کتاب: “بلوچ ءُ آرین سیادی” ءِ سر ءَ چمشانکے

چمشانک: سلام نور

اے لیکہ دارگ کہ بلوچانی بِنداتی سْیادی گوں آرین ءَ اِنت ءُ آیاں لڈّ ءُ بار کتگ اے سرزمین ءَ جاہ منند بوتگ اَنت۔ چوش گْوشگ کہ اے بلوچانی وتن نہ اِنت۔ ڈاکٹر پاروک بلوچ (ڈاکٹر فاروق بلوچ) ءَ بلوچ ءُ آرین ءِ بُنکّی سْیادی ءِ اے لیکہ سرجم ءَ رَد کتگ۔ ڈاکٹر ءَ راجدپتری راستی دیم ءَ آؤرتگ ءُ آ گْوش اِیت بلوچ کَرناں چہ ھمے زمین ءِ واھُند ءُ ھمد ءَ زند گْوازینگ ءَ اِنت۔ اے بلوچ ءِ سرزمین اِنت، بلوچ مھرگڑھ ءِ وارس اِنت۔

ڈاکٹر پاروک بلوچ ءِ کسانیں پجّارے:

ڈاکٹر پاروک بلوچ منی نزّیک ءَ مرچی ئیں اَھد ءِ بلوچ راجدپتر نویسانی لَڑ ءِ مَستریں نام اِنت، چی ءَ کہ ڈاکٹر ءَ پٹ ءُ پولی کار کتگ ءُ منّوگری ءِ کار نہ کرتگ۔ آئی ءِ پٹ ءُ پولکاری ءُ بَلدی بلوچ راجدپتر اِنت۔ آئی ءِ بُنکّی جاہ مستونگ اِنت، بلے واجہ نوزدہ سد شست ءُ شش ءِ سال ءَ ماں شال ءَ ودی بوتگ۔ بنداتی وانگ ءُ زانگ چہ سَنڈیمن ھائی اسکول ءُ دوازھمی تبک ءِ وانگ چہ بلوچستان بورڈ کوئٹہ ءَ دَر برتگ۔ پد ءَ وتی بی اے، ایم پِل ءُ پی ایچ ڈی گْوستانک (تاریخ) ءِ توکا ماں بلوچستان شھدربرجاہ شال ءَ سرجم کرتگ۔ ماں گْوشت کن اِیں کہ واجہ ءَ وتی سرجمیں زانشتی سپر چہ کوئٹہ بلوچستان ءَ سرجم کرتگ۔
آئی ءِ ایم پِل ءِ تھیسسز ھان نسجر ھان نوری (خان نصیر خان نوری) ءِ سر ءَ اِنت ءُ پی ایچ ڈی مکران ءِ لبزانک، سیاست ءُ دودمان ءِ سر ءَ اِنت ءُ دو ھزار شانزدہ ءَ سرجم بوتگ۔ ایشاں ابید آئی ءَ وتی لبزانکی سپر ءَ سی ءُ چار ءَ چہ گیش نبشتانک ماں اُستمانی ءُ میان اُستمانی جرنلاں چاپ ءُ شنگ کرتگ۔ ھندوستان ءِ دمگ کیرالہ ءَ آئی ءِ دو آرٹیکل اُوں چاپ بوتگ۔ واجہ ءَ کساس سی سال بیت کہ وانگ، نبشتہ ءُ وانینگ ءِ پِڑ ءَ کار ءَ اِنت۔ بلوچستان ءِ راجدپتر ءِ سر ءَ نبشتہ ءُ پٹ ءُ پول کنگ ءَ اِنت۔ ڈاکٹر ءَ تَنی وھدی بلوچستان ءُ آئی ءِ راجدپتر ءِ سر ءَ سینزدہ کتاب چاپ ءُ شنگ کرتگ ءُ لھتیں کتاب اَنگت ماں پریس ءَ اَنت کہ ھمے زوتاں چاپ ءُ شنگ کنگ بنت۔ بلوچستان ءِ آثار ءِ قدیمہ ھمے زوتاں چاپ ءُ شنگ بوتگ۔ ھمیشانی توکا کتاب ” بلوچ اور آریائی تعلقات” ھم ھوار اِنت۔ ایشاں ھوار آ دو بوکلٹ ءِ نبشتہ کار اِنت کہ یکّے نمیرانیں واجہ یوسپ مگسی ءُ دومی اِیشیا ءِ توکا مھرگڑھ ءِ اَرزشت ءِ سر ءَ اِنت۔ واجہ ءَ پہ لوک ورثہ ءُ ایچ ایس سی ءِ واستا بیست ءُ ھشت پروجیکٹ ماں نبشتھی دروشم ءَ سرجم کرتگ ءُ سر کرتگ اَنت۔

