امّا ھوری ءِ یات ءَ

نبشتہ کار: گلزادی بلوچ

رجانک: سرباز وپاؔ

جیجا ھوری ھما توکلی ئیں ماس اَت آئی بچک گل مھمد مری چاردہ سال پیش زور بیگواہ کنگ بوتگ اَت، چہ زھگ ءِ زوریں بیگواھی ءَ پد آئی گوں سبر ءُ توکل ءَ وتی جھد بندات کرتگ۔ آئی ءَ ھمک جاہ ءَ توار چست کرتگ ءُ نہ تھنا پہ وتی زھگ ءِ آجوئی ءَ، بلکیں پہ دُرستیں بیگواھیں بلوچانی ھک ءَ جھد کرتگ۔ آئی لوٹ یک ماسے ءِ چیھانٹ اَت ءُ یک راجے ءِ توار اَت۔

آئی ءَ گوں مھکمی ءَ وتی گھگیری برجاہ داشتگ اَت، ریاستی زوراکی ھم گوں ھمے دْرچ ءَ آئی ءُ آئی کھول ءِ رندگیری ءَ کنگ ءَ اَت۔ آئی بیرانی ھم ھمے دْراجشکیں آزار ءُ ریاستی زوراکیانی درچ ءِ یک بھرے مارگ بیت۔ انوگیں پوجی آپریشناں آئی ءِ گس ءَ ھم بیڑ برگ بوتگ۔ آئی کسانیں بچک ریاستی ادارھانی کارمنداں گرّان کرتگ ءُ آزار داتگ ءُ چہ گس ءَ کش اتگ۔ لّمہ ھوری گوں وتی شپادیں پاداں تچان ءَ دزبندی کرتگ کہ منی زھگ ءَ اَچ من مہ پُل اِت۔

چی ءَ کہ بلوچستان ءِ جاور انوں ھما وڑ اَنت کہ ھمک روچ ورنایانی زور بیگواہ ءُ پد ءَ دروگیں میڑاں شھید کنگ ریاستی پوج ءِ دودے جوڑ بوتگ۔ ھمے ھیال ءَ ھم لُمہ ھوری داں مرگ ءَ سر کرتگ کہ چوش مہ بیت آئی زھگ ریاستی ادارھانی ھمے پالیسی ءِ آماچ بہ بیت۔ ھمے دردیگیں ندارگ ءَ آئی دل ءَ انچیں ٹپّے ایر کرتگ کہ آ تُستگ۔ ھمے ناگیگیں جاوراں آ نادْراھجاہ ءَ برگ بوتگ، اُود ءَ آ داں دو روچ ءَ مرگ ءُ زند ءِ میان ءَ ساہ کشگ ءَ بوتگ، وتی زھگ ءِ یات، وتی پریاد ءُ یک دْراجکشیں ودارے گوں دل ءَ بستگ ءُ چہ جھان ءَ رُکست بوتگ۔

ریاستی ادارھاں آئی زندمان انچوش جنجال کرتگ ءُ آئی زندگی ءِ گڈی بھر ءَ ھم آئی ءَ ایمن بوگ ءَ نیشتگ۔ جیجا ھوری یک نہ ترسیں ماسے، مھکمیں آشوبی کارکن ءُ بلوچ زرمبشت ءِ مھکمیں توارے اَت۔ من آ ھمک زھرشانی، ھمک نندانک ءُ ھمک لس مچی ءَ دیستگ۔ من وتی بنداتی سیاسی سپر لانگ مارچ، 2024 ءِ میان ءَ ھم آ ھمک روچ گوں نوکیں توکل ءُ نوکیں اوستے ءَ بنجل ءَ دیستگ۔

اسلام آباد ءِ ھما شپ مرچی ھم منی دل ءُ ھیالاں نوک اَنت کہ پولیس ءَ شپ ءِ تھاری ءَ مئے سر ءَ ارش کرت ءُ مئے پیرزالیں ماس گرّان کرت اَنت، آزار داتگ ءُ بساں سوار کرت اَنت۔ آ ھمے کلوہ ءَ دیگ ءَ اِت اَنت کہ بلوچ کدی ھم اے واکداریں شھر ءَ میا اَنت۔ بلے مئے شیرزالیں ماساں ھمے زوراکی، آزاردھی ءُ بیرگیری کاروائی ءِ گوں نہ ترسی ءَ دیم پہ دیمی کرت۔ ریاست ءِ نیمگ ءَ انسانی ھک، اکلاکی واک ءُ آئینی لوٹ دُرست لگتمال کنگ بوتگ اَنت، دانکہ بلوچ زالبولانی چادر ءِ شرپ ھم اسلام آباد ءِ دگانی سر ءَ پھریز نہ اَت۔

