نبشتہ کار: درکشان بلوچ
دلگوش: اے نبشتانک ءِ تہ ءَ شکاری سرمچار شھید جاوید بلوچ ءِ درکسانی ءِ سنگت ءُ ھمراہ شھید ھمید بلوچ ءُ ایدگہ نزیکیں سنگتانی گپّ ءُ تران ھوار اَنت۔
بلوچ ءِ راجدپتر سک کْوھن اَنت ءُ ھر وھد ءَ بلوچ بامرداں راجدپتر نوک کرتگ۔
مدام بلوچ پُسّگاں پہ ماتیں گلزمین ءَ وتی سر ءُ ساہ ندْر کرتگ اَنت۔ پہ راجی پجّار ءُ زبان ءُ بلوچستان ءِ آجوئی ءِ واستا وت ءَ ندْر کرتگ۔ ھمے کارستانی تہ ءَ شھید شکاری جاوید مزار ھم یک انچیں کارستے کہ آئی ءِ زند ءِ ھر تک ءُ پھنات آشوبی جنگانی کسھاں کار اَنت۔ شھید شکاری جاوید ءَ وتی اھد ءِ ھمک زوراکیانی بگیری ءَ گھگیری کرتگ ءُ بلوچستان ءِ آجوئی آئی ایمان ءِ مھکمیں بھرے بیتگ۔ آ نہ تھنا یک سرپد ءُ وانندھیں سیاسی ءُ گوریلہ سرمچارے بیتگ، بلکیں وتی چاگرد ءَ وش گپّ ءُ دلبریں انسانے بیتگ۔ نمیرانیں جاوید بلوچ ءِ پکر ءُ پلسپہ، آئی دْراجکشّیں آجوئی ءِ جھد ءُ آئی ءِ داتگیں دیمونی پہ ھمک بلوچ پُسگ ءَ، پہ آیوکیں ھمک پدریچ ءَ یک رژنائیں ءُ رھشونیں کتابے۔
شکاری جاوید بلوچ پنّام ء آسپ بلوچ بلوچستان ءِ دمگ مکُران دشت جان مھمد بازار ءَ 1988 ءَ چہ رند ٹکّ ءَ واجہ مزار سُلتان شاہ ءُ امان بی بی ءِ لوگ ءَ ودی بیت۔ شکاری جاوید چار برات ءُ شش گْوھارانی دوستناکیں براتے بیت۔ جاوید بلوچ جان مھمد بازار ءِ پرائمری اسکول ءَ وتی وانگ ءَ بندات کنت ءُ پد ءَ جدید اسکول گوادر ءَ داں یازدہ کلاس ءَ در بارت۔ جاوید بلوچ ءِ سانگ 2011 ءَ چہ وتی سیاداں مگربی بلوچستان سرباز ھیت ءَ گوں بانک سپیا بلوچ ءَ بیت ءُ واجہ گپور رند ءِ زامات بیت، بلے شھید جاوید ءَ زھگ نہ بیت۔ نمیرانیں جاوید بلوچ دُرستاں چہ پیسر وتی چاگرد ءَ سان زیر اِیت۔ جاوید ءِ رُدوم، راجی جزبگ ءِ بندات چہ آئی ءِ میتگ ءَ چہ بیت۔ چوش کہ جان مھمد بازار سکّیں کْوھنیں بازارے کہ یک وھدے ( دلیکیم ) ءِ نام ءَ زانگ ءُ پجّارگ بیتگ۔ اے بازار مردم میارجلّی ءُ مھمانداری ءَ دائم زانگ ءُ پجّارگ بنت۔ دلیکیم ھمے واستا گْوشتگ اِش کہ اے بازار ءَ ھر وھد ءَ مردم باھوٹی ( پناہ ) ءِ واستا اتکگ اَنت ءُ اے مردماں میارجلّی کرتگ ءُ مردم جاہ داتگ انت۔ اے درگت ءَ ھمے گْوشتگ اِش: ” کہ اے بازار ءَ ھرکس کئیت، دل ءَ یکیم بہ بیت۔ “
