شال : پہ زور بیگواھیں مردمانی پد جنگ ءَ وی بی ایم پی ءِ شدکشیں زھرشانی گدان ءَ 5713 روچ سرجم بیتگ۔ سے شمبے ءِ روچ ءَ بی ایس او ءِ پیشیگیں سرکماش مھراب مری ءُ آدگہ مردم پہ ھمدردری درشان کنگ ءَ گدان اتکگ اَنت۔
وی بی ایم پی ءِ کمک سرکما ش ماما کدیر گوں مردماں تران کرتگ ءُ گوشتگ کہ بلوچستانءَ زوریں بیگواھی ءِ درچ برجاہ اِنت، ھمک روچ مردم زور بیگواہ کنگ بوگ ءَ اَنت۔ اسلامی ریاست گوشوکیں ڈیھ پاکستانءِ سرکار بلوچانی سر ءَ زوراکی کنگ ءَ اِنت۔
آئی ءَگوشتگ کہ بلوچستان ءَ زوریں بیگواھی ءِ جیڑہ نہ تیوک ءَ ریاست بلکیں پہ سرجمیں سیاسی نزام ءُ سیاسی ٹولیاں یک گرانیں جاورے۔ زوریں بیگواھیءَ سرجمیں چاگرد جنجال کرتگ۔
ماما کدیر گوشتگ کہ زوریں بیگواھیانی بگیری ءَ وی بی ایم پی ءِ زھرشانی برجاہ اِنت، چہ زوراکیانی بگیریءَ جھد ءَ دزکش نہ باںءُ اے وھد ءِ سرکار ءِ زوراکی ءُ انسانی ھکانی بگیری ءَ دست دارگ لوٹ ایت۔
