ھاران: زورگریں پاکستانی لشکر ءِ دست ءَ زوربیگواه کنگ بیتگیں برات مبارک ءُ ھاپز الی سیاه پاد ءِ زوریں بیگواھی ءِ بگیری ءَ کھول ءِ زھرشانی چارمی روچ ءَ ھاران ریڈ زون ءَ برجاه بیتگ۔
بنشون ءِ رد ءَ ھمے میان ءَ مرچی کھول ءِ نیمگ ءَ زھرشانی روانکے کشّگ بیتگ ءُ پہ دوئیں براتانی آجوئی ءَ لوٹ اِش کرتگ. روانک ءَ ھاران ءِ سیاسی کارکن، مھذبی سروک، وکیل ءُ نودربراں ھوار آ دگه بیگواھیں مردمانی کھول، جنین ءُ زھگاں بازیں کچے ءَ بھر زرتگ۔
ھاران ءِ ریڈ زون ءَ مرچی برجاھیں زھرشانی ءِ چارمی روچ ءَ چیئرمن میر جما کبدانی، مولانا نیامت الله ھبیبی، مولانا ھزمت الله انکلابی، ملک ابداُلکدوس میروانی، ملک منزور اھمد نوشیروانی، ازیز اکرم، ھالد داد، کے ڈی بلوچ، زرمینه بلوچ، ممتاز سیاه پاد، مولانا ابدالکدوس ھبیبی ، منسور جلالی ءُ آ دگراں تران کرتگ ءُ زوریبگواھیں ورنا مبارک ءُ ھاپزالی ءَ ھوار آ دگه زوربیگواھیں مردمانی زوت آجو کنگ ءِ لوٹ کرتگ.
داں اے وھد ءَ چه انتزامیه ءِ نیمگ ءَ ھچ کس ءَ گوں زھرشانی کنوکیں مردماں گپ ءُ تران نه کرتگ زهرشانی انگت ءَ برجاه اِنت۔
