شال: پہ زور بیگواھیں مردمانی پد جنگ ءَ وی بی ایم پی ءِ زھرشانی گدان ءَ5731 روچ سرجم بیتگ۔ شمبے ءِ روچ ءَ ملا یار مھمد دھوار، الی دوست بلوچ ، نزر اھمد ءُ آدگہ مردم پہ ھمدردی درشاں کنگ ءَ گدان ءَ اتکگ اَنت۔
وی بی ایم پی ءِ کمک سرکماش ماما کدیر گوں مردماں تران کرتگ ءُ گوشتگ کہ ھزدار، تربت ءُ پنجگور ءَ بلوچ پسگانی شھیدی ریاست ءِ زوراکیانی شوندات ءِ درچ اِنت۔ بلوچستان ءَ پاکستانی لشکر سرجم ءَ بے سوب بیتگ ءُ زورگپتی ءِ بگیری ءَ لس مردمانی جھد ءَ ریاست ءِ شوندات بے سوب کرتگ اَنت ریاستی لشکر چہ وتی زوراکیاں بلوچ چکچینی ءَ گیشتر تیز کنت۔
ماما کدیر گوشتگ کہ بلوچستان لشکری بنجلے جوڑ بیتگ اد ءَ درسیں سوڑگ لشکر ءُ آئی چیریں ادارھانی دست ءَ اَنت۔ اگاں اد ءَ کسے پاکستانی لشکر ءُ آئی ھمکارانی بگیری ءَ توار چست بہ کنت گڑا زوراکیانی نشانگ کنگ بیت، دومی نیمگ ءَ انسانی ھکانی میان استمانی ادارہ تھنا رپورٹ شنگ کن اَنت ءُ انگت ءَ ھچ وڑیں گامگیج زورگ ءَ نہ اَنت۔
