بلوچ نیشنل موومنٹ ءِ جارکش ءَ گوشتگ کہ 8 پروری 2025 ءَ جرمنی چیپٹر، نارتھ رائن ویسٹ پیلیان ( NRW ) بنزہ ءَ پاکستان ریاست ءِ نیمگ ءَ بلوچستان ءَ برجاھیں چکچینی ءُ انسانی ھکانی بگیریانی بابت ءَ پہ سرپدی دیگ ءَ کوبلینز ءَ Löhr Rondell ءَ زھرشانی کرتگ۔ زھرشانی ءَ زوریں بیگواھی، درکانودی کوش ءُ بلوچستان ءِ مڈیانی لٹ ءُ پل ءِ سر ءَ گپ جتگ ءُ پہ ریاستی زوراکیانی آماچیں مردماں انساپ ءِ لوٹ کرتگ۔
زھرشانی ءَ تران کنان ءَ بی این ایم جرمنی چپٹر ءِ کمک سرکماش سپیہ منزور بلوچ ءَ گوں میان استمانی تک ءَ بلوچستان ءَ برجاھیں زوراکیانی گِر ءُ دار کنگ ءِ لوٹ ءِ سر ءَ زور داتگ۔
آئی ءَ اے جاورانی تہ ءَ انسانی جانانی زوال بوگ ءِ گپ کرتگ ءُ گوشتگ کہ دنیا دزمانجنی بہ کنت۔آئی ءَ زوراکیانی دارگ، پاکستان سرکار ءِ جست گرگ ءُ بلوچانی ھک ءُ شرپ ءِ پھازداری ءِ سدکی دیگ ءِ زوتیں کاروائی کنگ ءِ لوٹ کرتگ۔
بی این ایم جرمنی چیپٹر ءِ کمک کارگشاد شلی بلوچ ءَ گوں ترندی ءَ تران کرتگ ءُ بلوچستان ءَ پاکستان ءِ مھکیں چکچینی پاشک کرتگ۔ آئی ءَ ھزارانی کچ ءَ بلوچ مرد، جنین ءُ زھگانی آوارجنی، آزاردھی ءُکوش ءِ زمہ وار پاکستان ریاست ءِ ھیلہ ایر جتگ اَنت۔ شلی ءَ ھمے گپ ءَ زور داتگ کہ پاکستان بلوچستان گوں یک کوشجاھے ءَ مٹ کرتگ۔ شلی ءَ گوشتگ کہ جھان بے توار اِنت ءُ پاکستانی لشکر بلوچ جنیناں آوار جنگ ءُ کارکناں آزار دیگ ءُ کودکیں شھریاں تچکی ءَ کشگ ءَ اِنت۔
شلی ءَ میان استمانی تک زور داتگ کہ آ وتی بے تواری ءَ بہ پروش اَنت۔ پاکستان ءِ چکچینی ءِ مان نیارگ آئی ءَ گوں برجاھیں چکچینی ءَ ھوار کنت۔ بلوچ ءِ گھگیری ھلاس کنگ نہ بیت۔ پاکستان ءِ میارباری بے ھال کنگ نہ بنت ءُ پاکستان اے زوراکیانی سر ءَ جست گرگ بیت۔
بی این ایم جرمنی چیپٹر ءِ باسک آسپ بلوچ ءَ تران ءَ بلوچانی سر ءَ پاکستان ءِ زوراکی پاشک کرتگ۔ ھزارانی کچ ءَ بلوچ مرد، جنین ءُ زھگانی آوار جنی، آزار دیگ ءُ کوش ءِ سر ءَ تران کرتگ ءُ آئی ءَ گوشتگ کہ پاکستان ءَ بلوچستان گوں یک کوش جاھے ءَ مٹ کرتگ۔ زوریں بیگواھی، درکانودی کوش ءُ چیریں بندیگجاھاں پاکستانی لشکر ءِ کرد ایرجتگ کہ اود ءَ مردماں رستر ءِ وڑ ءَ زوراکیانی نشانگ کن اَنت۔
آئی ءَ بلوچستان ءَ مڈیانی لٹ ءُ پل ءِ گپ جتگ ءُ گوشتگ کہ چہ ھدا دادیں مڈیاں سریچیں دمگے ءَ ابید بلوچ لس مردم سکا نیزگاری ءِ آماچ اَنت۔ تیل، گیس ءُ آدگہ مڈیانی لٹ ءُ پلیں سرکار پاکستان ریاست ءُ ریاستی لشکر ءَ ابید لشکری باپاریں ڈیھاں رس اَنت۔
بلوچ نیشنل موومنٹ جرمنی چیپٹر ءِ باسک شئے جامی ءَ بلوچستان ءَ برجاھیں انسانی ھکانی بگیری ءَ بابت ءَ گپ جتگ ءُ گوشتگ کہ مزنیں کچے ءَ کشت ءُ کوش، زوریں بیگواھی ءُ بلوچ ءِ پجار ءِ ھلاس کنگ ءِ جھد برجاہ اِنت۔
بلوچ نیشنل موومنٹ جرمنی چیپٹر ءِ باسک ازیز بلوچ ءَ بلوچستان ءَ برجاھیں انسانی ھکانی بگیری، زوریں بیگواھی، درکانودی کوش ءُ بلوچ دودمان ءُ پجار ءِ گوں مھکمیں رنگے ءَ ھلاس کنگ ءِ سر ءَ تران کرتگ۔ آئی ءَ ھمے لوٹ ءِ سر ءَ زور داتگ کہ میان استمانی تک گامگیج بزور ایت ءُ پاکستان ریاست ءَ اے زوراکیانی جست ءَ بہ کنت۔ ازیز بلوچ ءَ بلوچستان ءَ لشکرکشیانی بند کنگ، درسیں سْیاسی بندیگانی یل کنگ ءُ انسانی ھکانی پھازداری ءُ اھوالکارانی پھریزگ ءِ لوٹ کرتگ۔
