سورتانی نیمروچاں جنگ ءِ ساھگ

نبشتہ کار: برزکوھی

رجانکار: مھروان کمبر

اگاں اے اکس دیوال ءِ دیم ءَ ٹنگگ بہ بیت، گُڑا وھد وتی پاداں دار اِیت۔ دو شیرزال اَنت، ھردُکانی دیم ءَ بے تواری ءِ شالے مانپوشتگ، بلے یکے ءِ بے تواری ءِ تہ ءَ کندگ چو سنج ءَ بُتکگ اَنت ءُ دومی ءِ بے تواری ءِ تہ ءَ لیکہ کل ءُ کسارت کنگ بوتگ اَنت۔ یکے ءَ سلاہ اِیر کُتگ اَنت ءُ دومی ءَ وتی چُوڑ بُرز کُتگ۔ سلاہ دور دیوک ءِ دیم ءَ تھنا پْروش ورگ ءِ نہ بلکیں واجہ ءِ پرمان ءِ چھر ءُ شبین ھست اِنت۔ آئی ءَ وتی چمّ اَنچو جھل جتگ اَنت، گْوش ئے آ تھنا توپک ءَ ناں بلکیں ھما واباں گوں جُتا بوگ ءَ اِنت کہ توپک ءِ ھمراھی ءَ زمین ءِ سر ءَ دْراج گیپتگ اِت انت۔ آئی ءِ چمّانی دیم ءَ ھِچ دُژمن نیست، ھِچ زمزیل نیست، بس پرمان ھَست۔ واجہ ءِ پرمان سینگ ءَ پیوست بیتگیں تیراں چہ گیش تورناک اِنت۔ یک وھدے سلاہ دور دیوکیں جنک کوھانی سرٹُلاں اُوشتاتگ ءُ دُژمن ءِ دُرستیں سُر ءُ پُر نوٹ کُتگ اَنت ءُ مرچی سلاھانی دیم ءَ چم ئِے جھل کُتگ اَنت ءُ اُوشتاتگ۔ سلاہ اَنچو کتار ءَ اِیر کنگ بوتگ اَنت گْوش ئے جنگے ءَ پد جون زمین ءِ سر ءَ چو کتار ءَ اِیر کنگ بہ بنت۔ ھر سلاہ ءَ یک کسّھے گون اِنت، سنگرے ءِ، شوروھے ءِ، دیتے ءِ ءُ یک سوتے ءِ۔

یکے ءَ گِھگیری یل کُت ءُ دومی ءَ گھگیری ءَ گوں زندان مٹ کُت۔ بَرے بَرے گھگیری نہ کنگ بُزدلی گْوشگ نہ بیت، بلے اے ھچبر بے درد نہ بیت۔ ھردیں سلاہ کپ انت، گُڑا سلاھانی ھمراھی ءَ بازیں یات ھم کپ اَنت۔ ھمایانی کوپگ ءَ توپک اِیر کنگ بوتگ اِت انت آیانی دل ءِ بار کم نہ بنت بلکیں گیش بنت ءُ ھما کہ زندان ءِ تھاریں کُوٹیاں کند اَنت، آ وتی بالاد ءِ درداں چہ انکار نہ کن اَنت، بلکیں ریاست ءِ زُبان ءَ پْروش دے اَنت۔ بازیں لس مردم آ کندگاں وشی یے سما کن اَنت، بلے راستی ءَ آ گواچن ءِ اَنچیں سگار اَنت کہ نہ آ ھون شنز اَنت ءُ نیکہ چیھانٹ جن اَنت، بلکیں زوراک ءِ گُٹ ءِ ھڈ جوڑ بنت۔

ھما وھد ءَ کہ اِیر کُتگیں سلاھانی کتار ءِ دیم ءَ جھل کُتگیں چم ھمے سوڑگ ءَ کنگ ءَ اِت انت کہ پُشت کنزگ ارزان اِنت، گُڑا ھمے ساھت ءَ آمید گس ءِ دروازگ ءِ دپ ءَ مھرنگ ءِ چم ھمے جار ءَ جنان اِت انت کہ دیم ءَ جُنزگ ءِ ھاتر ءَ ھژدری نہ اِنت کہ تئی دست ءَ توپک بہ بیت برے برے کندگ تیراں چہ گیش شوروھاں سر چکار بنت۔ جنگ توپک ءَ نہ دانائی ءَ گوں باج برگ بیت۔ دانا ھما اِنت کہ ٹپّاں درمان نہ کنت، بلکیں ٹپّاں آدینک جوڑ کنت۔

