور ءِ کارمرد ایر جتگ۔
بلوچ راجی زْرمبشت ( بی این ایم ) جرمنی تک ءِ گْوستگیں کلیتدار ابدل رھمان ءُ ھسن ءَ زور بیگواھیں مردمانی کھولانی جاور ءِ نیمگ ءَ دلگوش پرینوکیں نام گیپتیں زھرشانی ءِ تْرامگ ءَ سروکیں کرد پیلو کرتگ۔
زھرشانی ءِ گڈ سر ءَ ، بی این ایم جرمنی ءِ کماش ازگر ءَ درسیں بھرزیروکانی منت گیپتگ ءُ پہ بلوچستان ءِ مردماں جھد کنگ ءِ واھگ درشانتگ۔
