بلوچ نیشنل موومنٹ ( بی این ایم ) ءِ سرکماش ڈاکٹرنسیم بلوچ ءَ گوشتگ کہ بلوچ دانشور ءُ زانشت ءِ سرچمگ گوں مھکمیں وڑے ءَ نشانگ کنگ بوگ ءَ اَنت۔ لھتیں روچ پیش کیچ ءَ پی ایچ ڈی ءِ شہہ زانت ءُ وانگ دوستیں ورنا اللہ داد بلوچ پاکستانی لشکر ءِ کمکاراں روچ ء رھمان ءَ کشتگ۔ اے ناشریں ویل ءِ بگیری ءَ آئی پشپد ءُ بلوچ راج ءَ شریں وڑے ءَ زھرشانی کرتگ۔ ھمے میان ءَ استاد شریپ زاکر ءِ سر ءَ ارش پہ اے مچی سزا ءَ دگہ یک ناھکی یے گیش کنت۔ آئی زھگ ءُ ناکوزتک پیسر ءَ پاکستانی لشکر ءَ بیگواہ کرتگ اَنت۔
اے یک مردمے ءِ ویل نہ اِنت بلکیں یک مھکمیں تکشامے ءِ بھر اِنت۔ ایشی رد ءَ استاد، دانشور ءُ وانندگیں بلوچاں یک یکءَ نشانگ کنگ ءَ اَنت۔ پروپیسر سبا دشتیاری، پروپیسر ابدرزاک، زاھد آسکانی، استاد الی جان، ماسٹر نزیر ءُ بے کساس دگہ بلوچ استاد ءُ دانشور ریاستی زوراکیانی نشانگ بیتگ اَنت۔
آئی ءَ گوشتگ کہ تربت ءَ اللہ داد بلوچ ءُ استاد شریپ زاکر ءِ سر ءَ ارش اناگتی یا وتسریں کاروائی نہ بوتگ اَنت بلکیں پہ زانت ءُ سما جوڑ کرتگیں شوندات ءِ بھر اِنت۔ پاکستانی لشکر چہ وتی زرگپتیں کارمندانی رد ءَ بلوچ دانشوراں یک یک ءَ نشانگ کنگ ءَ اِنت۔ اے بنداتی نہ اِنت بلکیں بلوچستان ءَ وانندگ بھرگ ءِ سر ءَ ارشانی یک درچے اِنت۔ استاد، نودربر ءُ دانشورانی نشانگ کنگ یک تچکیں شوربندی یے کہ ایشی مول ھما توارانی دارگ اِنت کہ پہ آجوئی، انساپ ءُ پہ بلوچ راج ءِ زانشت ءَ چست بیت۔
ڈاکٹر نسیم بلوچ ءَ گوشتگ کہ بلوچ دانشور ءُ وانندگیں مردمانی ھلاس کنگ ءَ نشانگ کنگ بلوچستان ءِ ارواہ ءِ سر ءَ ارش زانگ بیت۔ ایشی مول نہ تیوک ءَ بلوچ چاگرد ءِ چہ زانشت ءُ لیکھی بنیاد ءَ نزور کنگ اِنت بلکیں یک انچیں ترسے ودی کنگ اِنت کہ اود ءَ پہ زوراکیانی بگیری ءَ توار چست کنگ ءَ کس ھمت مہ کنت۔ اے شوندات پہ بلوچ راج ءِ پدمنتگ، جاھل ءُ تھارونکی ءِ نیمگ ءَ تیلانک دیگ ءَ بوگ ءَ اَنت۔ دانکہ آیوکیں پدریچ چہ وانگ، زانشت ءُ راجی پجار ءَ زبھر بہ بیت۔
ما میان استمانی تک، اکوام متھدہ ءُ انسانی ھکانی ادارھاں چہ میارباریں بے تواری ءِ سر ءَ سکا بے اوستی درشان کن ایں۔ پاکستان اے بے تواری ءَ مژدہ سرپد بیت ءُ چکچینی ءَ گیش ترند کنت۔ میان استمان ءِ بے تواری ءَ کشندھیں ریاست گیشتر بے ترس کرتگ۔ ایشی آسر پہ آجوئی لوٹوک ءُ انساپ ءِ چمداریں مردماں زوراکی ءِ دروشم ءَ در کئیت۔
بی این ایم اے درسیں ارشاں گوں ترندیں دانکاں ایر جنت ءُ تربت ءَ انوگیں زوراکیاں ھوار بلوچستان ءَ برجاھیں ریاستی زوراکیانی میان استمانی تک ءَ زوت، آجو ءُ دلجمیں پٹ ءُ پول ءِ لوٹ ءَ کنت۔ ما چہ میان استمان ءَ ھمے لوٹ ءَ کن ایں کہ آ اے چکچینی ءِ سر ءَ بے توار مہ بنت، زوراکیانی بگیری ءَ گامگیج بزور اَنت ءُ اے زوراکیانی زمہ واراں میان استمانی آمیدگس ءَ جست بہ کن اَنت۔
چئیرمین ڈاکٹر نسیم بلوچ ءَ گوشتگ کہ مئے جھد تیوک ءَ پہ یک لس جیڑھے ءَ نہ اِنت بلکیں اے مئے راجی پدریچ، راجی پجار ءُ آیوکیں پدریچانی جنگ اِنت۔ جھان ءَ اے جاور گوں سنگینی ءَ منگ لوٹ اَنت کہ ما نہ تیوک ءَ پہ وتی راجی آجوئی ءَ بلکیں پہ دمگ ءُ سرجمیں جھان ءَ ناشرکاری ءِ بنجاھیں ریاست ءِ بگیری ءَ ایوک ءَ جنگ ءَ مڑگ ءَ ایں۔ مارا پہ اے زرمبشت ءَ میان استمانی تک ءُ اے دمگ ءِ زمہ واریں ڈیھانی پلہ مرزی باز درکار اِنت۔ جھان ءَ ھمے مارگ لوٹ ایت کہ وھدے ھک ءُ راست ءِ میدان ءَ یک راجے ءِ مرچی ءُ باندات ءِ جیڑہ اِنت گڑا بے توار بوگ یک میارباری یے زانگ بیت۔
