نیدر لینڈر: بلوچ نیشنل موومنٹ ( بی این ایم ) ءِ بنجاھی جارکش ءَ گوشتگ کہ سنگتاں گوں ڈچ پارلیمنٹ ءِ باسک ایسا کھرامان(Isa Kahraman)، ایرک وان دیربرگ(Eric van der Burg) کور پیریک (Cor Pierik) ءُ جان پیٹرنوٹ (Jan Paternotte) ءَ گند ءُ نند کرتگ، بلوچستان ءَ انسانی ھکانی ناھکیں بگیریانی سر ءَ وتی ھیال درشان کرتگ اَنت۔ ایسا کھرامان پارلیمنٹ ءِ دیمپان، دری ءُ درانڈیھ ءِ مھذبی کمتری ءِ جیڑہ ءِ سر ءَ کار کنت۔ آ پارلیمنٹ ءِ دیمپانی پتر ءِ سرکماش اِنت۔
سنگتانی تہ ءَ بی این ایم ءِ انسانی ھکانی ادارہ پانک ءِ رھوتدار جمال بلوچ، بی ایم ایم نیدرلینڈ چیپٹر ءِ سرکماش مھیم ابدرھیم، کمک سرکماش وھید بلوچ، کارگشاد دیدگ بلوچ ءُ کمک کارگشاد آلیہ بلوچ گوں بیتگ اَنت۔ آیاں ھالینڈ پارلیمان ءِ باسکان ءَ بلوچستان ءَ زوریں بیگواھی، درکانودی کوش، لشکرکشی ءُ آدگہ ریاستی زوراکیانی بابت ءَ سرپد کرتگ ءُ چہ پانک ءِ نیمگ ءَ نبشتگیں پٹ ءُ پولی کتابکے داتگ۔
آیاں ھمے گپ ءِ سر ءَ زور داتگ کہ ڈچ سرکار ءُ میان استمانی تک بلوچستان ءَ انسانی ھکانی لگتمالیانی سر ءَ بے توار مہ بنت ءُ آیان ءَ اے جیڑہ ءِ سر ءَ وتی کرد پیلو کنگ لوٹ ایت۔
ایسا کھرامان ءُ ایرک وان دیربرگ ءَ بلوچستان ءِ جاورانی سر ءَ بژن درشان کرتگ ءُ گوشتگ کہ ما اے جیڑہ ءِ بابت ءَ ھمے ادارھانی تہ ءَ گپ کن ایں ءُ انسانی ھکانی لگتمالیانی بگیری ءَ توار چست کن ایں۔
گند ءُ نند ءِ میان ءَ بی این ایم ءِ سنگتان یک پٹیشنے ھم داتگ، ایشی ءِ تہ ءَ بلوچستان ءَ انسانی ھکانی ناگیگیں جاورانی سر ءَ دلگوش دیگ ءُ ایشی بگیری ءَ گوں ترندی ءَ گامگیج زورگ ءِ لوٹ کرتگ۔
