کھر ءِ سوب ءَ آیوکیں جنگ ءِ دْروشم؟

نبشتہ کار: ماھروچ بلوچ

مرچاں بلوچ راج ءَ زانگ لوٹ اِیت کہ اگاں امریکہ ءِ وڑیں تاگتوریں ملکے ویتنام، ایراک ءُ اوگانستان ءِ تہ ءَ چہ گوریلہ جنگ ءَ پروش وارت ءُ درکپ اِیت، وتی وھد ءِ بلاھیں تاگتور سوت یونین ھم اوگانستان ءِ تہ ءَ گوریلہ جنگ ءِ سبب ءَ نہ اُوشت اِیت ءُ درکپ اِیت گُڑا پنڈوکیں پاکستان چون چہ 27 مارچ 1948 ءَ بلوچ راج ءَ ایردست ءُ گلام دارگ ءَ اِنت؟ بلوچ گوریلہ جنگ ءِ داتگیں جانی تاوان ءُ جنگی ھرچگاں چہ کُج ءَ برداشت کنگ ءَ اِنت؟

گِند ئے یک نزوریں راجے ءِ سر ءَ اُرش کنگ ءُ پد ءَ آئی ءِ سر ءَ کبزہ کنگ وَ سک آسان اِنت بلے کبزہ ءِ برجاہ دارگ سک گران اِنت، پرچا کہ دُنیا ءِ ھر گیرت مندیں راج پہ وتی راجی آجوئی ءَ گوریلہ جنگ کنت۔ پد ءَ ناشُناس ءُ ناسوھویں کبزہ گیر ستر بلاھیں دولت مند ءُ زورآورے بیت گوریلہ جنگ ءِ دیم ءَ نہ اُوشت اِیت۔ بلے پاکستان ءِ وڑیں لگور ءُ کنگالیں دژمنے ءَ 27 مارچ 1948 ءَ بلوچستان ءِ سر ءَ اُرش کُت، کبزہ ءِ کنگ پد بلوچ سرڈگار ءِ بلاھیں بھرے ھم پنجاب ءُ سندہ ءَ ایردست ئِے کُت۔ 75 سال ءَ، بزانکہ داں روچ مرچیگ ءَ بلوچ راج ئِے گُلام داشت ءُ یکشل ءَ بلوچ لگتمالی، بزگی، چُکچنی ءُ زلم ءِ آماچ اِنت۔ پاکستان کبزہ ءُ بلوچ راج ءِ گوریلہ جنگ ءِ دیمپانی ءِ ھرچگاں چہ بلوچستان ءِ ریکوڈک، سندیک، گْوادر، ھب، ڈیرہ بگٹی ءِ گیس، ڈیرہ مُراد جمالی ءِ پاورپلانٹ، بولان تیل، ڈیرہ گازی ھان ءِ یورینیم ءُ دِگہ جاھاں کَشگ ءُ برابر کنگ ءَ اِنت۔  بلوچ راج ءِ زِر، ماھیگ، ٹیل، گیس، تنگو، آسن، انگر ءُ دِگہ ھزارانی کچ ءَ کدرتی مڈیانی پُلگ ءَ وتی جنگی ھرچگاں برابر کُتگ ءَ اَنت ءُ انگت ھم چہ بلوچ ءِ مڈیاں برابر کنگ ءَ اِنت۔ بزانکہ بلوچ ءِ دولت ءُ آسراتی بلوچ ءِ کوش ءُ چُکچنی ءَ کارمرز بوگ ءَ اَنت۔