پد ءَ ھم  بلوچ ماساں ھمے پیش داشت کہ نہ آزاردھی آیاں پروشت کنت ءُ نہ ریاستی زوراکی آیانی گھگیری ءَ بے توار کنت۔ اسلام آباد بہ بیت یا راجی مچی، دالنبدین ( 25 جون 2025 ) ءَ لّمہ ھوری گوں وتی پیرزالی ءُ نزوریں جان ءَ ابید گْرانیں سپر ءَ پند بر اِت۔ آئی چمانی تہ ءَ ودار ءِ نمب اَت، بلے آئی توکل ھچ وڑ ءَ نزور نہ اَت۔ 

25 جنوری ءِ شپ ھم یات کئیت کہ ما 49 کھول یکیں گس ءِ تہ ءَ نشتگ اَت ایں۔ بستر کم اَت درست پریشان بوت اَنت۔ بلے اے بابت ءَ لُمہ ھوری سکا گوں مھروان ءُ نزمیں گالوارے ءَ درستان ءَ گوشتگ کہ مارا چہ کسانیں آسراتی ءِ نیستی ءَ گمیگ بوگ ءَ ابید وتی مول چارگی اِنت کہ پہ آئی ما چہ انچو دور ءَ اَتکگ ایں۔ بزاں یکجھتی، تنگدستی ءِ جنجال زندگی ءِ بھر اَنت، بلے مارا اے وھد گوں دلوشی ءُ وت ماں وتیں مھراں گْوازینگی اَنت۔ آئی ھمے گوشت بچکند اِت ءُ پد ءَ اسلام آباد ءِ نندانک ءَ بوتگیں در اِنسانی ءُ در اکلاکی زوراکیانی گپ جنگ بندات کرت۔

لُمہ ھوری چہ ھما شیردلیں بلوچ ماساں اِنت کہ آئی وتی زاتی جنجال گوں راجی زانشت ءَ ھمگرنچ کرتگ اَنت۔ آئی داں وتی زندگی ءِ گُڈّی دم ءَ وت ءَ پہ بلوچ راجی زرمبشت ءَ ببا داتگ۔ اسلام آباد ءِ نندانک 2025 ءِ میان ءَ سکائیں گرمی ءَ ابید آ یکشل ءَ ساڑی بوتگ ءُ گوں تچکیں لبزاں گوشتگ کہ دانکہ ڈاکٹر مھرنگ بلوچ، بیبرگ بلوچ، گلزادی بلوچ، شاہ جی ءُ بیبو یل کنگ نہ بنت ما زھرشانی ءَ ھلاس نہ کن ایں۔

رند ءَ کہ آ ھدہ زندان ءَ مئے چارگ ءَ اتک گڑا آئی چھرگ ءَ وشی ءُ چمانی گمیگ بوگ ءِ ھواری ءَ آئی گوں وشی ءَ مئے گون ءَ گند ءُ نند کرت ءُ گم آئی زندان ءَ گندگ اَت۔ رُکستی ءِ وھد ءَ آئی گوں توکل ءَ گوشت( ھواریں سنگت )

لّمہ جان تئی جھد ءَ ھمے پیش داشتگ کہ بلوچ راج کدی نزور نہ بیت ءُ نیکہ سرجھل کنت۔ چی ءَ کہ آئی کِرّ ءَ نہ ترس، مھکم ءُ دیمونی دیوکیں ماس ھست۔ ھما ماس کہ آیاں نیزگاری دیستگ ءُ وتی زھگانی زوریں بیگواھی ءِ جتائی ءَ زندگ گْوازینتگ، بلے ایردستی ءُ بے توار بوگ ءِ زند نہ لوٹ اِتگ۔

لُمہ جان، تئی جھد، شُمئے سبر ءُ شُمئے مھکمی پما مادنیں کشک اَنت۔ ما شمئے گھگیری ءِ راہ ءَ کدی ھم ویران بوگ ءَ نیل اِیں۔ تئی جپاکشی ءُ دیمونی پہ مدامی گیر آرگ بنت۔

تئی جھد ءَ سد سلام اِنت۔