اے کتاب سک باز وشیں کتابے، ءُ پرانز کاپکا شوکیں دروشُمے ءَ نبشتہ کتگ۔ من چوناھیا کتاب باز ونتگ، بلے بدبھتی ءَ آیانی چَمشانک نبشتہ نہ کُرتگ اَنت۔ چوش کہ من ءَ گوں پرانز کاپکا ءِ کتاب ءَ گوں سک باز مھر ھَست اَت، منی دل ءَ اَت من ایشی ءَ چمشانکے الم دے آں۔
اے زانتکار ءِ نام پرانز کاپکا ، اے مرد 3 جولائی 1883 ءَ پراگ ءَ ودی بوتگ۔
اے واجکار ءِ پت ءِ نام ھرمن پرانز کاپکا بوتگ، یک مزنین کارجاھے ءِ مستر بوتگ۔ آئی مات ءِ نام جولی کاپکا اِنت، پد ءَ پرانز کاپکا ءِ مات ءِ سیادی جرمنی ءَ یک سیریں ءُ شریں یھودی لوگے ءَ بوتگ۔ کاپکا ءَ سئے گْوھار بوتگ ءُ سئیں گْوھارے نازی کیمپ ءَ جنگ ءَ شھید کنگ بنت۔
پمیشکا پرانز کاپکا یک بزگ ءُ سک باز نزوریں یھودی لوگے ءَ رُستگ ءُ مزن بوتگ، ھمے واستا چاگِردی ءُ زبھری ءِ آماچ بوتگ۔ گُڑا ھمے زمانگ ءَ کاپکا وتی بنداتی وانگ ءَ 1901 ءَ چہ جرمن نیشنل اینڈ سِوِک ایلیمنٹری اسکول ءَ در بارت، ءُ کاپکا وتی دیم ءِ وانگ ءَ (1906 Ferdinand Karls University) ءَ داکِلہ زوریت ءُ کانود ءِ کورس ءِ وانگ ءَ بِندات کنت ءُ وتی کورس ءَ پہ شریں وڑے ءَ سرجم کنت۔ ھمے وانگ ءُ زانگ ءِ بدولت ءَ کاپکا ھمے زمانگ ءَ یک زانتکارنی شَوکین باسکے جوڑ بیت۔
ھمے وانَگ ءِ بدولت ءَ 1904 ءَ پرانز کاپکا روچ ءَ جان سلامتی وتی کارجاھانی سر ءَ رپورٹ نبشتہ کُتَگ ءُ شپ ءَ کسّہ ءُ دگہ نبشتانک نبیسّ اِتگ، ھمے کورس ءِ بدولت اِنت کاپکا ءِ نبشتانکانی توکا راستی ءَ نویستگءُ ھمے درگت ءَ یک شریں ءُ پھک دلیں مردمے زانگ بوتگ۔
کاپکا وتی زندگی ءِ تہ ءَ باز چاگِرد ءَ گوں ھمراداری کُتگ ، گڑا ھمے وھد ءَ آ باز جاگہ ءَ وتی ھبربندی کُتگ ءُ پد ءَ جلدی پرشتَگ اَنت۔ مدتے ءَ پد بزانکہ 1912 ءَ آ یک چاردہ (24) سالی برلن ءِ جنکے ءَ گوں دُچار کپ اِیت گڑا آ پہ سانگ ءَ کاپکا ءَ گْواجار دنت۔ ھمے میان ءَ کاپکا گْوش اِیت جنک تو لوٹ ئے کہ یک بے ھبر ءُ بے تاھیر، ءُ تَکانسَریں ، بے سدک ءُ نادْراھین مردے ءِ کش ءَ پہ وشدلی بہ نندے؟ بزانکہ آیانی مھر ءُ دوستی داں پنچ سال ءَ بہ بیت۔
کاپکا ءِ پِت آئی لبزانکی پڑ ءَ ھچبر وش نہ اَت، آئی مُدام کاپکا ھبر ءُ ھکّل دات، ھمے میان ءَ کاپکا بزانکہ چہ وتی پِت ءَ کمو کمو گِستا بوان اَت۔ کاپکا وتی مرگ ءَ چہ رند وتی کسّھانی چاپ ءُ شِنگ کنگ ءَ باز نام کش اِت، پرچا کہ کاپکا ءِ کارانی توکا وجودیت (Existentialism) ءُ جدیدیت (Modernism) باز گندگ بیت۔
کاپکا 1911 ءَ نادْراہ بیت، گڑا سک باز وھد ءُ زمانگ ءَ نادراھی ءِ باھوٹ بیت۔ 1912 ءِ سال ءَ کاپکا وتی شَوکیں آزمانک میٹامورپومز کتاب ءَ شریں وڑے ءَ گوں ھلاس کنت۔ ھمے کتاب ءِ تاکانی تہ ءَ نبشتہ کتگ اَت کہ زِھنی، چاگِردی ءُ وجودی تَکانسَری ءُ دگہ بازیں اڑ ءُ جَنجال دیم ءَ پیشدارگ بوتگ۔ 1912 ءَ کاپکا گوں وتی لاڑُکیں دِشتار پیلس بے ور (Felice Bauer) ءَ گوں ھبربندی بوت۔
1913 ءَ کاپکا (Meditation) شوکیں دروشُمے ءَ گوں نبشتہ کُت۔
1916 ءَ کافکا ءَ (the Judgement) نبشتہ کت گوں شَوکیں لَبزان ءُ دروشُم ءَ گوں، اے نبشتانکانی توکا پد ءَ وتی پت ءِ جیڑہ ءُ جَنجال بیان کُتگ اَنت۔ 1917 ءِ سال اَت گڑا بزگیں کاپکا چہ نادْراھی ءِ سبب ءَ آئی گوں پیلس ءَ وتی سانگ ءِ ھبربندی پروشت ، چی ءَ کہ کاپکا ءَ را ٹی بی ءِ نادّراھی اَت ءُ سک باز لاچار ءُ نگیگ بیت۔ آ گوں وتی شوک ءُ پُر ازشتیں ھیالاں چیزان ءَ نبشتھی دروشُم ءَ دیم ءَ کار اِیت ءُ لس مھلوک ءَ را سر کنت۔ کاپکا 3 جون 1924 ءَ اے کوڑکیں دنیا ءَ رکست کنت ءُ دیم پہ وتی ابدی ھنکین ءَ مادریں زمین ءِ باھوٹ بیت۔
