نبشتہ کار: زمان مھر
واجہ میتگ ءِ مزن ءُ نامدار ءُ سرکماش اِنت، واجہ ءِ ھکم ءَ کسے دگہ کُت نہ کنت۔ واجہ ھرچ گپے کنت کس ءَ آئی ءِ گپ ءِ پروشگ ءِ ھکم نیست۔ واجہ میتگ ءِ نام ءَ پَنڈ ءُ مال گیت ءُ وتی لوگ ءَ آباد کنت۔ واجہ ءِ کر ءَ کسے وتی ھک ءِ بابت ءَ گپّے بہ کنت آ رَستراں دیم دنت کہ بہ رو اِت پلانی ءَ چِست بہ کن اِت ءُ بیار اِت لَٹ ءُ شاپ کن اِت۔ پد ءَ آئی ءِ پُشت ءَ دروگیں بھتام بہ لَڈ اِت داں مہ زانت کہ من ءَ واجہ ءَ گرائینتگ۔
ھمے بزگ ءُ نابزانتیں راج کہ آئی ءَ جند ءِ میتگ ءِ سرکماش ءُ میر ساھب گار ءُ بیگواہ کنت۔ پد ءَ اُوں واجہ ءِ مِنت وار بیت کہ واجہ تو مئے ھبر ءَ دیم ءَ بَر کہ مئے چُک گار ءُ بیگواہ اَنت، بَلے چوش نہ زانت کہ واجہ ءِ جند ءِ دست مان اِنت۔ واجہ ساھب داں کسے ءِ چُک ءَ گار ءُ بیگواہ مہ کنائینت، واجہ ءَ کس واجہ ساھب نہ گْوش اِیت کس نئیت واجہ ءِ در ءِ دپ ءَ وتی ارز ءَ نیار اِیت۔ گوں ھمے گپاں نازُل ءُ آئی ءِ پِت ءِ بیگواھی ءِ کسّہ۔
نازُل پہ وتی گار ءُ بیگوائیں پِت ءِ شوھاز ءَ برے یک واجھے ءِ در ءَ ٹُکان اَت۔ آئی ءِ پت ءَ شش ماہ اَت کہ بیگواہ اَت، آ مروچی پد ءَ گوں وتی مات ءَ واجہ ءِ نیمگ ءَ سر گپتگ اَت پہ در ءِ ٹُکگ ءَ۔ واجہ میر ساھب ءَ وتی کاردار توار جَت ءُ گْوشت کہ برو درءَ بہ چار کے جنگ ءَ اِنت ئِے ؟ کسے بوت منی ھال ءَ مہ دے، اول من ءَ آئی ءِ پجار ءَ بہ دے رند ءَ آئی ءَ تہ ءِ آیگ ءَ موکل بہ دے۔کاردار ءَ در پَچ کُت داں مئے ھمساھگ نازُل اِنت گوں وتی گار ءُ بیگوائیں پت ءِ اکس ءَ در ءِ دپ ءَ اُوشتاتگ۔
نازُل گرم ءَ جَتگ ءُ سک بے چاڑ اَت، آئی ءِ دیم ءَ ھید چہ پیشانیگ ءَ پِٹان ءُ کپان اِت اَنت۔ تبد ءُ لِوار ءِ گْوات، گرماگی روچ ءِ تْرندی ءَ نازُل ءِ شوک ءُ زیبائیں رنگ چو بے آپیں درچک ءِ پیم ءَ ھُشک تَر اِتگ اَت۔ آئی ءِ مات در ءِ کَش ءَ دیوال ءِ ساھگ ءَ وتی سر ئِے چیر داتگ اَت ءُ دریگ ءِ نیمگ ءَ چارگ ءَ اَت کہ باریں کدی نازُل من ءَ توار جنت کہ اما بیا رویں تہ ءَ واجہ ءِ کر ءَ۔ کاردار ءَ گوں تُرندی ءَ آ جُست کُت کے ءَ لوٹ ئے ؟ نازُل ءَ آسَردے ءَ پَد وتی پِت ءِ اکس ءِ نیمگ ءَ چَمشانکے دات ءُ واجہ ءِ کاردار گْوشت، من، من واجہ ءِ کِر ءَ اَتکگ آں، من ءَ کارے ھست۔ واجہ ھمد ءَ اِنت یا ناں؟
