ھاران: 16 مارچ 2022 ءَ سی ٹی ڈی ءِ دست ءَ زور بیگواہ کنگ بوتگیں ورنا شاہ پھد ءِگھار ناھدہ مھمود وتی تامربندے ءَ وتی برات ءِ آجوئی ءِ لوٹ کرتگ۔
آئی ءَ گوشتگ کہ شاہ پھد ءَ سی ٹی ڈی ءَ 16 مارچ 2022 ءَ ھاران ءَ چہ مئے گس ءَ بیگواہ کرتگ۔ مارا ھمے گوشگ بہ بیت ما پہ انساپ ءِ لوٹگ ءَ کج ءَ بہ رویں، اے ڈیھ پہ بلوچاں یک آزارجاھے۔ بلوچستان ءَ مئے توار داں آیانی کر ءَسر نہ بیت، ما وھدے اسلام آباد ءَ رویں مارا آزار دے اَنت، ما کہ چہ میان اسمتانی ادارھاں لوٹ کن ایں ما راجدوہ گوشگ بہ ایں۔
ناھدہ مھمود ءَ گوں سرکار ءَ لوٹ کرتگ ءُ گوشتگ کہ پہ ھدا ءَ بچار اِت اے زوراکیاں بند بہ کن اِت ءُ مئے زور بیگواھیں براتاں زوت آجو بہ کن اِت۔
