نبشتہ کار: قاضی داد محمد ریحان
سال 2022 ءَ بلوچ راجی زْرمبشت ( بی این ایم) ءِ یازدھمی راجمان پتر بوت ءُ نوکیں اگدہ دار گچین بوت اَنت۔ اے تیوک ءَ پہ بی این ایم ءَ نوکیں گامے نہ اَت بلکیں ماں بلوچ سیاست ءِ گْوست ءَ ھم مزنیں گلانی تہ ءَ راھشونانی مٹ بیگ ءِ درور سک کم اِنت۔
کسے کہ گلے ءِ کماشے ءِ اگدہ ءَ سر بہ بیت گڑا داں کہ ھست آ چہ ھمے اگدہ ءَ جھل تر روگ ءَ ساڑی نہ بیت، آئی ءِ کار ءُ کرد ھرچی بہ بی اَنت۔
بلے بی این ایم ءِ باسک ءُ جھدکاراں اے ربیدگ پروشت ءُ نوکیں دودے ایر کرت کہ راجمستری ءِ منوکیں گلانی تہ ءَ اگدہ پہ مدامی نہ اَنت۔
بلے گْوستگیں چاریں سال ھرچ وڑ ءَ پہ بی این ایم ءَ آسان نہ بیتگ اَنت، دمگ ءِ جاوراں بی این ایم ءِ کارانی سر ءَ سان اشتگ ءُ گام کنٹ کرتگ اَنت ۔ بلے اگاں گل ءِ کارکردگی چارگ بہ بیت، دیمروئی ءُ سوبمندی چہ اے اڑانداں پد ھم سھرائیں رنگے ءَ ھست اَنت۔ اے ھما شونداتانی برورد اِنت کہ بی این ایم ءَ اے میان ءَ جوڑ کرتگ اَنت ءُ بی این ایم ءِ درسیں تک ءُ ھنکیناں آیانی سر ءَ گوں دلجمی ءَ کار کرت۔
منی وش بھتی اِنت کہ من چہ 2008 ءِ راجمان پتر ءَ پد جاہ ء ایش کہ کمتریں باریگے ءَ کابینہ ءَ گون بیتگ آں (درسی 18 سالانی تہ ءَ چہ 5 سال ءَ کم من کابینہ ءَ گون بیتگ آں) پد ءَ ھم بی این ایم ءِ بنجاھی کارانی تہ ءَ چیدگیں رنگے ءَ بھر زرت، من ءَ شر یات اِنت ءُ سما اِنت کہ 2008 ءِ بی این ایم ءِ راجمان پتر ءَ بی این ایم وتی بن شون ءُ کارانی باندات ءَ چہ گْوست ءِ بی این ایم ءَ چینکس دیم ءَ برت۔
اے ھما پتر اَت کہ ما وتی آئین ءِ تہ ءَ ‘ وتواجھی ‘ ءِ لوٹ در کرت ءُ تچک ءَ ‘ بلوچستان ءِ آجوئی ‘ ھوار کرت۔ اے انچیں گپے کہ دنیگت ھم ماں جھانی پتر ءَ ایشی ءِ جنگ ءُ گْوشگ آسان نہ اِنت۔ گچینی نام گپتیں راجانی سنت ایشی ءَ پرشت ءُ پروش لیک ایت۔
ھمے پیم جھان نیشنل ازم ءِ راستیں پجار ءِ منگ ءُ ایر برگ ءَ دنیگت ساڑی نہ اِنت بلے ما ھمے شور کرتگ کہ ما چہ وتی سیاسی دید ءُ لوٹاں نیم گام ھم پدکنز نہ بی ایں۔
بی این ایم ءِ ھمک راجمان پتر بلوچ زْرمبشت ءِ دیمروئی ءَ چیدگے ءِ درور اِنت چوش کہ سال 2014 ءَ بی این ایم ءِ راجمان پتر ءَ اے گپ منگ بوت کہ مئے کارسیم رودرتکی بلوچستان اِنت، دنیگت ھچ بلوچ گل آ جاہ ءَ سر نہ بیتگ کہ سیاسی رنگ ءَ مزنیں بلوچستان ءِ لوٹ ءَ بہ کنت۔اے وڑیں ناپھتوئیں لوٹ بلوچ زرمبشت ءَ تاوان دنت ءُ بلوچ ھرچ نیمگ ءَ لٹانی دیمپان بیت ءُ پہ آئی ءَ وتی زندگ دارگ گْران بیت۔ ھمے شوندات ءِ بنیاد ءُ برورد ءَ دیم تر ءَ ھمک بلوچ گل ءَ پہ وتی مانشت ءَ مزنیں کمکے رس اِت۔ ھمے سال ءَ بی این ایم ءَ دری کارانی کارگشاد ءِ اگدہ ‘ کابینہ ‘ ءِ بھر کرت کہ انی بی این ایم ءِ پیش گام تریں اگدہ اِنت۔