راجدپتری پٹ ءُ پولکاری ءَ اَبید ڈاکٹر ءَ بی ایس او ءِ پلیٹ پارم ءَ داں شانزدہ سال ءَ سیاست کرتگ۔ نوزدہ سد ءُ ھپتاد ءُ ھشت ءَ بہ گرداں نوزدہ سد ءُ نَود ءُ چار ءَ آ بی ایس او ءِ یک مُھکمیں باسکے بوتگ۔
واجہ ءَ لبزانک ءُ گْوستانک (ادب ءُ تاریخ) ءَ ابید سیاست ءِ توکا اُوں وتی جوانیں کردے پیشداشتگ۔ ڈاکٹر ءِ گْوشگ ھمیش اَت کہ منی جھد ھمیش بوتگ کہ پہ بلوچستان ءُ بلوچ چاگرد ءِ دیمروئی ءَ وتی یک جوانیں کردے پیلو بہ کناں۔ مئے لوٹ ھمیش اِنت کہ واجہ توانگر ءُ نبشتہ کنان بات۔
اِد ءَ من اے گْوشاں کہ ڈاکٹر ءِ زِند ءُ اِزم ءِ بابت ءَ دْراہیں بُرز ءِ ھبر ءُ ھیال واجہ ءِ وَتیگ اَنت۔ منی ھُب دارگ ءُ سوج ءِ پَد ءَ ڈاکٹر ساھب ءَ منءَ سر کُرتگ اَنت۔ اے دَرگت ءَ من واجہ ءِ منتوار آں۔

بلوچ ءِ بنداتی سْیادی ءِ جیڑہ:

بلوچ ءِ بِنداتی راجدپتر دَری نبشتہ کار، راجدپتر نویس ءُ پٹ ءُ پولکاراں نبشتگ اَنت۔ اے نبشتہ کارانی توکا یونانی، اَرب، پارسی ھَوار اَنت۔ بلوچ ءِ بَدبھتی اے بوتگ کہ وھدے ھکمرانی یے کرتگ داں آئی ءَ وتی گْوستانک، لبزانک، دودمان (تاریخ، ادب، ثقافت) ءِ سر ءَ نبشتھی دْروشم ءَ چوشیں ایمنیں کارے نہ کُرتگ۔ ءُ نبشتھی رَنگ میان اُستمانی کالب ءَ اُوں ھمے دو ھزار سال بیت کہ دیم ءَ اَتکگ۔ دومی جیڑہ ایش بوتگ کہ بلوچ ءِ زند یکّے وَ پِری کالونیل دؤر ءَ بوتگ کہ
آودا نِبشتھی کار اِنچو شاھگان نہ بوتگ۔ دومی کالونیل اَھد اِنت کہ آودا ھما زوراک ءُ کالونائزر ءِ اَھد ءَ لبزانک ءُ راجدپتر نبشتہ بوتگ ءُ نَد زورآور ءِ بوتگ۔ اے چیریں ھبرے نہ اِنت کہ ھر توانگریں راج وتی لبزانک ءُ راجدپتر ءَ وتی تب ءَ نبشتہ کنت ءُ برٹشر ءَ اُوں انچوش کرتگ۔ لانگ ورتھ ڈیمز، پوٹنگر ءُ رالنسن ءِ وڑیں دَری نبشتہ کاراں بلوچ ءِ راجدپتر نبشتہ کتگ۔ اِشی ءَ مئے راجدپتر انچوش بیان ءُ دَرشان کرتگ کہ راستی باز چیر تَر اِتگ۔
چوش کہ ایشاں گْوشتگ کہ بلوچ اِد ءِ جاہ منند نہ اَنت ءُ کَسے ءَ نبشتہ کرتگ کہ اے سامی النسل اَنت، کسے ءَ مارا اَرب، تُرک، آرین، راجپوت گْوشتگ، کسے ءَ ھندو ءُ کسے ءَ نمرود ءُ یکّے ءَ مارا ھزرت ھمزہ (حضرت حمزہ) ءِ اولاد گْوشتگ کہ چہ ھلب ( Allepo) ءَ اتکگ ءُ کوہ ء البرز ءَ نِشتگ اَنت۔ لانگ ورتھ ڈیمز ءَ بلوچ ءَ را ایرانی النسل گْوشتگ۔

