زند ئنا تس آسراتی تے خاخر
پند ءُ خواری تے یار کننگ ءِ
نوک سُھب ءِ رُژن تالان بُوّگ ءَ اَت کہ ما کوھانی تھا پُترت ایں۔۔۔ کوہ مُدام پہ بلوچ ءَ پناہ گاہ بوتگ اَنت۔ اگاں سبز ءُ شاداب بوتگ اَنت یا ھُشک ءُ ویران بلے بلوچ ءِ دوست بوتگ اَنت بلوچ ءِ کلات بوتگ اَنت۔ مئے کوہ پہ ما کلات اِت اَنت۔ما دلجم بوتیں کہ نوں اگاں اِدا مئے دیم ءَ دُژمن بہ گیپت ھم ما شرّیں جنگے دات کنیں، ھالانکہ ھمے نزّیک ءَ یک کلومیٹر ءِ دوری ءَ ایپ سی ءِ دو چوکی ھست اَت بلے اولی شَم ءَ کہ ما آدیم بوتیں گُڑا ما نِشت ایں۔ کے ڈی جان ءَ چہ وتی چِنتا ءِ تھا چاہ دان کشّ اِت ءُ کمو آپ چہ وتی کلّی ءَ مان ئِے کُرت کمّو آپ چہ منی کلّی ءَ مان ئِے کُرت ءُ وَت شُت دار ئِے جم کُرت ءُ چاہ دان ئِے آس ءَ کُرت۔
مئے بلوچانی ھمے چاہ ءِ نِزوری ھست اگاں ھر وڑین ھالتے بہ بیت ما وتی چاہ ءَ بیھال نہ کنیں۔باز جاگہ ءَ من دیستگ یک نیمگے آپریشن چلگ ءَ بوتگ دومی نیمگ ءَ ھدا ءِ دوستیں سرمچارانی چاہ دان آس ءَ بوتگ۔ ھالانکہ سیاہ تھاریں شَپاں اَبیدئِے رُشنائی ئیگ ءَ پارود ءِ شورستگانی سرا شُتورّ گْران بوتگ اَنت سپر اِش کُرتگ بلے جاگھے کہ پہ دَم ءِ ساسارگ ءَ نِشتگ اَنت گُڑا چاہ دان اِش بچار آس ءَ اِنت۔
ھمے وڑا مئے چاہ دان آس ءَ اَت ءُ مئے کندگانی توار آزمان ءَ اَت۔ مئے مجلس ءُ دیوان گرم اَت۔ ما زگرین جان ءِ سرا گپّ ءَ اتیں کہ زگرین مارا گِند ایت سکّ گَل بیت۔ باریں اے دو ماہ ءِ تھا بور بوتگ نا۔
مارا پیسرا مالوم اَت کہ اے نزّیک ءِ کوھانی تھا آپ نیست بلے مئے مستریں نزوری ءَ مارا گْور جتگ اَت کہ ما وتی نیم آپ چاہ کُرت اَنت ءُ درکپت ایں۔
منی خیال ھمیش اَت کہ باید ما چہ جھل ءِ نیمگ ءَ سلر بہ کنیں کہ آپ اَست ءُ مھلوک ھست ما گُژنگیں مارا چُنڈے نان رسیت۔ بلے کے ڈی گومن تِپاک نہ کُرت گُشت ئِے “روچ رھمانی ءَ اگاں ما چہ مھلوک ءِ نْیام ءَ سپر بکنیں باند ءِ روچ ءَ پوج مھلوک ءَ تنگ کَنت ءُ مھلوک مئے شُمئے بلوچ اَنت۔باید چہ مئے سوب ءَ مھلوک لٹّ مہ وارت۔”
من گُشت “یار اے بُرزی نیمگ ءَ راہ ءَ نئیکہ تو زانئے ناکہ من۔ اے وڑ سٹّی روگ ءَ مردُم ازاب بیت۔”