سلاھانی دور دیگ ارزان نہ اِنت۔ اے تھنا لشکری اَملے نہ اِنت، بلکیں یک پِگری جاورھالے کہ جنگول ءِ یاداشت، آئی ءِ کمٹمنٹ، آئی ءِ زمیر درست جاندر بنت۔ توپک ءِ نل ءَ چہ در اَتکگیں تیر دُژمن ءَ کُش اِیت، بلے توپک ءِ اِیر کنگ جُھدکار ءِ تھانگ ءِ ھر چیز ءَ کُش ایت ءُ ھلاس کنت، آئی ءِ لوٹاں، واباں، لیکھاں۔

مھرنگ ءِ بچکند پمیشکا گیش جسکگ ءَ اَنت کہ آ ھِچ سوڑگ ءِ آسرال نہ اَنت، بلکیں یکشلیں انکار ءِ گواھی اَنت۔ ھما جنک کہ آئی ءَ وتی کندگاں گوں زندان ءِ دیوال چیلنج کُتگ اَنت، آ ناں باج برے اَت، ناں یک مُچّانکی دیوانے ءِ مھماندار اَت، آ بس ھما بندیگ اَت کہ گِھگیری ءِ شھزانتی ءَ چہ وتی پجّار ءَ رکینگ ءِ جُھد ءَ اَت۔ آ زانگ ءَ اِنت کہ ریاست جسمانی دْروشم ءَ آئی ءَ پْروش دات کنت، بلے سما ءُ سسّا ءَ چہ آئی ءَ باج بُرت نہ کنت۔
ھمود ءَ سلاہ دور دیگ بوگ ءَ اَنت، اُود ءَ تھنا توپک پُروشگ نہ بوگ ءَ اَنت، بلکیں یک راجے ءِ پگر ءُ لیکہ شنگ ءُ شانگ بوگ ءَ اَنت۔ اے تھنا یک مردمے ءِ دمبرگ نہ اِنت، بلکیں یک گلے ءِ ھورک ءُ ھالیگ بوگ ءِ نشانی اِنت کہ بُنجائی رھشون وتی زُبان ءَ گوں لیکھاں مٹ کنت، سیاسی اَمل گھگیری ءِ سما ءَ چہ یک کِر بیت۔ گھگیری ءِ ڈولداری بس سوبمندی ءَ نہ اِنت، بلکیں ھما سِتک ءُ دلجمی ءِ تہ ءَ اِنت کہ اَبید انچیں اُمیتے ءَ اوں زندگ بوت کنت۔ ھما دروشم (سورت) کہ آمیدگس ءَ بچکند اِیت، آ بس تھنا یک مردمے نہ اِنت، آ پورویں جُنز ءِ بُرز ءُ بلندی ءِ چیدگ اِنت۔

ھما کہ سلاھاں دور دنت، بہ گندے آئی ءَ ھمے ستک دیگ بیتگ کہ اَبید چہ تُوپک ءَ جد ءُ جُھد بیت کنت۔ بہ گندے آئی ءَ اے گپ ءِ سر ءَ ستک کُتگ کہ توپک کِشک نہ اَنت، بلکیں کوپگ ءِ بار جوڑ بوتگ اَنت۔ بہ گندے ھما شپاں کہ آئی ءَ شھیدانی میت چادر پر داتگ اَنت، نی آ شپ وابے جوڑ بوتگ اَنت، ءُ ھما واب کہ آئی ءِ تہ ءَ آشوب ءَ ساہ کش اِتگ نی یک جلسے ءِ گوشتانک جوڑ بوتگ اَنت۔ جنگ تھنا سلاھانی نہ بیت، بلکیں یاتگیرانی ھم بیت۔ یاتگیر گل ءِ درشاناں چہ ھلاس نہ بنت، آ ٹپی ئیں بالاداں، بے کل ءُ کسارتیں جوناں، گار ءُ بیگواھیں ماتانی دلاں آباد بہ اَنت۔

