تربت: چہ بلوچ یکجھتی کمیٹی ءِ نیمگ ءَ گوستگیں روچاں تربت ءَ کشندہ ٹولی ءِ دست ءَ کشگ بیتگیں اللہ داد ءِ کوش ءِ بگیری ءَ دو روچ اِنت کہ شھید پدا چاراہ ءَ زھرشانی گدان برجاہ اِنت۔
گدان ءَ سْیاسی ءُ چاگردی کارکناں ھوار شھید نوید، شھید زریپ ءُ گْوادر ءَ کشگ بیتگیں زکریا بلوچ ءِ کھول ءَ بھر زرتگ۔ چہ ایشی ءَ اَبید زوربیگواھیں سھیل اھمد، اسد بلوچ، وسیم ملنگ ءُ اکبال بلوچ ءَ ھوار آدگہ زوربیگواھیں مردمانی کھولاں بازیں کچے ءَ بھر زرتگ۔
زھرشانی گدان ءَ بلوچ یکجھتی کمیٹی ءِ سروک سبگت شاہ جی ءِ ھواری ءَ دگہ بازیں جنین ءُ مردین ساڑی اَنت۔
ھمے درگت ءَ چہ بی وائی سی ءِ نیمگ ءَ باندا زھرشانی روانکے کشگ بیتگ۔ بی وائی سی ءَ گوں بلوچ راج ءَ دزبندی کرتگ کہ بلوچ چکچینی ءِ بگیری ءَ زھرشانی روانک ءَ بھر بزور اَنت۔