چہ درساں گیش سال 2022 ءَ گل گوں نوکیں نشانگ ءُ دیداں دیم ءَ جز اِت ۔ یازدھمی راجمان پتر ءِ گل ءِ گْوست ءِ تہ ءَ سھرائیں کردے ایش اِنت کہ گل ءِ آئین ءِ تہ ءَ مزنیں رنگے ءَ مٹی آرگ بوت۔ داں سردانک ءَ بہ گر گل ءِ کیام ( اسٹرکچر) مٹ کنگ بوت اَنت۔
مردمی اگبالانی کارگشاد ءِ اگدہ گیش کنگ بوت، کمک سرکماش ءُ کمک سرکارگشاداں آئینی ڈبو دیگ بوت ءُ ھمک کارگشاد پابند کنگ بوت کہ آ وتی کارانی دیم ءَ برگ ءَ ادارہ بہ ٹاھین ایت۔
مزدور ءُ دریا وردی تک ءِ کارگشاد ءِ اگدہ ءِ نام مٹ کنگ ءُ گھبودی کارگشاد ایر کنگ بوت داں کہ زند ءُ چاگرد ءِ گھبود ءَ ھم بی این ایم وتی ونڈ ءَ ھوار کرت بہ کنت۔
ھمے چاریں سالانی تہ ءَ بی این ایم ءِ مردمی اگبالانی تْرامگیج پانک، رسانک، ربیدگ ءُ دامگی تک، شھمیرانی تاک ( بلوچ شھمیرانی یاتگیجی پتر)، دری کارانی تک ءُ وانگ ءُ زانگی تک جوڑ بوت اَنت ءُ کارانی تہ ءَ گیشی اتک۔
اے میان ءَ تاکبند زرمبش کہ 2009 ءَ دیم شنگ نہ بیتگ اَت یک برے پد ءَ گوں دْرچ ءَ شنگ بوت۔ابید چہ تاکبند ءَ دھانی کچ ءَ کتاب ھم شنگ کنگ بوت۔
دومی نیمگ ءَ چاگردی رسانکدر ءَ ھم بی این ایم ءَ یازدہ زبانانی تہ ءَ وتی درشانانی شنگ کنگ بندات کرت۔ ھمے پیم اے میان ءَ تامر جوڑ کنگ ءُ شنگ کنگ ءِ سر ءَ ھم گچینی دلگوش دیگ بوت۔ بی این ایم ءِ مراگشانی سدانی کچ ءَ تامر ءُ ھزارانی کچ ءَ عکس شنگ ءُ تالان کنگ بوت اَنت۔
بی این ایم ءِ کار ءُ کردانی برورد ءَ مروچی نے ایوک ءَ بلوچ چاگرد ءِ تہ ءَ بی این ایم سھرائیں سیاسی گلے ءِ بستار ءَ زانگ بیت بلکیں دشمن ھم پہ بی این ایم ءِ دیم ءِ دارگ ءَ زور جنگ ءَ اِنت۔
گْورے بی این ایم ءِ راھشوناں تاوان دیگ ءِ کوشست کنگ بیگ ءَ اِنت ءُ دگہ نیمگے بی این ایم ءِ ھمک مراگش ءَ پیش پاکستان بی این ایم ءِ بگیری ءَ دروگ ءُ دْراش شنگ کنت۔ ھمک مزنیں مراگشاں پیش بی این ایم ءِ رسانک ءِ سر ءَ سائبر ارش بیت، بی این ایم ءِ تندجاہ ءُ چاگردی رسانک در ءِ اکاؤنٹ بند کنگ بی اَنت۔ اے چاریں سالاں ما دھاں بر ءَ چوشیں سائبر ارشانیدیمپانی کرتگ ۔ مئے سدانی کچ ءَ تامر ءُ عکس چہ دامگ ءَ گار کنگ بوت اَنت کہ انیگیں اے آئی ءِ زمانگ ءَ پہ ما سکا مزنیں تاوانے۔ ایشانی بیگ پہ جھان ءِ مردماں بلوچ ءِ زْرمبشت ءِ سرپد بیگ ءَ مزنیں کمکے۔ ایشاں پد ءَ اپلوڈ کنگ پہ ما سکا مزنیں کارے پرچا کہ اے مئے یکیں روچ یا ماھے ءِ کار نہ بیتگ اَنت۔
