بلوچستان لبریشن پرنٹ ءِ جارکش میجر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ سرمچاراں گْوادر ءُ پیدراک ءَ پاکستانی لشکر دو جتاھیں اُرشاں نشانگ کرتگ جانی ءُ مالی تاوان داتگ۔
آئی گوشتگ کہ سرمچاراں سیزدہ پروری ءِ مگرب ءَ پد گْوادر ءَ شمبے اسمائیل کبرستان ءِ نزیک ءَ زورگریں پاکستانی لشکر ءِ کارمند ھما وھد ءَ گوں دستی بمب ءَ نشانگ کرتگ اَنت کہ آ پرپٹ ءِ سر ءَ تر ءُ گرد کنگ ءَ بوتگ انت۔ چہ ایشی ءَ آیاں جانی ءُ مالی تاوان بوتگ۔
آئی گوشتگ کہ اُرش ءَ پد زورگریں لشکر ءَ پیش ءِ وڑ ءَ مھلوک ءِ گون ءَ زوراکی کرتگ بلے بلوچ سرمچار در آھگ ءَ سوبین بوتگ اَنت۔
جارکش ءَ گوشتگ کہ یک دگہ اُرشے ءَ سرمچاراں زی بیگاہ ءِ پنچ ءَ پیدراک ءُ گورکوپ ءِ میان ءَ دوراھی ءَ برجاھیں زورگریں پاکستانی لشکر ءِ بنجل ءِ سر ءَ اُرش کرتگ۔ سرمچاراں بنجل ءِ سر ءَ گرنیڈ لانچر ءِ لھتیں گولہ آس داتگ کہ بنجل ءِ تہ ءَ کپتگ اَنت۔ چہ ایشی ءَ پاکستانی لشکر ءَ جانی ءُ مالی تاوان بوتگ۔
جارکش ءَ دوئیں اُرشانی زمہ واری من اِتگ ءُ گوشتگ کہ مئے اُرش داں بلوچستان ءِ سرجم ءَ آجوئی ءُ زورگریں لشکر ءِ در آھگ ءَ برجاہ بنت۔