وھدے یک جُھدکارے سلاھاں دور دنت، گُڑا آ تھنا وتی دستاں ھالیگ نہ کنت بلکیں آ ھما جند ندر بیتگیں سرانی زیبائی ءَ ھم پُشت ءَ چگل دنت کہ آیاں سنگانی سر ءَ ھم وتی لیکہ تراشتگ اَنت۔۔۔، ھمایاں جنگ ءُ شوروھانی میان ءَ مھر بھر ءُ بانگ کُتگ۔۔۔ ءُ ھمایاں کہ جنگ ءَ موتک نہ دودمان جوڑ کُتگ۔ آیانی پاد ءُ کدمانی نشان گار کنگ نہ بنت، بلے آیانی رند پداں نہ جُنزگ ءِ گچین وت یک ٹپّے کہ تئی آیوکیں پدریچ ءِ بودناکی ءَ چانکر پاچیت۔ رھشونانی ردی، دمبرگ وتی جاہ ءَ، بلے اے درستاں چہ مستریں تباھی ھما بنت کہ جنگ ءِ یات کنوک کم بہ بنت ءُ شموشوک گیش بہ بنت۔
مھرنگ ءِ ھما بچکند چہ زندان ءَ دراھگ ءِ اُمیت ناں، بلکیں زندان ءَ بے مانا جوڑ کنگ ءِ جار اِنت۔ ھمے دمان ءَ وھدے استان آئی ءَ را آمیدگس ءَ پیش کنت اِنت، آ بس وتی دیم ءَ پیش نہ دار اِیت، بلکیں آ پورائیں استان ءَ یک آدینکے دستاں دنت، چمیشی ءَ چہ آ وتی زُلم ءَ را وتی چماں گوں گندگ ءَ لاچار بیت۔ ھِچ کبزہ گیریں اِستان وت ءَ اے وڑ ءَ چارگ نہ لوٹ ایت کہ توپک بے توار بہ بنت، ءُ زندانی گپ جنگ ءَ بہ بنت۔

زرمبشتانی ارواہ ھما رھشون نہ بنت کہ مائیکروپونانی دیم ءَ کارشونیاں وان انت، بلکیں ھما دروشماں بنت کہ آمید گس ءَ ابید سپائی ءَ ھم راست بنت۔ شھیدانی زیبائی اِشی ءِ تہ ءَ نہ اِنت کہ آ مُرتگ اَنت، بلکیں ھمیشی ءِ تہ ءَ اِنت کہ آ وتی لیکھانی سر ءَ مُرتگ اَنت۔ آیاں بچکنداں گوں مرگ امباز کُتگ، آ جنگ کنان ءَ مُرتگ اَنت۔ اگاں آیانی مرگ ءَ ما مرچیگیں سوڑگ ءِ رِد ءَ گوست ءِ کسہ جوڑ بہ کن ایں گُڑا ما آیانی جُونانی گون ءَ ناں، بلکیں آیانی لیکہ ءُ وابانی گوم ءَ گدّاری کنگ ءَ ایں۔

ھمائی ءَ کہ بچکند اِت، آئی ءَ ھچ سابت نہ کُت۔ آئی ءَ ھِچ چیز ھلاسی ءَ نہ اِشت۔ ھمائی ءَ کہ وتی سر جھل کُت، آئی ءَ ھچ چیز نہ دروہ اِت، بلے ھِچ چیز رکینت نہ کُت۔
اے راست اِنت کہ گھگیری مدام یکیں رنگ ءَ نہ اُوشت اِیت۔ وھد ءِ ھمراھی ءَ وتی کِشکاں مٹ کنت، بلے لیکہ ءِ رنگ ءُ دْروشم (شکل ءُ سورت) اگاں ھر اکس ءِ تہ ءَ درامد بہ لگّ اِیت، گڑا مارا تھنا دژمن ءِ سر ءَ اِنّا، وتی سر ءَ ھم شک کنگ لوٹ اِیت۔ چہ مئے تہ ءَ ھر ھما مردم کہ آ اے ندارگ ءَ گند اِیت، آ یک شاھدے۔ ناں تھنا ھمے سلاھانی کہ زمین ءِ سر ءَ ایر کَنگ بوتگ اَنت، بلکیں ھما بچکند ءِ ھم کہ آ زندان ءَ ودی بیتگ۔ آ کندگ اے سوڑگ نہ کنت کہ کے مجرم اِنت، بلکیں آ بس یات ایر کنت ءُ چہ یات ایر کنوک ءَ مستریں گھگیری کنوک کس بوت نہ کنت۔

زرمبشت جنگ ءُ کُشگ ءَ ھلاس نہ بنت، بلکیں ھما وھد ءَ ھلاس بنت وھدے ارس ءُ کندگ ھردو در سیاسی بہ بنت۔ آ ھما وھد ءَ ھلاس بنت وھدے سلاھانی وزن چہ مازگ ءِ وزن ءَ گیش بہ بنت۔ آ وھد ءَ جنگ ھلاس نہ بیت بلکیں اُوشت ءِ آماچ بیت۔ ھما جنگ ھلاس مہ بیت تھنا اُوشت ءِ آماچ بہ بیت، گُڑا آ پد ءَ کندگاں چہ واتر نئیت بلکیں چیھانٹانی تہ ءَ ردوم زیر اِیت۔
بہ گندے راست ھمیش اِنت کہ ھما کند اِیت، ھما گُڈّی سپاھیگ بیت۔ ھما بے توار بیت، گُڑا بزاں کہ آئی ءَ پیسر ءَ وتی درست گْوشتگ اَنت۔