نبشتہ کار: ڈاکٹر اللہ نزر بلوچ
رجانک: سرباز وپا
ماھتاک اسپر ءِ اپریل 2025 ءِ تاک
جنگ چہ یکشلیں مڑگ ءَ کٹگ بیت۔ بلوچ راجی جنگ ءِ درچ ءَ دژمن سسائی نادراہ کرتگ۔ یک پنجاپی سروکے ءِ گوشگ اِنت کہ” بلوچ ءَ کج ءَ گند ئے تیر بجن”بلکیں اے وھد ءَ نابزانتیں مرد سرپد نہ اِنت کہ چہ پاکستان ءِ جوڑ بوگ ءَ پد زوت آئی مستراں اے کار بندات کرتگ۔ بلوچاں پہ آپ ءِ لوٹ ءَ لاش چست کرتگ، پہ بجلی ءِ لوٹ ءَ ھونریتکگ ءُ پہ راشن ءَ جھد کرتگ گڑا ایشی جاہ ءَ لاش دزکپتگ۔ جنجالانی اوپار کنوک دگر اَنت۔
بلوچ راج ءَ زانشت ءِ بنیاد ءَ ھمے سوڑگ کرتگ کہ اے ڈیھ ءِ تہ ءَ زند گوازینگ بلوچ چکچینی ءِ گیشتر کنگ ءُ بے توار بوگ مرگ زانگ بیت۔ گوست ءِ زرمبشتانی وڑ ءَ گوستگیں دو دھک اِنت جنگ برجاہ اِنت، اے نہ ایوک ءَ تیز کنگ بوتگ بلکیں سرجمیں راج ھوار بوتگ ءُ اے گیشتر مھکم کنگ بوتگ۔ نوں بلوچ راستی ءَ سرپد اِنت چی ءَ کہ زوریں بیگواھی ءُ کشگ ءُ چیریں کبراں کل کنگ بوتگیں شھیدانی لاشاں اے جنگ ءِ راستی پاشک کرتگ۔ چہ درسیں ریاستی ناشری، زوراکی ءُ چکچینی ءَ ابید بلوچ راج ءَ سر جھل نہ کرتگ۔
نوں پنجاپ ءِ ناشریں لشکری سرکار ھمے گوش اِیت کہ آئی ءَ « رول آف گیم » ( قواعد جنگ ) مٹ کرتگ۔ بلے آ اے راستی ءَ سرپد نہ اِنت کہ بلوچ ءَ چہ ایشی ءَ پیش اے راھبند مٹ کرتگ۔ پنجاب چہ زری سیمسراں گستائیں دمگے ءُ چاریں نیمگ ءَ ھشکی ءِ تہ ءَ اِنت۔ پہ وتی وشھالی ءُ آیوکیں پدریچ ءِ باندات ءِ گھتر کنگ ءَ بلوچ سرڈگار ءِ مڈیانی سر ءَ زورگپتی درکار اِنت۔ پہ ھمے مول ءِ پارست ءَ آ چونیں ھم انسانی یا دودمانی راھبنداں لگتمال کنگ ءُ بلوچ راج ءُ پہ آجوئی زرمبشت ءِ بگیری ءَ وتی سرجمیں توان ءُ ناشریاں کارمرز کنگ ءَ اِنت۔
من گوں وتی راج ءَ دزبندی کن آں کہ مارا گوں سبر، مھکمی، زانت ءُ بیسہ ءِ بنیاد ءَ وتی جھد برجاہ دارگی اِنت۔ راچ چہ جنگ، ڈکال ءُ توپاناں ھلاس نہ بنت بلکیں چہ سند ءُ سیل ءُ وتی اوپار نہ کنگ ءُ گوں انچیں جیڑھاں مانگیشگ ءَ تباہ بنت۔ پمیشکا تپاک، یکجھتی ءُ گوں زانت ءَ آجوئی جھد ءَ ھوار بوگ مئے پدریچ ءِ مانزمان اِنت۔
بلوچ سرمچار گوں سسا ءُ بودناکی ءَ آجوئی ءِ جنگ ءَ مڑگ ءَ اَنت۔ ایشی درور بلکیں دمگ ءَ ھچ جاہ ءَ دست مہ کپ ایت۔ اگاں بلوچ راجی آجوئی ءَ ھوار بوگ ءِ گپ اِنت گڑا اے ایردستی ءِ بگیری ءَ گھگیری ءِ مارشت بے مٹ اِنت۔ انوں گوست ءِ راجی آجوئی جنگاں اے وڑیں زانت ءُ کرد ءِ بنیاد ءَ منانک نیست۔ یک راجی رھشونے ءَ زانگ لوٹ اِیت ءُ دژمن ءِ مکاری، چالاکی ءُ چہ تھی دژمناں باسما بوگ لوٹ اِیت گڑا جنگ کٹگ بیت۔
بلوچ سرمچار چہ ھیلھاں شریں وڑے ءَ سرپد اَنت ءُ من پہ پھرے گوش آں کہ انسانی نزوریاں ابید بلوچ سرمچار آجوئی ءِ ھکی ئیں رھبر اَنت۔ من دژمن ءُ بلوچ راج ءِ میان ءَ ساڑی ئیں ھمے دوست ءُ دلاراں ھمے کلوہ ءَ دیگ لوٹ آں کہ بلوچستان نہ جاپنا اِنت، نہ آئرلینڈ ءُ نہ سوات۔ دژمن ءَ ھمے سرپد بوگی اِنت کہ نوکیں ٹیکنالوجی ءُ ھندی ناشرکارانی کمک ءَ ابید آ چہ بلوچستان ءِ زمینی کچ ءُ کساس ءَ نابلد اَنت۔
منی سلاہ اِنت اگاں آ وتی تاواناں گمان کرت کنت گڑا بلوچستان ءَ یل بہ کنت پہ آئی ءَ گھتر اِنت۔ اگاں نہ پہ پنڈگ ءَ جنگ سوبین نہ بنت ءُ پروش آئی نسیب ءَ اِنت۔ ڈاکٹر مالک بلوچ ءِ رد ءَ گوادر بالی پٹ جنگی مول ءَ بندگ بوتگ۔ چہ ایشی ءَ ھمے پدر بیت کہ ڈی سی پورٹ زر ءِ جھلانکی ءَ گوادر بندرگاہ پہ جنگی مول ءَ کارمرز بوگ ءَ اِنت۔ اے مدام مئے لیکہ بیتگ۔ پکائیں بنشونے ءِ رد ءَ گوادر ءَ چینی سب میرین ءُ پی ایل اے ( پیپلز لبریشن آرمی) ءِ کارمند آرگ بیتگ اَنت۔ چہ ایشی ءَ ھمے پدر بوگ ءَ اِنت کہ اے گرمیں آپانی سر ءَ جھان ءِ نوکیں مچی یے جوڑ بوگ ءَ اِنت۔
چہ ایشی ءَ ابید دژمن بلوچستان ءَ وتی مرتگیں لشکریانی راستیں کچ ءَ ھم سرپد نہ اِنت۔ اے لس مردمے ءِ گپ نہ اَنت بلکیں ڈی جی آئی ایس آئی ءِ گوشگ اِنت۔ اگاں اے جنگ ءَ میان استمانی توانمند ھوار بہ بنت بوت کنت کہ پنجاپ وتی ھمساھگیں ڈیھے ءِ بھر بہ بیت۔
