شال: بلوچ یکجھتی کمیٹی ءِ نیمگ ءَ بوتگیں زھرشانی روانک ءَ بلوچ وومن پورم ءِ سروک ڈاکٹر شلی ءَ تران کرتگ ءُ گوشتگ کہ اے زھرشانی روانک چہ کیچ ءَ ھما وھد ءَ بندات بیت بالاچ گوں دگہ سے ورنایانی ھواری ءَ شھید کنگ بیت ءُ آیانی لاش 24 نومبر ءَ تربت ءَ چگل دیگ بنت۔ مرچی اے زرمبشت بلوچستان ءِ کنڈ کنڈ ءَ سر بوتگ۔ اے زرمبشت ءِ سوبمندی ھمیش اِنت کہ ایشی تیوگیں بلوچستان ءِ مردم یکجاہ کرتگ اَنت۔ کوھلو ءُ ڈیرہ گازی ھان ءِ وڑیں جاھاں بھ مردم اے وڑ ءَ یکجاہ نہ بوتگ اَنت کہ اے زرمبشت ءَ ھما جاھاں مزنیں کچے ءَ مردم پاد آتکگ اَنت۔
ڈاکٹر شلی ءَ گوشتگ کہ ھزدار ءِ کر ءُ کشاں کشندہ ٹولی ءِ کارمند سک باز اِنت ءُ باز کار کنگ بوتگ بلے ھمے زھرشانی زرمبشت ءِ سوب ءَ ھمے جاھاں بازیں کچے ءَ مردم پاد کاینت ءُ زھرشانیانی بھر بنت۔ ھمے زھرشانی رونک چہ کیچ ءَ درکپ ایت ءُ شال ءَ کیت، اسلام آباد ءَ روت گڑا آ کجام داب ءَ وش آتک کنگ بنت، مئے مات ءُ گھار، پیریں کماش درس لٹ شاپ کنگ بنت، زندانی کنگ بنت۔ اسلام آباد پاکستان ءِ بنجاہ اِنت مئے زھرشانی روانک بنجاہ روت کہ ما وتی گپاں ایر کن ایں مئے گپ گوش دارگ بنت بلے اسلام آباد آیاں کجام وڑ ءَ وش آتک کنگ کنت بلوچ ایشی کدی بیھال نہ کنت۔
آئی ءَ گوشتگ کہ من ھمے گوشگ لوٹاں ریاست مارا بلوچ کنگ ءُ کشگ ءَ اِنت مارا ھم بلوچ بوگ ءُ پاد آھگی اِنت ءُ زوراکیانی بگیری ءَ توار چست کنگ لوٹ ایت۔ اگاں ما توار چست مہ کن ایں گڑا پہ بلوچ ءَ ھچ پشت نہ کپ ایت۔ اے زوراکی پما نوک نہ اَنت بلکیں چہ دھکاں مئے سر ءَ برجاہ اَنت، ھپتاد ءُ پنچ سال اِنت مئے گون ءَ زوراکی کنگ بوگ ءَ اِنت۔ بلوچ ھمک زوراکی ءِ بگیری ءَ پاد بیت ءُ آئی دیم پہ دیمی ءَ بہ کنت۔ اے زھرشانی روانک ءَ دراسانی کمک درکار اِنت۔
