بلوچ نیشنل موومنٹ ءِ پیشگیں سرکماش ءُ بلوچ سروک ھلیل بلوچ ءَ مستونگ ءِ شھید ڈاکٹر منان ءُ ھمبلانی نُھمی سالروچ ءِ درگت ءَ شھید ستک شانی ندر کُرتگ اَنت ءُ گْوشتگ کہ بلوچ راجی جُھد ءِ راجدپتر دیمونی ءُ مھکمی ءِ بے دروریں داستانے کہ ایشی ءَ وھد ءِ نانگیگی آئی ءَ تھار دیمگ نہ کنت۔اے راجدپتر ءِ رژنائیں در ءِ نام شھید ڈاکٹر منان اِنت کہ گوں وتی زانت،زانوگری ءُ آشوبی لیکہ ءَ راجی جُھد ءِ کیلہ ءُ کِردی پِڑ ءَ یک یک بے بھائیں کِردے کہ مدام گیرآرگ بیت۔
آئی ءَ گْوشتگ کہ مرچی کہ وھدے ما شھید ڈاکٹر منان ءِ نُھمی شھیدی سالروچ ءِ درگت ءَ آئی ءَ گیرکار ایں گڑا سراں جھل کن ایں گڑا آئی ءِ دیمونی مارا ھما دمان ءِ یات ءَ پرین ایت وھدے پاکستانی لشکر ءَ مستونگ ءَ آئی ءَ گوں چار ھمبلانی ھواری ءَ شھید کُرتگ اَت۔ ریاست ءَ ھمے گُمان کُرتگ اَت کہ ڈاکٹر منان ءُ آئی ءِ ھمبلانی ھوناں ریچ ایت ءُ مئے جُھد ءَ نزور کنت بلے آئی نہ زانت کہ بلوچ راجی جُھد ءِ بنیاد چہ شھیدانی ھوناں گیش مھکم بیت، نزور نہ بیت۔
ھلیل بلوچ ءَ گْوشتگ کہ ڈاکٹر منان پہ من بس یک سیاسی ھمبلے نہ بیتگ،منی برات،دوست ءُ یک ھنچیں سروکے بیتگ کہ چہ آئی ءِ زانت ءُ زانوگری ءَ گل ءَ بدتریں جنجالاں مھکم بیگ ءِ سکین داتگ۔گوں آئی ءَ گْوستگیں ھمک دمان،گل ءِ تھی جیڑھانی سر ءَ آئی ءِ کارشونی ءُ پہ بلوچ راجی جُھد ءَ آئی ءِ گرانبھائیں مھمکی منی سسا ءِ تہ ءَ مدام تاجگ بنت۔آئی ءِ شھیدی ءَ منا ءُ ھر بلوچ پُسگ کہ وتی سرڈگار ءِ واب ءَ گند ایت،گیش مھکم کُرتگ۔
آئی ءَ گْوشتگ کہ ڈاکٹر منان ءِ واھگ یک آجو،وتواک ءُ دیمروئی کنوکیں بلوچستان بیتگ،کہ اود ءَ زور ءُ زوراکی ءِ ھچ نام ءُ نشان مہ بیت،اود ءَ مردمگری،برابری ءُ انساپ بہ بیت، ڈاکٹر منان نہ ایوک ءَ یک سوھویں سروکے بیتگ بلکیں یک سیاسی زانت ءُ زانوگرے بیتگ کہ ھر پیسلہ کنگ ءَ پیش آئی راجی مول ءُ مُراد دیم ءَ آؤرتگ اَنت۔آئی ءِ شھیدی ءَ مئے جُھد تیز کُرتگ ءُ اے اے مھمکمی داتگ کہ ما مرچی ھمائی ءِ لیکہ ءِ بنیاد ءَ وتی راہ ءِ راھی ئیں۔
ھلیل بلوچ ءَ گْوشتگ کہ شھید ڈاکٹر منان زندگ اِنت،چے ءَ کہ آ یک لیکھے بیتگ ءُ لیکہ کشگ نہ بنت۔ من بلوچ راج، بی این ایم ءِ ھمبل ءُ گوں بلوچ راجی جھدکاراں دزبندی کناں کہ آ ڈاکٹر منان ءِ شھیدی ءَ گوں یک باوپائیں کولے ءَ مَٹ بہ کن اَنت۔پہ ما ھژدری اِنت کہ آئی ءِ ناسرجم بیتگیں واب ءِ راست کنگ ءَ پہ ھر وڑیں دیمونی دیگ ءَ جاڑی بہ بیں، چے ءَ کہ اے سپر ایوک ءَ یک پدریچے ءِ نہ اِنت بلکیں آؤکیں پدریچانی ھستی ءُ پجار ءِ مانزمان اِنت۔
