شال: پہ زور بیگواھیں مردمانی پد جنگءَ شدکشیں زھرشانی گدان ءَ 5706 روچ سرجم بیتگ۔ سے شمبے ءِ روچ ءَ بی وائی سی ءِ سروک ڈاکٹر ماہ رنگ وی بی ایم پی ءِ گدان ءَ اتکگ ءُ وی بی ایم پی ءِ کمک سرکماش ماما کدیر ءِ گوشتگ کہ 25 جنوری ءَ دالبندین ءَ بہ اوکیں راجی مچی ءَ بیا۔ ماما کدیر راجی مچی ءِ پلہ مرزی کرتگ۔
ما ما کدیر گوں مردماں تران کرتگ ءُ گوشتگ کہ بلوچستانءَ بلوچ راج چہ درسیں ھکاں زبھر کنگ بیتگ۔ مرچی گوادرءَ بساک ءِ نیمگ ءَ پہ زھگاں کتاب اسٹال جنگ بیتگ نودر گوں کتاباں دزگیر کنگ ءُ زندانی کنگ بیتگ اَنت۔ نوں کتاب بھا کنگ ءِ سر ءَ ھم پابندی جنگ بیتگ۔
آئی ءَ گوشتگ کہ اے کتاب پاکستان ءِ تہ ءَ چاپ ءُ شنگ بنت، سرجمیں ڈیھ ءِکتابی دکاناں بھا ھم بوگ ءَ اَنت۔ اگاں اے کتابانی سر ءَ پابندی جنگ بیت گڑا نودرانی سر ءَ زوراکی کنگ ءِ جاہ ءَ چاپ ءُ شنگکاری ادارھانی سر ءَ پابندی جنگ بہ بیت۔
ماما کدیر گوشتگ کہ بلوچستان ءَ زوراکی برجاہ اِنت ھزارانی کچ ءَ مردم زور بیگواہ کنگ بیتگ اَنت۔ مردم کشگ ءُ مچی مانشاں کل کنگ بوگ ءَ اَنت۔ چہ توتک ءَ مچی مانش ءِ دزکپگ ءَ ھمے گپ جھان ءَ را پیش داشتگ کہ اد ءَ زوراکیانی کسہ ھم کبر کنگ بیتگ اَنت۔
