آرٹ ءُ بُرکا پوش

نبشتہ کار: جابر گلام

آئی ءَ گْوشتگ اَت تو کہ گیشّ اِت ئے گڑا منی کوٹی ءَ سرے بہ جن۔ چار ساھت ءَ رند منی دل ءَ اتکگ اَت کہ برو بلکن ءَ آئی ءَ پہ گندوکی نہ گْوشتگ ءُ دگہ کارے بیت ئے۔

من چہ پدیانکاں (سیڑیاں) بُرزاد بوتاں تہ ھمے ھیال ءَ کہ چی کارے بیت کنتے کہ من ءَ توار پر کتگے ءُ بے ھیالی ءَ کوٹی ءِ در ءِ ٹُکگ ءَ ابئد دست جت کہ پچ بوت۔

پچیں دریگ ءَ چہ تیوگیں میتگ درا اَت ءُ دریگ ءِ دپ ءَ آئی ءَ جنکی آرٹے جوڑ کتگ اَت کہ یک بُرکا پوشیں جنکے اَت ءُ آ جھد کنگ ءَ اَت بُرکا ءَ کمے پراہ ءُ دْراج بہ کنت کہ آئی آرٹ ءِ سبجکٹ سرجم نہ اَت۔

من کہ وتی چمانی زوم کمتر کت تہ آ وت جاندْری ءَ اُوشتاگ اَت ءُ بے اِنان وتی اکس ءَ چارگ ءَ اَت۔ جاندریں جِنّکے، بُرکا پوشیں جنّکی اکسے جوڑ کنگ ءَ اِنت ءُ دریگ ءَ میتگ درا اِنت۔

گناہ گاریں چماں اَجبیں آرٹے کبل کت، ھیرانی ءُ ابکّھی ءَ چہ مشکلے در اتکاں ءُ زوت پشومانی ءُ ملامتی ءِ آماچ بوت آں۔

وڑ ءُ ڈول، دود ءُ دودمان ءُ ڈسپلیں ءِ دیم ءَ  نگاھانی چارگ ءِ تلب ءُ دل ءِ واھگ کمتر سما کت اَنت۔ ھاموشی ءَ دُرست ھما کوٹی ءِ تہ ءَ ھما ھال ءَ یلہ دات ءُ بے تواری ءَ ڈن ءَ در اتک آں۔

وت ءَ ملامت کت نہ کت ءُ آئی جیڑگانی نیام ءَ بے تواری یے زیبا ات ءُ برجاہ بوَگی اَت، گڑا وتی درآھگ وشتر سما کت۔ دل ءَ رپینگ ءَ کہ وت ءَ ملامت مکن، آئی ءَ سما نہ بوتگ ءُ تو گپ ایر برت کن ئے۔

بلے ھمے اَکس! جاندریں جنکے کہ پشت ءِ پِریں ءُ جنکی بُرکا پوشیں اکس ءِ جوڑ کنگ ءَ اِنت ءُ دریگ ءَ چہ دراھیں میتگ زاھر اِنت۔۔۔۔۔۔۔۔