بلوچ وومن پورم ءِ سروک ڈاکٹر شلی ءَ ماں چاگردی رسانکدر ایکس ءَنبشتگ کہ کیچ ءِ ھند تمپ، گومازی ءَ ریاستی پلہ مرزیں کشندہ ٹولی ءِ کارمنداں تیرگواری کرتگ ءُ مھراج ء ابدُلکادر نامیں یک ورنایے شھید کرتگ۔ اے بنداتی ویل نہ اِنت، ھمک روچ ءِ بنیاد ءَ کیچ ءَ ھوار آدگہ ھنداں بلوچ ورنا نشانگ کنگ بنت۔ پاکستان ریاست ءِ چکچینی ءُ ناشرکاری گڈی ھد ءَ سر اِنت۔
آئی ءَ گوشتگ کہ ما بلوچ راج ءِ بستار ءَ گیشتر ورنایانی شھیدی ءَ اوپار کرت نہ کن ایں، مارا دیم ءَ آھگ ءُ توار چست کنگ، گپ جنگ ءُ ایرجنگ لوٹ ایت۔ زوراکیانی سرءَ بے توار بوگ گوں میارباری ءَ شریداری زانگ بیت۔ گوستانک آ مردماں نہ بکش ایت کہ بلوچ چکچینی ءَ گند اَنت ءُاے وڑیں ویلاں مان ننیار اَنت۔
ڈاکٹر شلی بلوچ ءَ گوشتگ کہ میان استمانی تک بلوچ چکینی ءِ سرءَ دلگوش دیگ ءُ پاکستان ریاست ءَ اے زوراکی ءِ بابت ءَ چست گرگ لوٹ ایت۔