سیمی بدبھتی اے بوتگ کہ وھدے کالونیل اَھد ءَ بلوچ ءِ وتی راجدپتر نویس کہ نبشتہ بندات کَن اَنت داں آ برٹش ءِ بیانیہ ءَ دیم کار اَنت ءُ توان بَکش اَنت۔ اے نبشتہ کار اُوں چو برٹش ءُ انگریز نبشتہ کارانی وڑ ءَ جتائیں لیکہ ءُ تھیوری ءِ منّوگر بوتگ اَنت۔ پہ دَرور؛ سردار ھان گیشکوری بلوچ ءَ اَرب گْوش اِیت ءُ رالنسن ءِ بیانیہ ءِ منّوگر اِنت۔ اھمد یار ھان پوٹنگر ءِ لیکہ ءِ منّوگر اِنت۔
اِد ءَ دگہ یک دردیگیں ھبرے ایش اِنت کہ ڈاکٹر اِنایت اللہ بلوچ ءِ وڑیں دانشمند، لبزانکار پٹّ ءُ پولکار وتی کتاب ” بلوچستان ءِ جیڑہ ” ءِ توکا چوش نبشتہ کنت کہ ” بہرحال، یہ نظریہ کہ بلوچ، اِس سرزمین کے اصلی باسی ہیں، اس کی کوئی تاریخی بنیاد نہیں اور چند دانشور ہی اس نظریہ کے حامی ہیں۔”
اِد ءَ راجدپتر گیش پادمال ءُ لگتمال بوتگ۔ چی ءَ کہ بلوچ راجدپتر نویساں پٹ ءُ پولی کار کم ءُ منّوگری ءِ کار گیش کرتگ۔ پٹ ءُ پولی کار بوتیں ءُ برٹش ءِ درشان گوں جُھلی ءَ چار ءُ تپّاس کنگ بوتیں داں جیڑہ کم بوتگ اِتاں ءُ مروچی ئیں بلوچ راجدپتر نویس بلوچ ءِ بُنکّی سْیادی ءِ جیڑہ ءِ نبشتہ کنگ ءُ اے ڈسکشن ءَ نہ اَت اَنت۔ بہ گندے دِگہ سرھال ءُ جیڑھانی گیش ءُ گیوار کنگ ءَ اِت اَنت۔

بابا ءِ راجدپتر ھیروڈیٹس ءُ بازیں اَرب ءُ یونانی نبشتہ کار بلوچ ءَ اے زمین ءِ واھُند بوگ ءُ چہ کرناں زند گْوازینگ ءِ شاھدی ءَ دے اَنت، بلے وتی راجدپتر نویس برٹش ءِ مکّاریانی پوہ نہ بوگ ءُ پٹ ءُ پولی کار نہ کنگ ءِ سبب ءَ وتا ءُ وتی راج ءَ را وتی زمین ءَ درامد کن اَنت ءُ اے زمین ءُ راجدپتر ءَ چیر ترّین اَنت۔
وش بَھتی ایش اِنت کہ ھستیں وھد ءِ بلوچ دانشور، دورچار، پولکار ءُ راجدپتر نویس ڈاکٹر پاروک ساھب ءَ ایشاں چہ بازیں تھیوری ءِ رَد کرتگ ءُ وتی ریسرچ ءُ پولکاری دیم ءَ آؤرتگ ءُ دگنیا ءَ را اے ھبر رسینتگ کہ بلوچ مھرگڑھ ءِ وارس اَنت ءُ اے سرزمین ءِ ھکّیگیں مالک اَنت۔ اے بلوچے مروچی وش بَھتی اِنت۔