بلے کے ڈی رازی نہ بوت گُشت ئِے “ٹکّری ءَ من ءَ رُماتگ کمّو من ءَ اندازہ اَست ھمے شَم ءَ بہ لگّ ایں من ھما ٹُلّ ءِ چیدگ ءَ دْرست کن آں۔”
من پہ دِل ءُ نا دِل آئی ءِ گَپّ ءِ پُشت ءَ رھادگ بوتاں۔ مئے مسئلہ ھمیش اِنت کہ ما ھر وڑیں واری ءُ بزّگی ءِ نْیام ءَ ھم پہ وتا آسراتی پٹّیں بلے کے ڈی مُکمّل ءُ مُھکمیں سرمچارے اَت۔ آئرا گوں آسراتیاں کار نیست اَت چائے ھر چینکہ پند ءُ ژند بوتیں وتی اسولانی سرا اوشتاتگ اَت۔
گُڑا ما روان اِتیں ٹُلّے ءَ لگّ اِتیں۔کے ڈی ءَ کوہ ءِ ٹُلّے من ءَ نشان دات کہ آئی ءِ سرا چیدگے اَت گُشت ئِے “آ چیدگ ءِ پُشتی نیمگ ءِ شیپ ءَ چہ راہ در کپیت ءُ ھما شیپ ءِ تھا آپ ھم ھست۔چیدگ چمّاں سکّ نزّیک زاھِر اَت بلے ما اے چُرّ ءَ چہ شَم کنیں دگہ چُرّے کئیت آ چُرّ ءَ شم کنیں دِگہ چُرّے کئیت بلے چیدگ انگت ءَ نہ رس ایت۔ ھمے لِکّ ءُ کپانی تھا مئے آپ ھلاس بوت اَنت۔ نُکّ ھُشک اَت۔پدا ابید آپ ءَ منی ھِچ گُزارا نہ بیت کہ من وَت گُٹّگ ءِ کوھنیں نادْراھے آں۔منی گُٹّگانی دَرد شُرو بوتگ اَت بلے کے ڈی جُنزان اَت آئرا نا تُنّ نا گُژن نا دم برگ ءِ سما ھست اَت۔
منی (فشار) ء ھون جھل کپت۔ تیوگیں بدن لرزگ ءَ لگّ اِت۔ منی زُبان ءَ کارا یلا دات۔ اے جاگہ ءَ ساھِگ ھم نیست اَت کہ ما پہ دم ءِ ساسارگ ءَ بہ نِشتین ئیں، روگ ءِ تھا منی پاد لگوشت گِپت ءُ من شتورّ گِپتاں۔دَست ءُ پاد لگّ اِت اَنت پُچ چہ ھون ءَ میچّل بوت اَنت۔ چمّ تیری میری کنگ ءَ اِت اَنت۔ کے ڈی تامور تامور زاھِر اَت کہ تچان ءَ منی نیمگ ءَ آیگ ءَ اِنت۔
ہکری سنگتانی انچیں رِشتہ یے کہ چہ ھون ءِ رِشتہ ءَ ھم دیمتر بیت۔ ھر وڑیں سکّیں ھالتانی تھا پُشت ءَ نہ کِنز ایت۔ کے ڈی ءِ بڈّ وَت سنگین اَت بلے انگتہ منی چِنتہ ءُ جاٹا ءَ ھوار منی تُپنگ ئِے ھم وَتی کوپگاں کُرت۔ما رھادگ بوتیں، چیدگی کوہ ءِ شَم ءَ کہ ما ایر کَپتیں ساھت یک بوتگ اَت کمّو دیم ءَ ما شُتیں چاراں ھر نیمگ ءَ گْون(کٹار) ءِ درچک اَنت۔ من تچک ءَ شُت آں درچک ءِ ساھگ ءَ وتارا دْراج کشّ اِت۔ من زانتگ اَت کے ڈی ھر ھال ءِ تھا آپ شوھاز کنت کار ایت۔ کے ڈی وتی بڈّ ءِ سامان ایر کُرت اَنت ءُ دوئیں کلّی یے زُرت اَنت ءُ شُت۔ پنچ منٹ نہ گْوست کہ کلّی آپ اَنت آھت گُشت ئِے کمّو دیم ءَ چکّلے (چمّگ) ھست۔ آپ بور پَدا روان ھمودا گُڑا چاھے کنیں وریں۔
