شال: پہ بیگواھیں مردمانی پد جنگ ءَ شدکشیں زھرشانی گدان ءَ 5714 روچ سرجم بیتگ، چارشمبے ءِ روچ ءَ جمائت اسلا می ءِ بلوچستان ءِ سروک ملا ھدایت الرھمان ءُ آدگہ مردم پہ ھمدردی درشان کنگ ءَ گدان ءَ اتکگ اَنت۔
وی بی ایم پی ءِ کمک سرکماش ماما کدیر گوں مردماں تران کرتگ ءُ گوشتگ کہ مکران، جھالاون ءُ سراوان ءَ پاکستانی لشکر بازیں کچے ءَ گوں جنگی ساز ءُ ساماناں اتکگ کہ سرجمیں بلوچستان ءَ لشکر کشی ءِ گمان اِنت۔
آئی ءَ گوشتگ کہ گوستگیں روچ ءَ پانزہ بس، ٹرک ءُ لینڈ کروزر گاڑیانی سر ءَ بازیں کچے ءَ پاکستانی لشکر تربت ءَ سر بیتگ۔ ھمے وڑ ءَ کلات ءَ ھم پاکستانی لشکر ءِ تر ءُ گرد گیش بیتگ ۔
ماما کدیر گوشتگ کہ سرجمیں بلوچستان ءَ بازیں کچے ءَ پہ لشکر کشی ءَ چن ءُ لانچ کنگ بیتگ، پاکستانی لشکر ءِ انچوکیں کچ سیمسر ءَ بنجلانی تہ ءَ نیست انچو بلوچستان ءِ دمکانی تہ ءَ نشتگ۔ پاکستان بلوچ چکچینی ءَ تیز کنگ ءُ بلوچ سرڈگار ءِ سر ءَ بلوچانی وتواکی ءَ پلگ لوٹ ایت۔