پاروک ساھب ءَ وتی بازیں کتابانی تہ ءَ بلوچ ءِ بِنداتی سْیادی گوں دَری راجانی ھمے اے سِنچ ءُ منّگ ءَ مَٹ کتگ ءُ پٹ ءُ پولی، سما ءُ سسّائی رنگ ءَ بلوچ ءِ ھکّیگیں، بنکّی راجدپتر دیم ءَ آؤرتگ۔ دیمتر ءَ ما چار اِیں آیاں اَبید ڈاکٹر ءَ بلوچ ءُ آرین ءِ بنکّی سْیادی چوں گیشینتگ ءُ بلوچ ءِ ھمد ءَ بوگ ءُ زند گوازینگ ءَ ابید اے زمین ءِ وارس بوگ ءِ پجّار چوں رکّینتگ؟

بلوچ ءُ آرین سْیادی ءِ سرا تْرانے:

ڈاکٹر ءِ ھستیں پَٹ ءُ پولاں چہ اے لیکہ گیش تَچک بیت کہ بلوچ زاگروس ءِ بُرزیں کوھاں بِہ گر داں دریا ء سندھ ءِ کش ءُ کِرّا ھزاراں سال پیش اے جاہ ءِ نِندوک ءُ آئی ءِ واھُند بوتگ اَنت۔ کوہ ء البرز ءَ بہ گر داں دریا ء سندھ ءَ۔
ھمے وڑ ءَ آرین ءِ جند وت دَرامد اَنت۔ شانزدھمی کرن ءَ پیش اے ھند ءُ دمگاں آرین ءِ نام ءُ ڈَس نہ بوتگ ءُ بلوچ دو ھزار ءُ یک سد سال ءَ پیسر اے ھند ءُ دمگاں جاہ منند بوتگ اَنت۔ بابائے راجدپتر ھیروڈوٹس بلوچ ءِ ٹکّانی درشان وتی کتاب ءِ توکا کُرتگ کہ مرچی ھم گوں مُھکمی ءَ ھمے زمین ءِ سر ءَ جاہ منند اَنت۔
اَربانی، منگولانی، ترک ءُ یونانیانی داں سی سال ءَ یَکشل ءَ اے ھند ءُ دمگاں الگار ءُ اُرش کرتگ۔ بلوچ آیانی دیم ءَ چو کوہ ء البرز ءَ مِک بوتگ ءُ گھگیری اِش کرتگ۔ جُست اے بوت کنت کہ اگاں یک راجے کہ آ لڈّ ءُ بار کنوکے بہ بیت، برے جاھے ءَ اِنت گُڑا آ چتور انچو ھزار سال جنگ کنت ءُ وتی جان ءُ مال ءَ تاوان دنت۔ اے گپّاں یک لس بنی آدمے ءُ یک نودربرے ھم باور نہ کنت۔ بلے اے گپ ڈاکٹر ءَ جوانیں دابے ءَ گیشنتگ کہ اے زمین ءَ کہ بلوچ نِشتگ، اے بلوچ ءِ زمین اِنت، منی زمین اِنت۔
اے اوگان، اَرب، ترک، منگولاں بلکیں اَنگت بازیں زمینے برتگ۔ چوش کہ اَوگانِستان(افغانستان) ءِ شھر کندھار ءِ گوستگیں نام داں منگول ءِ اُرشاں۔ ” بیلوث” بوتگ۔ ءُ اے شھر آ وھد ءَ بلوچستان سوبہ ءِ capital بوتگ۔ داں کُراسان (خرّاسان) ءَ آشکانی ءِ بوگ ءِ زکر ھست کہ بلوچانی مزنیں ٹکّے۔
ھما راجمان کہ ھان ء آزم (خانِ اعظم) میر نسیر ھان نوری ءَ ایر کُرتگ آ مرچیگیں بلوچستان ءَ چہ باز مزن ءُ شاھگان بوتگ کہ مروچیگیں بلوچستان ایران، سیستان ، سندھ، پنجاب، اَوگانِستان ءُ کے پی کے ءَ داں بھر ءُ بانگ اِنت۔

