(زرمبش رپورٹ)
بلوچ اسٹوڈنس ایکشن کمیٹی کہ 2009 ءَ جوڑ بیتگ، گوستگیں شانزہ سال اِنت کہ چہ وتی گل ءِ کارشونیءُ کارانی سوب ءَ چہ بلوچستان ءِ درسیں گلاں مستریں گل جوڑ بیتگ۔ اے گل ءِ راجدپتر ،جھد ءُ زانت ءُ زانگ ءِ دیمروئی دیگ ءِ ماڑی اِنت۔ تیوک ءَ کتاب کاروان ءِ ربیت کہ جتائیں وھداں بلوچستان ءِ جتائیں شھرانی تہ ءَ برجاہ بیتگ اَنت یک گھتریں کارے۔
انوگیں روچاں بلوچ اسٹوڈنس ایکشن کمیٹی ءَ بلوچستان ءَ ھوار کراچی ءَ پہ کتاب کاروان ءَ نوکیں درچے بندات کرتگ۔ ایشی تہ ءَ جتائیں شھراں کتابی اسٹال جنگ بیتگ۔ اے درگت ءَ چہ ریاستی ادارھانی نیمگ ءَ پہ اے کردی جھد ءِ دارگ ءَ تچکی ءَ جھد کنگ بوگ ءَاِنت۔ نسیر آباد ءَنودربر ترسینگ بیتگ اَنت ءُ گوادر ءَ جنگ بیتگیں کتاب اسٹال ءِ سر ءَ پولیس ءَ بازیں کچے ءَ ارش کرتگ، نودربر ترسینتگ اَنت ءُ گوں کتاباں ھوار زندان ءَ بندیگ کرتگ اَنت۔ اے کار یک ٹوھیں دژمنی یے زانگ بیت۔
بلوچستان ھما دمگ اِنت کہ ریاست ءِ سروکی ءَ کشت ءُ کوش، نشتہ ءِ کاچاکی ءُ آدگہ چاگردی سلکاری تچکی ءَ بوگ ءَ اَنت۔ دومی نیمگ ءَزانت ءُ زانگ ءِ دیمروئی دیگ ءَ کار کنوکیں نودربر زوریں بیگواھیانی دیمپانی ءَ کنگ ءَ اَنت ءُ گیشتر آیانی ژانگولیں لاش چگل دیگ بنت۔ ریاست ءِ چیردستیں کشندہ ٹولی نہ تیوک ءَ مردماں ترسینگ ءَ اِنت بلکیں نشہ بھا کنوکاں کمک کنگ ءَ اِنت دانکہ بلوچ چاگرد گیشتر تباہ بہ بیت۔
کتاب یک انچیں توانے کہ زانت ءُ زانگ ءَ گیش کنت، ءُ کتابانی سر ءَ پابندی یا بھا کنگ ءِ دیم ءَ اڑاند ودی کنگ چاگرد دژمنی یے۔ بلوچ اسٹوڈنس ایکشن کمیٹی ءِ جھد پہ بلوچ راج ءَ زانت ءُ زانگ ءِ زندگ دارگ ءَ چیدگے۔ ریاست نیمگءَ کتاب کاروان ءِ دارگ ءِ جھد زانت ءُ زانگ ءِ سر ءَ بندش جنگ اِنت۔ ایشی ءَ چنچو ایر بہ جن ئے کم اِنت۔
بلوچ اسٹوڈنٹس ایکشن کمیٹی مدام کتاب ءُ زانت ءِ زور ءِ سر ءَ سدک اِنت ءُ اے جھد ءَ ھمے پیش داشتگ کہ زانت ءُ زانگ ءِ ناشرکاریں دژمن چنچو ترس آماچ اِنت۔ بلے کتاب ءِ رژنائی گوں زمزیلاں بندگ نہ بیت۔