ھمے وڑ ءَ دشمن ءَ مئے کھولانی سر ءَ ھم زور داتگ داں کہ مارا نزور بہ کنت۔ بی این ایم ءِ سرکماش واجہ ڈاکٹر نسیم ءِ پت ءُ دو ناکو پاکستان ءَ زور بیگواہ کرتگ اَنت ءُ ڈک ایر کرتگ کہ داں ڈاکٹرنسیم واتر نہ کنت ایش یلہ دیگ نہ بی اَنت۔ ساریا ھم ڈاکٹرنسیم ءِ نزیکیں سیاد ءُ کس تیوک ءَ ھمے بنیاد ءَ زوربیگواہ کنگ ءُ کشگ بیتگ اَنت کہ چیئرمین نسیم ءِ سیاد اَنت۔ داں بلوچ زْرمبشت ءِ تہ ءَ آئی ءِ کرد ءُ کارانی دیم دارگ بہ بیت۔
شما گوگل ءَ ‘ بی این ایم ‘ ءِ نام ءَ ھرچ زندگیں زبانے ءَ سرچ بہ کن ءُ بہ چار اِت سدانی کچ ءَ نبشتانک ءُ ھال شمئے دیم ءَ کئیت ءُ ھمے پیم دشمن ءِ درشان ءُ گپ ھم کہ بی این ایم ءَ ایرجنگ ءَ اِنت۔
بی این ایم ءِ توار ءِ برپشت ءَ پاکستان جھان ءِ جتائیں کنڈ ءَ بے وار اِنت ءُ ناچار اِنت کہ وتی کرتگیں کارانی پسواں بہ دنت۔ ابید چہ ایشی ءَ کہ ما شر زان ایں مروچیگیں جھان ءَ مردمی اگبال ءُ راستی ءِ پلہ مرزی ءَ گیش ھرکس وتی سیتاں چار ایت۔ عاصم منیر ءُ ٹرمپ ءِ سنگتے ءِ درور ءَ جھانی رسانک ھم دنت کہ ھردو یک دومی ءِ دردواریں سنگت ءُ بیل اَنت۔ پد ءَ ھم بی این ایم ءِ سرگرمیاں پاکستان ءِ واکدار تکانسر کرتگ اَنت پمیشکا آ وتی نیادانی تہ ءَ انچوش سرمچاراں وتی دشمن نامین اَنت ھمے پیم بی این ایم ءِ باسک ءُ راھشوناں ھم۔
مئے بیل ءُ ھمبل چوش کہ چیئرمین ڈاکٹر نسیم، بنجاھی پتر ءِ باسک سفیر ءُ پانک ءِ رسانکی راھوتکار جمال ءُ من چیزے مردم ایں کہ پاکستان ءَ سھرائیں رنگے ءَ مئے نام گپتگ ءُ مارا ناشرکار لیک اتگ بلے وتی چیریں نیاداں دشمن بی این ایم ءِ ھمک باسک ءَ وتی مستریں دشمنانی لڑ ءَ گون کنت۔
اے پہ ما بژنی گپے نہ اِنت مزنیں سوبمندی یے، اے مئے واھگ اَت کہ ما دژمن ءِ چمانی کنٹگ بہ بی این ءُ اگاں ھمے وڑ اِنت پہ ما چد ءُ وش تر ءُ تاھیر دیوکیں گپے نہ بیت۔
نی ما گامے دیم تر ایر کنگ ءَ ساڑی ایں، اے سال مئے دوازدھمی راجمان پتر ءِ سال اِنت۔ مروچی بی این ایم تیوک ءَ بلوچ گلزمین ءَ نہ اِنت بلکیں جھان ءِ ھمک کنڈ ءَ بی این ایم ءِ باسک تالان اَنت ۔ھچ چوشیں دمگے پشت نہ کپتگ کہ بلوچے بہ بیت ءُ آ اود ءَ بی این ایم ءِ باسک ءُ دوزواہ مہ بیت۔ دمگ ءِ جاور ءُ ایران ءِ جنگ ءَ انچیں جاورے ودی کرتگ کہ سرجمیں جھان سانمند اِنت ءُ ما چد ءُ گیش کہ نزیک تر ءَ ایں۔ آ ھم انچیں وھدے کہ مئے راجمان پتر ءِ روچ نزیک اَنت۔