البت! بلوچ ءِ لڈّ ءُ بار، سرانہ (خانہ بدوش) بوگ ءِ داں آودا گپ بیت۔ تو راجدپتر ءِ بابا ھیروڈوٹس اُوں اے ھیال ءِ منّوگر اِنت ءُ وتی کتاب ءِ توکا نبشتھی دْروشم ءَ جاھے داتگ۔ بلے آ سرجمیں راج ءَ پہ اے ھیالاں درشان نہ کنت، آ چوش نبشتہ کنت کہ چندیں ٹکّاں پہ آسراتی ءُ مال ءِ شوھاز ءَ سپر کرتگ ءُ ایندگہ ٹکّاں وتی وتی دمگاں ءُ زمین ءَ نندوک بوتگ اَنت۔ سرجمیں راج سرانہ (خانہ بدوش) بوتگ چوش نہ اِنت۔ آ زمانگاں نہ تھنا بلوچ بلکیں ھر ٹکّ ءُ ھمک دمگ ءُ زمین ءَ واپاری، یکّے دومی ءِ دمگاں مال برداری ءُ روزگار ءُ مڈّی ءِ شوھاز ءَ ھر راج ءَ چوش کتگ، آیاں وتی زمین ءَ پہ چی ءَ درامد کنگ نہ بوتگ اَنت؟
ارزانیں گپ ایش اِنت کہ آ وت وتی نبشتہ کار بوتگ، وت ءَ ھچبر وتی زمین ءَ درامد نہ کن اَنت۔ بلوچ کہ مھر گڑھ ءِ وڑیں بے مٹّیں دودمانے ءَ چہ در کپتگین اِنت ءُ آ درامد اِنت، اَجب نہ اِنت؟

ھمے رنگ ءَ آرین ءِ بنداتی ھنکین ءِ باروا چوشیں جوانیں نبشتہ ءُ ترانے دیم ءَ انگت نیاتکگ۔ البت اے گپ دیم ءَ اتکگ اَنت کہ ایشانی بنداتی ھنکین سائیبیرین لینڈ اِنت۔ وھدے بَرپی دؤر کہ کئیت داں آودا نندگ ءُ زِند گْوازینگ گْران کپ اِیت۔ گُڑا اے ھما ھند ءُ دمگاں چہ در کپتگ ءُ دو ھزار سال پیسر دیم پہ ترکی ءِ زرباری ھنداں اَتکگ ءُ پد ءَ آزربائیجان، ھندوستان ءُ ایران ءَ داں سر بوتگ اَنت۔ چی ءَ کہ اُود ءَ وھدے ھچ نہ مان اِیت گڑا آ وتی مال ءُ دلوتاں ءُ وتی زند ءِ رکّینگ ءِ واستا سپر کَن اَنت ءُ ھما جاہ ءُ دَمگاں رَو اَنت کہ اُود ءَ میزر ءُ آسراتی گیش اِنت۔ چوش کہ اے سالانی کساس ءَ سپر کنان ءُ پیداک اَنت۔ گُڑا ایشانی پَدی کہ پدریچ آیان بوتگ داں آیاں وتی بنکی جاہ شموشتگ۔

یک نبشتہ کارے ای مارسڑن نبشتہ کنت کہ ھندوستان ءِ کْوہنیں کتاب کہ اُود ءَ ھندوستان ءَ نندوک بیوکیں مردمانی زکر ھست، آئی ءِ توکا چوش نبشتہ اِنت کہ دو ھزار سال پیسر ءَ ھندوستان ءِ بُرزی نیمگ ءَ لھتیں انچیں کوم نِندوک بوتگ کہ آیاں وتا آرین گْوشتگ۔