جان مھمد بازار سیائجی ءِ کوہ ءُ دشت کَور ءِ گوریچانی نیمگ ءَ سرسبز ءُ مسکیں ڈگارانی واھند اِنت، ءُ زَرّیں بُگ ءُ زیارتی ، سوھی ءُ ڈلسر ءِ ھمساھگ اَنت۔ اے بازار ءِ مردمی آبادی ءِ شمار مئے کِرّ ءَ نیست، بلے من شھید جاوید ءِ نزیکیں ھمراہ ءُ سیاد شھید ھمید بلوچ ءَ جُست کرت ءُ آئی ءَ گْوشت:
” ما ھم چو نہ زان اِیں کہ اے بازار ءِ آبادی چنچُک اِنت، بلے من ءَ ھوش کنت مئے بازار ءَ اگاں یکّے ءَ پہ ھُداھی ھیراتے کرتگ گوکے کُشتگے گڑا سرجمیں بازار ءِ واستا 300 ونڈ گُوشت گیشّینگ ءُ بھر کنگ بیتگ۔ بِزاں ھر کھول ءَ پہ یک ونڈے۔ “
بِزاں 300 کھول ءِ کساس بازار اِنت، بلے اے ھما وھد ءِ کسّہ اِنت کہ مروچگ ءَ چہ 2004-2005 ءِ دھک اِنت۔
شھید ھمید ء حاجی ھسین، شھید جاوید ءِ وتیگ اَنت ءُ شھید گنی بلوچ ءِ مستریں برات اِنت۔ شھید ھمید 21 اکتوبر 2025 ءَ مگربی بلوچستان ءَ تیل کَشّیں گاڑی یے گون ءَ دشتیاری گواتر ءَ ایرانی گجر ءِ تیرانی آماچ بیت ءُ شھید بیت۔ شھید ھمید بلوچ ھم یک سیاسی ءُ وانندہ ءُ جوانیں سرمچارے بیت کہ جاوید ءِ مُدامی ھمراہ بیت۔ ھمید بلوچ بندات ءَ بی این ایم دشت ھنکین ءِ کارمستر (صدر) بیت ءُ پد ءَ وت ءُ شھید جاوید ھمسپر بنت ءُ گیشتر ھمراہ بنت۔ گُڈی وھد ءَ گیشتر وتی لوگ ءِ ناگیگیں جاورانی سبب ءَ کار ءُ گریبی کنت، بلے گُڈی ساہ ءَ داں بلوچستان ءِ آجوئی ءِ کاروان ءِ ھمراہ بیت ءُ بے دروریں انسانے بیت۔ ھمے ھاتر ءَ شھید ھمید ءِ نام بُزرگ بیتگ۔
2017 ءَ پاکستانی پوج سرجمیں دشت ءَ لشکرکشی کنت ءُ جان مھمد بازار ءَ ھم سرجم ءَ ھالیگ کنت ءُ دُرستیں مردماں لڈّینگ ءُ در پہ در کنگ ءَ لاچار کنت۔ مردم گیشتر گوادر، تربت ءُ مند ءُ مگربی بلوچستان ءَ لڈّ اَنت ءُ رو اَنت
داں مروچی گْوش اَنت کہ 20 کھول پد ءَ بازار ءَ واتر شُتگ، بلے جاور تنیگہ ھما وڑ اَنت۔ اے بازار 1998 ءِ سیلاب ءَ ھم سک تاوں داتگ ءُ سرجمیں بازار آپ ءَ بُک اِت ءُ بلائیں تاوانے اے بازار ءَ رس اِیت۔ 2007 ءَ ھم اے بازار چہ سیلاب ءَ تاوان وارت، بلے اے توپان ءِ سبب گیشتر پاکستانی سرکار بیت۔ اے سیلاب ءَ سرکار ءِ نیمگ ءَ چہ میرانی ڈیم ءِ گیٹ پچ کنگ بنت، ھمے سبب ءَ توپان ءِ زور گیشتر بیت ءُ یک بلائیں انسانی آبادی یے تاوان وارت۔ سرکاری ءُ در سرکاری رپورٹانی رد ءَ کیچ دمگ (ضلع کیچ )ءِ نیم آبادی توپان ءِ زد ءَ کپ اِیت۔ 250000 ھزار مردم ءُ 50 ھزار لوگ تاوانبار بیت، اے لڑ ءَ دشت جان مھمد بازار ھم گون بیت۔
اے جاورانی تہ ءَ شھید جاوید، شھید گنی ءُ شھید ھمید بلوچ رُد اَنت ءُ وڑ وڑیں جاوراں گند اَنت۔
شھید شکاری جاوید ءِ بابت ءَ آئی ءِ نزکیں سنگت رگام بلوچ گْوش اِیت:
“جاوید کسانی ءَ چہ سکیں شوکیں، وش گپ، ھُژار ءُ چِنکّیں ورنایے بیتگ۔ گوں ھرکس ءَ ھور گوں ھرکس ءَ مھروان ءُ ھمگوپگ بیتگ۔ گوں پِت ءَ مُدام ڈگاراں دھکانکاری ءَ بیتگ۔ ابرم ءَ رستگیں مردمے بیتگ۔ کِشارانی تہ ءَ دشت کَور ءُ سیائجی ءِ چیدگانی دیم ءَ جاوید مزن بیتگ ءُ رستگ۔ جاوید ءِ تہ ءَ بے کساس جوھر بیتگ، ءُ آ یک بے دروریں شکاری یے بیتگ۔ آ یک جوانیں اُوژناگرے ءُ دھکانکارے بیتگ ءُ آ یک وانندھیں سیاسی مردمے ءُ یک گوریلہ سرمچارے بیتگ۔ شکاری جاوید کساس بلوچستان ءِ سرجمیں جغرافی ءَ سرپد بیتگ ءُ بازیں دمگاں ءُ مردماں آژناہ بیتگ۔ تیاب دپی درستیں شھراں سرپد بیتگ ءُ وھد گْوازینتگ۔ دشت ءُ مند، زامران ءِ کساس کیچ ءِ گیشتریں ھلک ءُ بازاراں وھد گْوازینتگ ءُ جنز ءِ واستا کار کرتگ۔ جیونی ءُ گوادر ءَ ٹوھیں گھگیری کردے پیلو کرتگ۔ شھید جاوید ءِ دوئیں گْوھار جاوید ءَ سک کمک کن اَنت۔ ھمک وھد ءَ ھمک جاوراں گْوھار اُوشت اَنت ءُ گْوھارانی بلائیں کردارے بیت۔ گْوھاراں گُد دوچی کرتگ، بلے جاوید ءِ ھیال داشتگ۔ “
ھمے درگت ءَ شھید شکاری جاوید ءِ درکسانی ءِ بابت ءَ شھید ھمید بلوچ ءَ گُشت :
” من ءُ شھید جاوید ءَ وتی کسانی گیشتر ڈگارانی سر ءَ گْوازینتگ۔ ما مُدام کُرّی ءُ کَسیلگ، بندگاہ ءُ گْوانیگ، ھوٹگ ءُ دَرین، ڈنڈار ءُ گُرانڈیگ، سادو کلات ءُ چوٹتان، ھُپّی ءُ کنکور ءِ ڈگاراں ویل بیتگ اِیں۔اے مئے لیبجاہ ءُ شکارجاہ بیتگ اَنت۔ “
شکاری جاوید ءِ نزیکیں سنگت مھروان بلوچ ءِ شھید جاوید ءِ شکار ءِ بابت ءَ گْشت :
