ماشکیل: نوہ سال پیش زورگریں پاکستانی لشکر ءِ دست ءَ زور بیگواہ کنگ بیتگیں وزیر اھمد ریکی ءِ کھول ءَ چہ مردمانی ھکانی ادارھاں پہ آئی ءِ آجوئی ءَ توار چست کنگ ءِ لوٹ کرتگ۔
کھول ءِ گوشگ اِنت کہ وزیر اھمد ء ھاجی شپی مھمد ریکی ءُ آئی مستریں برات کبیر اھمد ریکی 3 مارچ 2015 ءَ شپ ءِ سے ءَچہ گس ءَ پاکستانی چیریں ادارھانی کارمنداں آوار جتگ ءُ بیگواہ کرتگ اَنت۔ کبیر اھمد ریکی 2019 ءَ یل کنگ بیتگ ءُ وزیر اھمد ریکی انگت بیگواہ اِنت۔
آئی ءَ گوشتگ کہ وزیر اھمد ءِ زوریں بیگواھی ءَ دہ سال سرجم بوگ ءَ اِنت انگت ءَ آئی ھچ وڑیں ھال نیست۔ ما نزانیں کہ وزیر اھمد چون ءُ کج ءَ اِنت۔
کھول ءَ گوشتگ کہ ما گوں بلوچ راج ءُ میان استمانی مردمی ھکانی ادارھاں ھوار درسیں بھرگاں سیادی داروکیں مردمانی گون ءَ لوٹ کن ایں کہ پہ وزیر اھمد ریکی ءِ آجوئی ءَ توار چست بہ کن اَنت۔