ھمے نبشتہ کار دیم ءَ نبشتہ کنت کہ ھمے کوم ءِ لھتیں ٹکّ پد ءَ دیمتر ءَ رو اَنت پارس ءَ نِند اَنت کہ ایشی ءَ چہ آئی ءِ نام ایران نبشتہ کنگ بیت، بلے ڈاکٹر ءَ آرین ءِ سبب ءَ ایران ءِ نام پر کنگ ءِ اے لیکہ سرجم ءَ رَد کرتگ۔
چی ءَ کہ آیانی آھگ ءَ پیسر اے دمگاں کوہ ء البرز ءُ زاگروس ءِ کوھی مردمانی ھکومت بوتگ کہ راجدپتر ءِ توکا آ پیش دادی ءِ نام ءَ زانگ بنت ءُ کُردانی اُوں راجمانی بوتگ۔ آیاں چہ پد ھکومت میدانی بوتگ کہ باز تاکتور ءُ زورآور بوتگ اَنت ءُ اے جاہ آیاں رَند ءَ مادستان ءِ نام داتگ۔ آرین آیانی انچو تاکت نہ بوتگ کہ گوں ایشاں میڑ بہ کن اَنت، بلکیں آ نشتگ ءُ میداں سالانہ سُنگ داتگ۔ پدا وھدے کہ مید نزور بنت ءُ آرین ءَ تاکت رس اِیت داں آ میدانی سر ءَ اُرش TV کن اَنت ءُ آرین ءِ سئے ٹکّانی توکا یک ٹکّے بِزاں کہ ھکامنشی (ہخامنشی) آرین اے جاہ ءَ زورگر بنت ءُ اے جاہ ءَ پارس ءِ نام دے اَنت، بلے مید آرین نہ بوتگ اَنت۔

اِد ءَ اے گپ ھژدری اِنت کہ آریناں اُرش کرتگ ءُ نہ نِشتگ اَنت، بندات ءَ گوں ھاموشی ءَ پارس ءَ اتکگ ءُ نشتگ اَنت۔ آرین ءِ آھگ ءَ پیسر اے دمگاں پارس ءَ پیش دادی ھکومت چہ کرناں راج کنان ءُ آیان اِنت، آیانی یک پجّارے بوتگ۔ یک دودمان ءُ راجدانی یے بوتگ، پوجی، چاگردی ءُ مالی مھکمیں اسٹرکچرے ھست بوتگ۔
ڈاکٹر ساھب ءَ چہ وھدے من سوج کُرت داں آئی ءَ پسّو ءَ آرین ءِ بندات ءَ جنگجو، زورآور ءُ اُرش کنوک ءِ اے سِنچ ءِ پلّہ مَرزی نہ کُرت۔ کماش ءِ گْوشگ ھمیش اَت کہ بنداتی آمد ءَ اے باز مسکین ءُ بزّگیں مردم بوتگ اَنت۔ تو اے وڑیں نزوریں سئے ٹکّاں کہ آیانی نپری انچوش نہ بوتگ داں آ چو یک پیسر ءِ تاکتوریں راجے ءِ سر ءَ اُرش کن اَنت کہ آ وت وتی جان ءُ مال ءِ رکّینگ ءِ ھاتر ءَ اے زمیناں اَتکگ۔ آرین وت اے ھنداں بندات ءَ سرانوی (خانہ بدوشی) زندے ءَ سر بوتگ۔ وھدے پیش دادی نزور بنت داں آرین گڈّی پیش دادی ھکمران زھاک (ضحاک) ءَ پروش دے اَنت ءُ راجدانی ءِ سروک بنت ءُ اولی ھکامنشی (ہخامنشی) ھکمران سائرس دیم ءَ کئیت۔

دگہ گپّے ایش اِنت کہ اے دمگ اِنچو سبز ءُ شاداب نہ بوتگ اَنت ءُ مروچی ئیں زمینی راستی اُوں ھمیش اَنت کہ اد ءَ انچو لشکر گوں مال ءُ دلوتاں اِنچو وھد بہ گْوازینتیں کہ ھچ نہ مان اِیت ءُ بلوچ ءِ جند پہ آسراتی ءِ پٹ ءُ لوٹ ءَ سپر کنگ ءَ اِنت۔