“جاوید بلوچ سکّیں شکاری ءُ ٹک تیریں مردمے بیتگ۔ من کسانی ءَ چہ ھم دیستگ ءُ ھمراہ بیتگاں ءُ ورنائی ءَ ھم۔ آ نہ تھنا مُرگ ءِ شکاری یے بیتگ، بلکیں کَوراں ماھیگ ءُ کوھاں آسک ءُ سید ءِ بلائیں شکاری یے بیتگ۔ من بی ایل ایپ ءِ کیمپ ءَ ھم دیستگ، مئے اوتاگاں ھر وھدے کہ مھمانے اتکگ گڑا ما دلجم بیتگ اِیں کہ شکاری جاوید ھمراہ اِنت، مھمان گژنیگ نہ بنت۔ شکاری جاوید پہ شکار ءَ در کپتگ گڑا الم شکارے کرتگ، آسکے بیتگ، سیدے بیتگ۔ اگاں ھچ نہ بیتگ گڑا مُرگ الم شکار کرتگ، بلے سنگتانی نان ھُشک نہ بیتگ اَنت۔“
ھمے وڑ ءَ مھروان بلوچ شھید جاوید ءِ سیاسی ءُ گھگیری جھد ءِ لیکہ ءِ بابت گْشیت : “بلوچ آجوئی جنز ءِ نیمگ ءَ دلگوشی ءُ سرپدی شھید جاوید ءِ تہ ءَ چہ 2005 ءِ دْھک ءَ گندگ بیتگ۔ 2006 ءَ نواب اکبر ھان بگٹی ءِ شھادت ءُ شھید بالاچ مری ءِ جھد ءُ شھادت، پد ءَ شھید واجہ گلام مھمد بلوچ ءِ ءُ بی این ایم ءِ کہ جلسہ یا پروگرام بیتگ اَنت ءُ گوادر ءَ بی ایس او شھید کامریڈ کئیوم ءُ شھید لالا ھمید ءِ سروکی ءَ زھرشانی ءُ پروگرام بیتگ اَنت، اے پروگراماں شھید جاوید ءَ بھر زرتگ۔ سیاسی پڑ ءَ شھید جاوید سکیں زانتکار ءُ سرپدیں مردمے بیتگ ءُ ھمے وڑ ءَ آ سلاہ بندیں گل بلوچستان لبریشن پرنٹ ءَ2011 ءَ باسک جوڑ بیت ءُ وتی سلاہ بندیں جھد ءَ بندات کنت۔ پیسر ءَ گیشتر شھری کار کنت ءُ تیاب دپی شھراں سک آژناہ بیت ءُ گوادر ءَ مزنیں وھدے گْوازینتگ۔ گوادر ءَ آ بلائیں کردے پیلو کنت ءُ بازیں تاوانے پاکستانی سرکار ءُ آئی ءِ ادارہ ءُ داشتگیں چریکاں دنت۔ شھید جاوید گیشتر ھمے وھد ءَ پاشک بیت کہ 2012 ءَ شھید جاوید ءِ نزیکیں سیاد ءُ ھمراہ شھید گنی بلوچ پنّام ء کاسم ءُ شھید ھلیم بلوچ پنّام ء باھڑ کہ بالگتر ءَ شھید سالم بلوچ ءِ ھمراھی ءَ سرکاری چریکانی دست ءَ شھید کنگ بنت ءُ سرکار اے وھد ءَ زانت کہ اے یکیں مردماں۔ شھید جاوید بلوچ شھید گنی بلوچ ءِ جنازہ ءِ رند ءَ تربت ءَ شھید گنی ءِ کھول ءِ ھمراھی ءَ روت، گڑا ھمے وھد ءَ پاکستانی لشکر شھید گنی ءِ جنازہ ءِ کاروان ءِ دیم ءَ دار اِیت ءُ مردماں دستگیر کنت ءُ اے درستں مردماں گوں جنازہ ءَ یلہ دنت، بلے کھول ءِِ دو ورنا گوں وت بر انت ءُ شھید جاوید ءِ ھم چست کنگ ءِ جھد ءَ لشکر کنت، بلے جاوید لشکر ءِ دست ءَ درائیگ ءَ سوبین بیت ءُ دستگیر نہ بیت۔ شھید شکاری جاوید بلائیں وھدے ءَ بلوچستان ءِ جتائیں شھراں کار کنت، داں 2016 ءَ شھری کاراں گون بیت ءُ 2016 ءَ رند کہ سک پاشک بیت گڑا دیم پہ کوہ ءَ روت ءُ بلوچ رھشون شکاری دلیپ بلوچ ءِ گچینی ئیں سنگتاں چہ یکّے شمار بیت۔ شھید جاوید شھید کمانڈر ملا بھرام ، شھید کپٹن منزور بلوچ (منظور بلوچ) ءُ شھید کمانچر کہ شکاری دلیپ بلوچ ءِ کستریں برات ھمے سنگتانی گیشتر گُڈی وھد ءَ ھمراہ بیت۔ “
شھید ھمید بلوچ ءَ آجوئی جنز ءِ تہ ءَ شھید شکاری جاوید ءِ کرد ءِ بابت ءَ گشت :
” شکاری جاوید جوانیں سیاسی سنگتے اَت ءُ بلوچی لبزانک ءَ ھم آئی ءَ را سکّیں نزیکی یے بوتگ۔ جتا جتائیں کتابے ونتگ ءُ ھمے وڑ ءَ یک جوانیں گوریلہ سرمچارے اَت ءُ سکّیں ٹک تیریں مردمے اَت۔
ھرچ کار ءَ چنکّ ءَ کیمپانی واستا مڈّی ءِ آرگ بہ بیت، سنگتانی رھچاری بہ بیت، اوتاک ءَ سنگتانی واستا ورگ جوڑ کنگ یا کیمپ ءَ گاٹ دارگ، آ ھر کار ءَ سک زمہ دار اَت ءُ ایمانداری ءِ سر ءَ وتی جھد کرت۔ آ کسانے وھدے ءَ سنگتانی تہ ءَ جوانیں ءُ ھُنر مندیں سرمچارے ءِ نام ءَ زانگ بیت۔“
شھید ھمید بلوچ ءَ دیمتر ءَ گْوشت: ” شکاری جاوید جنگی کماندار ءِ وڑ ءَ بیت ءُ جنگانی رھبنداں ساز اِیت۔ شھری کاراں کہ ما یکجاہ ات اِیں جنگی پلانے کہ جوڑ کرت، گڑا آ جنگ الم سوبین بیت۔ مئے یونٹ ءِ تہ ءَ شھید جاوید لائکیں سنگتاں چہ یکّے بیت، مارا جاوید ءِ جوڑ کرتگیں ھمک پلان ءِ سر ءَ سِتک اَت۔ “
ھمے رنگ ءَ مھروان بلوچ ءَ گُشت :
” شھید جاوید بی ایل ایپ ءُ براس ءِ بلائیں جنگانی تہ ءَ دیم ءِ سرپ ءَ گون بیتگ ، چوش کہ دشت سبدان جنگ بہ بیت، مزن بند ءِ چوکی ءِ گرگ ءُ سرجم ءَ دستگیر کنگ ءُ کلاھو کیمپ ءِ گرگ ءُ دشت در چکو ءِ چوکی ءِ گرگ، اے ٹوئیں جنگانی تہ ءَ جوانیں کردے پیلو کنت ءُ گیشتر اسنائپر ءِ سر ءَ جنگ کنت۔“
چاوش چاھی ، شھید جاوید ءِ نزیکیں سنگت ءُ ھمراھے کہ وتی ھیالاں درشان کنت ءُ گُشیت :
