بلوچ نیشنل موومنٹ ءِ بنجاھی جارکش ءَ گوشتگ کہ امریکہ چیپٹر ءِ نیاد چیپٹر ءِ سرکماش نبی بکش بلوچ ءِ سروکی ءَ برجم دارگ بیتگ۔ دیوان ءِ گچینی مھمان ڈاکٹر نسیم بلوچ ءُ آدگہ مھمان بی این ایم ءِ بنجاھی مستریں کمک سرکماش ڈاکٹر جلال بیتگ۔ دیوان ءَ جتائیں بنگپانی سر ءَ تران ءَ پد پیسری کابینہ ھلاس کنگ بیتگ ءُ چہ گچینکاری ءَ نوکیں کابینہ جوڑ کنگ بیتگ۔
دیوان ءَ بی این ایم ءِ سرکماش ڈاکٹر نسیم ءَ تران کرتگءُ گوشتگ کہ بی این ایم ءِ جھد ءِ لوٹ ءُ واھشت بلوچستان ءِ آجوئی اِنت، پہ ھمے جھد ءَ بی این ایم ءِ رھشوناں داں باسکانی دیمونی ءِ یک مزنیں لڑے ھست، چیئرمین ءَ پارٹی ءِ باسکان ءَ رسانکدر ءِ پہ بے نپ ءَ کارمرز کنگ ءِ سرءَ مکن کرتگ ءُ گوشتگ کہ پارٹی ءِ ھمبل واجہ گلام مھمد ءِ جوڑ کرتگیں کارشونی ءِ رندگیری ءَ بہ کن اَنت ءُ بی این ایم ءِ پروگرام ءَ دیم ءَ بہ بر اَنت۔
چیپٹر ءِ نیاد ءَ پارٹی ءِ بنجاھی مستریں کمک سرکماش ڈاکٹر جلال ءَ تران کرتگ ءُ گوشتگ کہ مرچی امریکہ ءِ تہ ءَ انچو مزنیں کچے ءَ باسکانی گندگ پمن یک پھر ءِگپے کہ پہ بہ این ایم ءِ پروگرام ءَ اے گوں دلجمی ءَ بھر زورگ ءَ اَنت۔ آئی ءَ گوشتگ کہ پارٹی ءِ ھمبل پہ نوک آیوکیں ھمبلانی ھیلکاری ءَ دلگوش بہ دے اَنت۔
دیوان ءَ تران کنان ءَ نبی بکش بلوچ ءَ گوشتگ کہ بی این ایم یک راجی پارٹی یے گوں ایشی بلوچ راج ءِ مزنیں اوستے بندوک اِنت۔ پمشکا بی این ایم ءِ امریکہ ءِ ھمبلانی سر ءَ یک مزنیں زمہ واری یے بیت کہ بی این ایم ءِ ھمک باسک ءَ وت ءَ بلوچ ءِ سپیر سرپد بہ بیت ءُ پہ بلوچستان ءِ کیس ءِ جھان ءِ دیم ءَ آرگ ءَ وتی پرزا پیلو بہ کنت۔
دیوان ءِ گڈی ءَ سرکماش ڈاکٹر نسیم بلوچ ءِ سروکی ءَ سے باسکی گچینکاری پترے جوڑ کنگ بیتگ کہ آئی باسک ڈاکٹر جلال بلوچ ءُنبی بکش بلوچ بیتگ اَنت ءُ گچینکاری کنائینتگ۔ پہ امریکہ چیپٹر ءِ سرکماش ءُ کمک سرکماشی ءَ اوشتاتگ اَنت ءُ آدگہ اگدہ دار انچوش سوبین بیتگ اَنت۔
پہ سرکماشی ءَ سمی بلوچ ءُ جی آر بلوچ ءُ پہ کمک سرکماشی ءَ انایت بلوچ ءُ میر دوست اوشتاتگ اَنت۔ کابینہ ءَ سمی بلوچ سرکماش ، انایت بلوچ کمک سرکماش، امداد کارگشاد، پھد بلوچ کمک کارگشاد ءُنوھا بلوچ کلیتدار گچین کنگ بیتگ انت۔
نوک گچیں بیتگیں کابینہ مراد باتی داتگ ءُ ڈاکٹر نسیم بلوچ ءُ آدگراں گوشتگ کہ مارا ھمے اوست اِنت کہ پارٹیءِ ھمبل چہ امریکہ ءَ بلوچ ءُ بلوچستان ءِ آجوئی ءِ کیس ءَ جھان ءِ دیم ءَ شریں وڑے ءَ پیش کن اَنت۔