بلے انچوش کہ ما مدام کوشست کرتگ ھرچ وڑیں جاورانی تہ ءَ وتی کاراں برجاہ بہ دار ایں، راھے کہ گٹ بیت پہ وت نوکیں ڈک ءُ در شوھاز بہ کن ایں۔ اے بری ھم ما ھرچ وڑیں جاورے ءِ دیمپانی کنگ ءَ گوں غلام محمدی باھند ءَ ساڑی ایں۔
انچوش کہ واجہ شھمیر صبادشتیاری ءِ دید اَت کہ واب گندگ لوٹ ایت، ھمے وڑ من مدام نوکی ءُ نوکازی ءِ منوک آن ءُ انیگیں باریگ ءَ چد ءُ گیش نوکی پکار اِنت۔
وتی کارانی رد ءَ کہ من ءَ رسانک ءِ زمہ واری گون اِنت من کوشست کرتگ کہ چیزاں نوک بہ کن ایں، اے کوشست داں منی واھگاں سوبمند نہ بیتگ اَنت بلے من دیم ءَ روگ ءِ کشک گیشینتگ۔ ھرچ نوکیں آسراتی مئے دزرس ءَ بیتگ ما کارمرد کرتگ۔
بلے ما انگت جاھے ءَ سر نہ این ءُ گپ ایش اِنت کہ آیوکیں چار سال ءِ تہ ءَ جھان ءِ ھمک زانشت ءُ کار ءِ وڑ مٹ بیت۔ ما کہ اے زند ءَ ھرچی در برتگ ءُ زان ایں اگاں ما وت ءَ نوک مہ کن ایں، مئے درد ءَ نہ ور اَنت۔
بلوچ ءِ جنگ ءِ رنگ ءَ وت ءَ نوک کنگی اِنت۔ بلوچ سیاست ھم درسیں کْوھنگاں بہ لگوش ایت ءُ وت ءَ نوک بہ کنت۔ اگاں مئے تہ ءَ کسے نوکی ءِ منگ ءُ زیرگ ءَ ساڑی نہ اِنت باید آ وت چہ کارانی کماشی ءُ مستری ءَ یک کر بہ بیت داں نوک بیتگیں سنچے اگدھاں دست بہ گپت۔ مارا انچیں راھشون پکار ایں کہ نوکیں جھان ءِ تہ ءَ بلوچ راجی زْرمبشت ( بی این ایم) ءَ گوں نوکیں آسراتی ءُ زانشتاں دیم ءَ بہ بارت ءُ سوبمند بہ کنت۔
بی این ایم ءِ یازدھمی راجمان پتر مدام مزنیں چیدگے ءِ رنگ ءَ یات کنگ بیت بلے دوازدھمی راجمان پتر ھما درسیں نزوری ءُ ردیاں بہ ٹپاس ایت ءُ بہ چار ایت کہ ما پہ نازانتی اے چاریں سالانی تہ ءَ کرتگ اَنت ءُ ھمے مئے شریاں گچین بہ کنت داں آیوکیں سالاں ھمے شری گھتریں کارانی دْروشم ءَ ردوم بہ زیر اَنت۔
مئے واب ، واھگ ءُ ڈبو اِنت کہ بی این ایم ءِ سفر ھما آشوبیں لیکھانی سر ءَ دیم ءَ بہ روت کہ شھمیر فدا احمد ءَ واب دیستگ اَت۔ بی این ایم ھما بی این ایم بہ بیت کہ شھمیر واجہ غلام محمد ءِ لوٹ اَت۔ ما وتی وس ءَ ھرچی کہ اے چاریں سالاں کرت کرتگ ما کرتگ۔ نی مئے راجمان پتر ءِ جھدکاریں باسکانی باریگ اِنت کہ مئے کارکردگیءَ ھم شرگداری بہ کن اَنت ءُ پہ آیوکیں چاریں سالاں مئے راھشونی ھم بہ کن اَنت۔
ما پہ راجمان پتر ءِ نیاد ءَ ساڑی ایں۔ بی این ایم ھما وابانی پیلو کنگ ءَ دیم ءَ جز ایت کہ مئے شمئے آگاھیں چماں دیستگ اَنت۔ من چہ بلوچ راج ءَ ھم لوٹ آں، چہ نبشتہ کاراں، چہ جھدکاراں ءُ چہ دگہ راجدوستیں گلانی سیاسی کارکناں کہ مئے کارانی سر ءَ چمشانک بی دے اَنت، شرگداری ءُ ایراد بہ گر اَنت۔ داں ما وتی آیوکیں راجمان پتر ءَ وتی شریاں برجاہ داشت ءُ نزوریاں دیر کرت بہ کن ایں۔