” ما سنگتاں شور ءُ سلاہ کتگ اَت پہ سبدان آرمی کیمپ ءِ گِرگ ءَ، ءُ آئی ءِ سلاھانی آرگے۔ چہ مئے کیمپ ءَ لھتے سنگت ءُ دگہ کیمپاں چہ دگے لھتے سنگت، ما دراہ ھَور بیت ایں۔ ءُ مئے تہ ءَ ٹک تیریں ءُ جنگولیں جاوید جان پنّام ء آسپ جان اُوں گون ات۔ مارا اے پند ءِ دْراجی ءَ ھچ سما نہ بیت، مڈّی مارا بڈّ ءَ اِتاں ءُ آسپ جان یک یپم ءَ مزاک ءُ مسکرا کنگ ءَ اَت۔ برے گوں یکے ءَ مسکرا کنگ ءَ اَت، ما دراہ کندان ءَ سپر کنان اِت اِیں داں ھما جاہ ءَ کہ مارا دارگی ءَ اَت، اُود ءَ کہ ھمے کمیپ نزیک اَت۔ مئے کمانداراں اے بابت ءَ پیسر ءَ سرجمیں تک ءُ پھناتانی سوڑگ ءُ چار ءُ ٹپاس کتگ اتاں۔ روچ ءَ وتی برانز چہ برزیں کوہ ءِ چپی وار ءَ شنگیتگ اَت، سنگتاں چاہ وارتگ اَت ءُ ما دراھیں سنگت نان ءِ تین ءِ سر ءَ مُچ اِت اِیں۔ لھتے سنگت کُول جَنگ ءَ اَت ءُ شھید آسپ جان نان شاپگ ءُ جَنگ اَت ءُ لھتے سنگت وتی باریگ ءِ ودار ءَ اِت اَنت۔ کندگ ءُ مسکرا ءَ اَت، سبارگ ءَ رند مارا کمانداراں مُچ کت ءُ ھمے کیمپ ءِ نکشہ گوں سنگ ءُ ڈوکاں جوڑ کرت ءُ کماندار ءَ سر ءُ سوج کت کہ دژمن ءِ پوزیشن چون اِنت ءُ مارا چنچو بھر ءَ بیگی اِنت۔ بیگاہ ءَ ما سنگت دژمن کمیپ ءَ چہ یک کلومٹرے ءِ میان ءَ نشت ءُ اَسُر بیگ ءِ ودار کت۔
ھر سنگت جتا جتائیں پوزیشنانی سر ءَ بھر کنگ بیتاں، شھید کماندار ملا بھرام جان ءَ وتی اسنائپر شھید آسپ جان ءَ دات ءُ پرنٹ لائن ءِ بیکَ اَپ پوزیشن ءَ راہ دات۔ ءُ وت شھید آسپ جان ءِ روسی کلاشنکوپ زُرت ءُ پرنٹ لائن ءَ بیت۔ شھید ملا بھرام جان ءَ زانتگ اَت کہ شھید آسپ جان ءِ تیر رد نہ کن اَنت ءُ آ سک ٹِک تیر ءُ تیز جنگیں سرمچارے۔ دژمن ءَ سر کَشگ ءَ نَیل اِیت،
پرچا کہ کمانڈر ملا بھرام ءَ آ دشت ءَ براس ءِ جنگ ءَ دیستگ اَت ءُ آئی ءَ دژمن پہ مکھمی داشتگ اَت۔ شکاری جاوید ءَ دشت ءَ براس ءِ جنگ ءَ ھمنچو تیر جتگ ءَ کہ سنگت ھیران اِتاں، وھدے کہ تیرانی ھساب ِگرگ بیت سَدانی ھساب ءَ تیرے جَتگ اَت۔ سنگتاں جُست کت کہ تئی میگزینانی لُوڈ کنوک کئے بیتگ پُل؟ شھید جاوید ءَ پہ بچکندان ءَ گْوشت: ” من وت لوڈ کتگ ءُ وت لائیتگ۔”، براس ءِ جنگ ءَ اُوں شھید آسپ جان ءَ چینی اسنائپرے گون اَت ءُ آ دژمن ءِ کمک ءَ آؤکیں لشکر ءِ دارگ ءَ پہ بیک اَپ پوزیشن ءَ نندارینگ بیتگ ءَ۔