من نہ زاناں، من واجہ ءِ باگ ءَ کار ءَ بیتگ آں باریں لوگ ءَ چاران ئِے۔ اگاں اِد ءَ بوت ترا ھال دے آں۔ کاردار ءَ اَنچوش گْوشت ءُ در بند کُت۔ واجہ اے ھمے نازُل اِنت وتی پِت ءِ اکس ئِے گون اِنت تئی واستا کارے ھست ئِے۔ تئی جُست کُت ئِے، ھاں! بَلے برو بہ گْوش واجہ انی اد ءَ نہ اِنت۔ واجہ ساھب ءَ اَنچُوش گْوشت ءُ کاردار پد ءَ پہ نازُل ءَ دیم دات۔ نازُل ءِ مات اے وھدی در ءِ دپ ءَ اَتک ءُ اُوشتات کہ بہ گندے کاردار مارا تہ ءِ آیگ ءَ بہ گْوش اِیت، بَلے وھدے کہ کاردار اَتک آئی ءَ گوں آیاں دلگوش نہ دات ءُ پہ لَپرزگی درائینت ئِے کہ واجہ انوں اد ءَ نہ اِنت۔ گوں ھمے گپّ ءَ آئی ءَ در بند کُت ءُ شُت۔
نازُل ءُ آئی ءِ مات تُنّ ءَ گپتگ اِت اَنت، آ گوں ارمانیں دلے ءَ واتَر پہ وتی لوگ ءَ رھادگ بوت اَنت۔ بانداتیں روچ ءَ گار ءُ بیگوائیں مردمانی واستا یک زھرشانی یے بوگ ءَ اَت۔ نازُل وتی مات ھال دات، اما باندا زھرشانی یے بوگ ءَ اِنت من ءُ تو ھم رویں بھر زوریں۔ نازُل ءِ مات ءَ پیسر ءَ بازیں زھرشانیاں بھر زُرتگ اَت ءُ ھوار بوتگ اَت، بَلے بانداتیں زھرشانیانی آئی ءِ دل نہ گْوشگ ءَ اَت۔ آئی ءَ نازُل دل نہ بوت کہ جواب ئِے بہ دنت، پمیشکا آئی ءَ نازُل دلبڈی دات ءُ گْوشت شر منی چُک انشاء اللہ باندا رویں گوں۔
نازُل ءِ مات ءَ آ دلبڈی دات ءُ سر ایر کُت پہ واب ءَ، نازُل گوں وتی گوانکو ءَ دلگوش اَت۔ نازُل ھرچ وھد پیسبُک ءُ نوکیں ھال چار اِت اَنت۔ باریں شپ ءِ کُجام وھد اَت کہ نوکیں ھالے ماں نیوز دیوان ءَ اَتکگ اَت کہ مروچی دو لاش پاکستانی لشکر ءَ ماں تُربَت سیول اِسپِتال ءَ آؤرتگ آیان ءَ میڑے ءِ نام ءَ شھید کُتگ، بَلے بندیگیں مردم اِت اَنت۔ نازُل گوں اے ھال ءِ اِش کنگ ءَ کوکار ءُ پَریات کنگ ءَ بوت، مات چہ واب ءَ چِست بوت منی چُک منی چُک نازُل ترا چون اِنت؟ آئی ءَ گوں گِلوتگیں گالوارے ءَ گْوشت اما دو بندیگ پوج ءَ جتگ۔ اما اے دوئیں اکساں بہ چار۔
نازُل ءِ مات ءَ کہ وھدے اکس چار اِت اَنت آئی ءَ نازُل ءِ پِت پجا آؤرت۔ ھمے اکساں چہ یکے نازُل ءِ پِت ئیگ اَت کہ آئی ءِ دیم رَستراں ٹَپ ءُ ٹُور کُتگ اَت۔شوک زانگ نہ بوت، بَلے آ پکا اَت کہ اے نازُل ءِ پِت اِنت۔ آ اے گپ ءَ بہ گند ئے گمیگ نہ بوت، بلکیں آ وش بوت۔ پرچا کہ آئی ءِ ودار سرجم بوت، آ نی دلجم بوت کہ نازُل ءِ پِت پہ دائمی مارا چہ جتا اِنت۔ ھمے میتگ ءِ واجہ ءُ میرانی دپ ءَ اَت کہ اے کوہ ءَ بیتگ جنگ ءَ جنگ بیتگ، بلے آ۔۔۔۔۔۔۔۔۔۔۔۔
