دالبندین: بلوچ یکجھتی کمیٹی ءِ سروک ڈاکٹر ماہ پہ راجی مچی ءِ دارگ ءَ ریاستی زوراکیانی بابت ءَ وتی شنگ کرتگیں کرتگیں توار بندے ءَ گوشتگ کہ 25 جنوری ءَ دالبندین ءَ بلوچ چکچینی ءِ بگیری ءَ بلوچ یکجھتی کمیٹی ءِ نیمگ ءَ راجی مچی یے برجم دارگ بوگ ءَ اِنت۔ ما وھدے کہ دالندین ءَ سر بیتگیں گوں مئے سر بوگ ءَ ھوار پاکستانی لشکر ءِ مزنیں کاروانے آرگ بیتگ ءُ چہ ایشی ءَ ابید پولیس ھم مزنیں کچے ءَ آرگ بیتگ ۔
آئی ءَ گوشتگ کہ چہ بلوچستان ءِ بازیں ھنداں کاروان آھگ ءَ اَنت آدارگ بوگ ءَ اَنت ءُ ھمے گوشگ ءَ اِنت کہ ما شمارا موکل نہ دے ایں۔ پاکستانی لشکر ءِ مردماں سرجمیں شپ دالبندین ءَ پنتاک بھر ءُ بانگ کرتگ ءُ گس گس ءَ شتگ ءُ مردمان ءَ بیھار داتگ کہ 25 جنوری ءَ راجی مچی ءَ بھر مزور اِت۔
اے بابت ءَ آئی ءَ ماں چاگردی رسانکدر ( ایکس ) ءَ گوشتگ که دالبندین ءَ ھوار کش ءُ گور ءِ ھنداں دامگ بند کنگ بیتگ که اِے کارپد مردمانی توار ءِ دارگ ءُ انسانی ھکانی پادمال کنگ اِنت۔
آئی ءَ گوشتگ که اِے نوکیں گپے نه اِنت چی ءَ که گوادر ءِ راجی مچی ءِ وھد ءَ ھم سرکار ءَ دامگ بند کرتگ ءُ راجی مچی ءَ بھر زوروکیں مردم آزار داتگ اَنت. ما چه اِے گپ ءَ سکا پریشان اِیں که سرکار دالبندین ءَ راجی مچی ءِ وھد ءَ ھم بی وائی سی ءِ کارکن ءُ بھر زیروکیں مردماں نشانگ مہ کنت۔
ڈاکٹر مھرنگ ءَ گوں انسانی ھکانی ادراھاں لوٹ کرتگ که دالبندین ءَ دامگ ءِ بند کنگ ءُ پہ سرکار ءِ زوراکیانی دیم ءِ دارگ ءَ گامگیج بہ زور اَنت۔