اُود ءَ اُوں دژمن ءَ شھید جاوید ءِ تُپنگ ءِ رینج ءِ دیم ءَ گامے اُوں نہ جت ءُ دژمن پد ءَ پُشت ءِ کنزگ ءَ لاچار بیت۔ اے وھد ءَ شھید آسپ جان ٹِک کنگ ءُ جَنگ ءَ اَت ءُ پد ءَ سک تیز اَت۔ دشت سبدان ءَ اُوں انچوش دژمن ءِ واستا لشکری کاروانے دیم ءِ کنزگ ءَ نیشت۔“
جاوش شاھی دیمتر ءَ گْوش اِیت: ”من شھید جاوید باز جنگ ءَ دیستگ، بلے لھتے جنگاں آئی ءِ جتائیں کردارے بیتگ۔ کُلاھو ءَ کہ سنگتاں دومی پوزیشن ءَ بزاں پرنٹ لائن ءِ پشت ءَ نادینتگ ءَ پہ سنگتانی بیک اَپ دیگ ءَ، اُود ءَ اُوں سک جنگ کرت ءُ وتی پوزیشن پہ مکھمی داشتگ اَت۔ سک شیوار بیتگ ءُ دیر چارے اَت، تپنگ ءِ مُھرہ اَنچو تیزی ءَ گوں گپتگے کہ برے برے مردم اَجکّا بیتگ کہ ماشاءاللہ چون آئی ءِ دست ءُ چم ریچوک اَنت۔ تیر رد نہ بیتگ انت۔ جنگ ءِ توکا اُوں کلاگ ءُ مسکرا کنگ ءَ بیتگ، بلے سکا شیوار اَت۔ چم پہ سنگتاں تُشے اُوں نہ کنزیت ئے، یک پیم ءَ دژمن ءِ سِراپ اَت۔ آ شریں گوریلا جنگولے اَت۔ شھید وتی مَٹ وت اَت، شھید جاوید جان ءِ کمی ھر جاہ ءَ سما بیت ءُ ما دُرستیں سنگت ھمے سما کن اِیں کہ شھید مارا ھر جاہ ھمراہ اِنت۔ آیانی پکر ءُ پلسپہ مُدام مئے رھبر ءُ رھشون اَنت۔ کُلیں شھیداں سُھریں سلام۔”
شھید شکاری جاوید ءِ شھادت ءِ بابت ءَ مھروان بلوچ گْوش اِیت: ”جاوید مزنبند ءَ چہ 2024 ءَ ماہ یازدہ ءَ در کئیت وتی چکانی چارگ ءَ مگربی بلوچستان ھیت ءَ روت۔ اَئید ءِ دومی روچ ءَ یک اپریل 2025 ءَ پاکستان ءِ بھا زُرتگیں کُشندھانی دست ءَ ٹارگٹ کنگ ءُ شھید کنگ بیت۔ شکاری جاوید بلوچ ءُ دگہ یک ھمراھے گاڑی ءِ سر ءَ کارگاہ سرباز ءَ یک برے رواں گاڑی ءَ تیل مان کن اَنت پد ءَ یک دُکانے ءَ رو اَنت۔ ھمراہ گاڑی ءِ تہ ءَ بیت ءُ شکاری جاوید روت سامان زیر اِیت، وھدے کہ دُکان ءَ در کئیت گڑا ھمد ءَ یک موٹرسینکل ءِ سر ءَ دو سلاہ بندیں مردم کاینت یک کلاشیں تُپنگے گون اِش بیت۔ شھید جاوید ءَ پُشت ءَ چہ اُرش کن اَنت ءُ سَے چار تیر جن اَنت، جاوید جان ھمے جاہ ءَ نمیران بیت۔ چہ نمیرانی ءَ پد شھید جاوید ءَ مگربی بلوچستان ھیت سرباز ءَ زمین ءِ میار کن اَنت۔“
نمیرانیں جاوید بلوچ ءِ پکر ءُ پلسپہ آئی ءِ دْراجکشّیں آجوئی ءِ جھد ءُ آئی ءِ داتگیں دیمونی، پہ ھمک بلوچ پُسّگ ءَ پہ آیوکیں ھمک پدریچ ءَ یک رژنائیں ءُ رھشونیں کتابے ۔