 ایشی ءِ سبب ایش اِنت کہ ما بلوچ راج دمگی ٹَکراں(علاقائی قبائل) بھر ءُ بانگ ایں، ما وت ءَ یک سرجمیں راجے نہ پھم اِت۔ دژمن ءَ مئے سر ءَ سردار، میر ءُ نواب داشتگ اَنت۔ مستریں بدبھتی ءَ چار اِیں کہ ھمے وتگڑیں میر ءُ نواب وت ھم یکمُشت نہ اِت اَنت ءُ ناں کہ روچ مرچیگ ءَ وت ماں وت تپاک اَنت۔ وھدے کہ 1958-59 ءَ پنجابی پوج گوں بابو نوروز زھری ءَ جنگ ءَ اَت گُڑا نزیکیں ڈیرہ مراد جمالی، جھل مگسی، لسبیلہ، سرجمیں مکران ءُ سرجمیں کوہ سلیمان ءِ ھچ بلوچ ٹَکراں پہ بابو نوروز ھان ءِ کُمک ءَ گوں لگوریں دُژمن ءَ جنگ نہ کُت۔ ھمے وڑ ءَ وھدے کہ 1971 ءَ پاکستان وت چہ ھندوستان ءُ بنگالیانی جنگ ءَ پْروشت ءُ نزور اَت گُڑا 1973-78 ءَ نواب ھیر بکش مری ءُ اتا اُلہ مینگل ءِ سروگانی ءَ بلوچ راجی آجوئی ءِ سِلاھبندیں جُھد ءَ ھچ دمگی وتگڑیں میر ءُ نواب ھوار نہ بوت اَنت ءُ ناں کہ ھمے کاسگ چٹّیں میر ءُ نواباں وتی دمگی بلوچاں گْوشت کہ بابا ھیر بکش مری ءُ اتااُلہ ءِ سرکماشی بلوچ راجی آجوئی جنگ ءَ ھوار بِہ بہ اِت۔ ھمے وھد ءَ سندھ ءُ پنجاب ءِ ایردستیں بلوچستان ءِ لیگاری، کھوسہ، مزاری، جھکرانی ءُ دِگہ بازیں پنجابی کاسگ چٹّ بھٹو ءِ ردیں مھر ءُ سنگتی ءِ آماچ اِت اَنت۔  ایشی ءِ سان ءُ آسر چہ راجی لشکر بی ایل اے آپریشن ھیروپ ءَ ھم پدر اِت اَنت، وھدیکہ رکشان تاں مکُران ءِ ھمُک شھر ءُ دمگاں کبزہ گیریں دژمن ءِ ھلاپ ءَ ترندیں جنگ برجاہ اَت بلے دومی نیمگ ءَ سبی، کوھلو، ڈیرہ مُراد جمالی، ڈیرہ بگٹی، جھل مگسی ءُ دِگہ بازیں سردار ءُ میرانی دمگاں دژمن ءِ سر ءَ ھچ وڑیں گھگیری نیست اَت۔

البت مرچاں بلوچ راجی آجوئی ءِ جھد چہ سردار، میر ءُ نوابانی دست ءَ درکپت ءُ لس وانِندھیں بلوچ ءِ دست ءَ شُت۔ مرچاں راجی آجوئی جنگ  ءَ راج ءِ دھکان، پوریاگیر، اُستاد، نودربر، ڈاکٹر، انجنئیر ءُ زِند ءِ ھمُک تک ءُ پھنات ءِ مردم ھوار  اَنت۔ کَسے راج ءِ تہ ءَ گُلامی ءِ ھلاپ ءَ نپرت ودی کنگ ءِ جُھد ءَ اِنت، کَسے جنگ ءُ کَسے میان اوستمانی گل ءُ ترامگیجانی تہ ءَ وتی آجوئی ءِ واست ءَ توار جِست کنگ ءَ اِنت ءُ کسے زبان دوستی ءُ راجدوستی ءِ سر ءَ نبیس ایت کہ راج وتی گُلامی ءُ بزگی ءَ بِہ مار اِیت۔

مستریں سوب ایش اِنت کہ بلوچ وانِندھاں ھم جنگی ردوم ءُ ٹیکنولوجی ءِ رِد ءَ گوریلہ جنگ ءِ تہ ءَ بدلی آؤرتگ اَنت۔ جنگ ءِ نوکتریں سِلاہ جنگی ڈرون اَنت ءُ چہ ھمے ڈرونانی تہ ءَ کَسانیں ڈرون ھم ھست اَنت کہ نزوریں راجانی گوریلہ پورس سک باز آسانیں وڑے ءَ دژمن ءِ بُنجال، ملیٹری انسٹالیشن، کارگِس ءُ کارجاھاں تباہ کنگ ءَ اَنت پمیشکا اِے کَسانیں جنگی ڈرون گوریلہ پورس ءِ واست ءَ سک المی اَنت کہ دژمن بے وس بیت ءُ چہ کبزہ گیری ءَ درکپ اِیت۔  بلوچ راجی لشکر بی ایل اے ءَ ھم ڈرون جنگی یونٹ کھر اڈ ءُ ساز کُتگ کہ انی آیوکیں وھد ءَ کبزھگیریں پوج ءِ بِنجل ءُ بلوچستان ءِ دِگہ لٹ پولی کارجاھاں نشانگ بہ کن ایں کہ اود ءَ پاکستان زر کمائینگ ءُ وتی کبزہ ءَ مھکم دارگ ءَ اِنت۔

بلوچ راج وتی ڈیھ ءِ وتواجہ، بلوچستان آجو بات۔ آزات ھیال ءُ راجمستریں بلوچستان شالا دیمروئی بہ کنات۔