بلوچستان لبریشن پرنٹ ءِ جارکش میجر گھرام بلوچ ءَ ماں رسانکدر ءَ وتی شنگ کرتگیں درشانے ءَ گوشتگ کہ ھشت ءُ نوہ پروری ءَ مئے سرمچاراں بارکان ءِ جتا جتائیں ھنداں مردم مچ کرتگ اَنت ءُ راجی آجوئی ءُ مردمانی ھمراھی ءِ بنگپانی سر ءَ گپ ءُ تران کرتگ۔ آیاں بگاؤ دامان، بست، وڈیرہ مھمد ھسین، رھیمانی ءُ ٹوٹیانی ھوار جتا جتائیں ھنداں تر ءُ گرد کرتگ ءُ گوں جتائیں بھرگاں سْیادی داروکیں مردماں گند ءُ نند کرتگ ءُ آیان ءَ آجوئی ءِ کلوہ سر کرتگ۔
آئی ءَ گوشتگ کہ گوں لس مھوک ءَ گند ءُ نند کنگ ءِ مستریں مول ایش اِنت کہ آیانی تہ ءَ راجی زانشت ٹوھینگ بہ بیت ءُ راجی جنز ءِ ھوار بوگ ءَ سکین دیگ بہ بنت داں وتی پجار، ھک ءُ آجوئی ءَ ھم سنت بہ بنت ءُ جھد بہ کن اَنت۔
جارکش ءَ گوشتگ کہ چہ مردمانی نیمگ ءَ سرمچارانی تپاکیں وش آتکی ءَ ھمے گپ پدر بیت کہ آیاں گوں بلوچ راج ءَ جْوانیں مھر ءُ دوستی یے ھست۔ آیانی مھکمیں ھمگرنچی، بے کساسیں کربانی ءُ پہ راجی آجوئی ءَ یکشلیں جھد آیاں راستیں رھشون جوڑ کنت۔ مرچی بلوچ سرمچار نہ اِیوک ءَ گھگیری ءِ چیدگ اَنت بلکیں اوست ءُ مھکم بوگ ءِ درور جوڑ بیتگ اَنت۔
آئی ءَ گوشتگ کہ ھمے میان ءَ سرمچاراں اِے گپ ءِ سر ءَ زور پر داتگ کہ راجی آجوئی ءَ مردمانی ھوار بوگ اَلّمی اِنت۔ آیاں زلم ءُ زوراکی ءِ بگیری ءَ یکجاہ بوگ، زورگریں توانمندانی دیم ءَ اوشتگ ءُ ھمک جاہ ءَ راجی مھکمی ءِ بابت ءَ سرپدی داتگ۔ اِے مچی ءُ سرپدی دیوان ھمے گپ ءِ بشون اِنت کہ بلوچ راج ءِ زانشت ءِ تہ ءَ نوکیں زرمبشتے چست بوگ ءَ اِنت کہ آیاں پہ رُژنائیں بانداتے ءَ سکین دنت۔
آئی ءَ گوشتگ کہ بلوچ سرمچاراں کول کرتگ کہ پہ راجی آجوئی ءَ وتی جھد ءَ برجاہ دار اَنت ءُ پہ ھر وڑیں دیمونی ءَ جاڑیگ اَنت۔ بارکان ءِ اے وڑیں ھمے گپ ءَ پدر کن اَنت کہ بلوچ ءِ راجی زرمبشت دیم ءَ جنزان اِنت ءُ مردمانی بھر زورگ روچ پہ روچ گیشتر ءُ مھکم تر بوگ ءَ اِنت۔