چِنتا ءُ سامان ئِے زُرت اَنت ءُ رھادگ بوت گُشت ئِے آپ بور ءُ بیا من دیم ءَ آں۔من پہ اِشارہ ھَو کُرت ءُ آپ وارت پدا ھمودا تَچک بوت آں، سگریٹے روک کُرت گُڑا کمّو جوان بوتاں۔
من چمّگ ءِ کِرّا شُت آں چاراں کے ڈی جان ءَ چاہ تیار کُرتگ، ما چاہ وارت ءُ گَنڈ پچ کُرت اَنت کہ ما سکّ گُژنگ اِتیں۔ نان وَ چوناھا گون نہ اَت مارا ھُشکیں ربّئی ھُرماگ گون اَت گُڑا ما ژپ دیان کُرت اَنت۔ھمدا من وَپتاں وھدے من سَما کُرت چاراں کے ڈی ٹُلّ ءِ سرا نِشتہ دورگِند کنگ ءَ اِنت۔ من ھیران بوتاں کہ اے چونیں اَجبیں اِنسانے اینکہ بے وابی ءِ تھا انگت اے نہ وپتگ، گاٹ دیگ ءَ اِنت۔من سکّ شرمندگ بوتاں کہ ما دوئیں انسانیں دوئیں یکّیں جُنز ءِ ھمراہ ایں بلے آئرا بچار کہ زمہ داری ءِ اھساس آئرا واب ءَ نئیلیت ءُ من ءَ بچار کہ جسمانی ھوالہ ءَ چہ آئی ءَ باز تکڑا گِندگ باں بلے منی بڈّ آئی ءِ بڈّ ءَ بوتگ، من وپتہ دَم کشّ اِتگ آئی ءَ گاٹ داتگ۔
من پاد آھتاں چاہ دان آپ کُرت ءُ آسے بالینت۔۔تنا وھدی کے ڈی ھم ایر کَپت ما چاہ وارت ءُ در کَپتیں۔
مارا اندازگ نیست اَت کہ اوتاگ کُجام نیمگ ءَ بیت بلے یک ھمدردے ءِ گِس ما زھن ءَ ایر کُرتگ اَت کہ شَپ ءَ وتارا ھمودا بہ رسیناں کہ اودا پہ وتا نان ءُ نپادے گِپت کناں ءُ اوتاگ ءِ سوج ءَ ھم گِپت کناں۔
مئے سپر برجاہ اَت۔ نوں بیگاہ ءِ ساھِگ ایر کَپتگ ات اَنت۔ ھر شیپ ءِ تھا آپ ھست اَت۔پمشکا پند تورینگ ءَ نہ اَت۔ ما مجلس کنان ءَ جُنزان اِت ایں۔ ھُرماگ ما دَست ءِ جاگہ ءَ کُرتگ اِت اَنت کہ گُژن وتی سان ءَ دور دیان اَت۔جاگہ جاگھے ما نشتیں گُڑا من لھتیں ھُرماگ وارت ءُ سگریٹے روک کُت بلے کے ڈی ءِ گیشتری دنتان خراب اِت اَنت آئی ءَ گوں یک ھُرماگے ءَ گُزارہ ءَ کُت۔
انچو کہ گس نزّیک بوان اَت مئے گُژن ءِ مارِشت گیش بوان ات انت۔ ما نان ءُ ورگ ءِ سرا گَپّ ءَ لگّ اِتیں۔کے ڈی ءَ گُشت “دُوا کن ھُرود ءِ تریتی یے جوڈ بکن اَنت کہ (معدہ) ھالی ءَ کمزور اِنت۔ مردُم پونڈو ءَ کَنت وارت۔”
من کندگے جَت ءُ گُشت “ترا کلام مہ جَنت گوں تیتی ءِ دنتاناں دُوا بکن گوشتے بہ بیت۔”
مگرب ءَ چہ پَد ما ھمدرد ءِ گِس ءَ رس اِتیں۔۔۔
روان اِنت۔۔۔
