بلوچ وومن پورم ءِ سروک ڈاکٹر شلی ءَ ماں رسانکدر ءَ وتی شنگ کرتگیں درشانے ءَ گوشتگ کہ کائد ازم زانشتجاہ اسلام آباد ءِ ایم پل ءِ نودربر اللہ داد ء واھد ءِ ناھکیں کوش بلوچ چکچینی ءِ یک پدّریں منانکے۔
آئی ءَ گوشتگ کہ بلوچ نودربر اللہ داد اسلام آباد ءَ وانگ ءِ میان ءَ چہ پاکستانی چیریں ادارھانی نیمگ ءَ باز رند ءَ ترسینگ بیتگ۔ آ وانگ ءِ میان ءَ یکشل ءَ نشانگ بیتگ۔ آ لاچار کنگ بیتگ ءُ چه ایشی ءَ آئی ءَ وتی وانگ یل داتگ ءُ واتر بلوچستان ءَ اتکگ۔ بلے پاکستانی لشکر ءَ آ یل نہ داتگ، آئی رندگیری کنگ برجاہ بیتگ دانکہ گڈی ءَ نشانگ کرتگ ءُ کشتگ۔
ڈاکٹر شلیءَ گوشتگ کہ اللہ داد ءِ کسہ پاکستان ریاست ءِ بلوچانی سر ءَ زوراکیانی یک تچکیں منانکے۔ آئی کوش جتائیں ویلے نہ اِنت۔ اے ناشریں ریاست ءِ نیمگ ءَ بلوچسانی بگیری ءَ بندات کنگ بیتگیں ناشرکاری ءِ یک مھکمیں تکشامے ءِ بھر اِنت۔ پاکستان ءِ ریاست باسمائیں بلوچ، ملا ءُ کارکناں کشندہ ٹولی ءِ نشانگ کنگ ءَ اِنت دانکہ ھما مردماں که آ ریاستی زوراکیانی بگیری ءَ توار چست کنگ ءَ اَنت بے توار به کنت۔
آئی ءَ گوشتگ کہ بلوچ سکا پدمنتگی، نیزگاری ءُ آزارانی دیمپان اِنت۔ مات ءُ پت پہ جنجالے وتی زھگاں والین اَنت، آ ھمے اوست ءَ دار اَنت کہ مئے زھگ مئے پیری ءِ کمک بنت۔ بلے ناشریں ریاست ءِ شوربندی دگر اَنت، آ اے ورنایانی زندگیاں یک دمانے ءَ ھلاس کنت۔
ڈاکٹر شلی ءَ گوشتگ کہ بلوچ چکچینی یک راستی یے، اے کم کم ءَ چست بیوکیں آس اِنت ءُ ایشی ءَ بازیں زندگی تباه کرتگ۔ کھول پروشتگ ءُ رنجانی آماچ کرتگ اَنت۔ ما چِد ءُ گیشتر وتی باسمائیں مردمانی لاشاں کل کرت نہ کن ایں۔ مارا وتی ورنا زندگ دارگ، آیانی توار گوش دارگ ءُ واب پیلو کنگ لوٹ اَنت۔