اے ھبر چیر نہ انت کہ ھزرت اُمر پاروک (حضرت عمر فارق) ءِ دؤر ءَ اَرب کاسد ءَ اے زمین ءِ تنگی ءِ باروا آئی ءَ را ھال سر کُتگ کہ زمینی تنگی سازگار نہ اَنت۔ ھمے ھال انگریز کاسداں اُوں تاج ء برتانیہ ءَ را سر کرتگ۔ وھدے کَسے ءَ اگاں اے زمینی جاور مان نیاؤرتگ اَنت ءُ لگتمال کُرتگ اَنت داں آئی ءِ درور سکندر ءُ سائرس ءِ وڑ ءَ رُسوا بنت کہ مکران ءِ سوبمندی ءِ ھاتر ءَ پہ سائرس ءِ آھگ ءُ رسوائی راجدپتر ءَ نَکش اِنت کہ تھنا آئی ءِ ھپت سپاھیگ پَش کپ اِیت، ایندگہ گُژن ءُ تُنّ ءَ ساہ دے اَنت۔ سکندر ءِ اُوں ھال ھمے داب ءَ بیت کہ وھدے آ اے دمگاں سپر کنگ ءُ دیم ءَ جُنزگ ءَ بیت۔ ءُ زاگروس ءِ بُرزی ھند ءُ دمگاں نندوک کرد بوتگ اَنت۔ راجدپتر نویساں اے کوچ ءُ بلوچ نبشتہ کرتگ اَنت۔ چوش کہ کْوھنیں بلوچی شائری ءِ اے چندیں گال دیم ءَ کاینت کہ

وش اِت اَنت اھدی دور بلوچانی
سبز اِت اَنت تلّ ءَ سَنج اِت اَنت تازی
کُرد اٚت اَنت مولائی دَپ ءِ شھجو
چاکری ھاریں گورم ءَ چَرت اَنت

ایران ءَ اے شانزدمی کرن ءَ گوں وتی بازیں ٹکّاں اولی ءَ کُرّاسان، پد ءَ ایران ءَ کاینت ءُ ھمے ٹکّانی سبب ءَ اے بازار گد گوشگ بوتگ۔ پد ءَ پارس، پارس گرد، پژاگرد ءَ پد داں گڈّی ءَ ھَندی نام ءِ سبب ءَ پارس گوشگ بوتگ۔ بازین ءِ پارس ءَ ابید سوبہ ءِ شیراز ءَ اُوں جاہ مِنند بوتگ اَنت۔
آرین ءِ گالبندی نام ءَ اُوں باز اکتلاپ (اختلاف) ھست۔ بازیں نبشتہ کار نبشتہ کنت کہ آریہ ءِ بِزانت دری مردم نوارد اِنت ءُ نبشتہ کار آر تیمے ءَ اُوں آری ءِ بِزانت درآمد ءُ دَری مردم نبشتہ کرتگ۔
دگہ جیڑھے ایشانی اے بوتگ کہ آرین ءِ جند ءِ جوانیں لٹریچرے نہ بوتگ کہ انسان ءَ آیانی زند گْوازینگ، زبان ءُ بُنکّی جاہ ءِ باروا مالوم کرت بہ کُتیں۔ من انچوش پیسر ءَ گْوشت کہ اے سپر کنوکیں مردم بوتگ ءُ یک جاھے ءِ جاہ منند نہ بوتگ اَنت، پمیشکا نبشتھی دْروشم ءَ آیانی یک جوانیں لبزانکے نیست کہ نبشتہ کار آیانی بُنکّی جاہ ءَ در گیپت بہ کن اَنت۔

البت! یک پوائنٹے ءِ سر ءَ سرجمیں راجدپتر نویس اے ھبر ءَ گوں تپاک کن اَنت کہ آرین اُرش کنوک بوتگ اَنت۔ سرانو (خانہ بدوش) بوتگ اَنت ءُ بے دودمان بوتگ اَنت۔ اِد ءِ جاہ منند نہ بوتگ اَنت ءُ اے دمگاں آیانی آھگ ءَ پیسر اد ءِ نندوکیں مردم ءُ ٹکّ یک جوانیں چاگردی، سیاسی ءُ زمینی بستارے ءَ گوں جاہ منند بوتگ ءُ راجدانی کنگ ءَ بوتگ اَنت۔

اے سرھال من باز گْونڈ گپتگ ءُ ایشی ءِ سر ءَ گیشتر تران بوت کنت۔

راجدپتری راستی ءَ چہ پدّر اِنت کہ اے زمین ءَ کہ مروچی بلوچ زند گْوازینگ ءَ اِنت کرناں چہ بلوچ ھمد ءَ نندوک ءُ ھمے ھنداں زند گوازینگ ءَ بوتگ۔ دَری نبشتہ کار ءُ انگریز ءِ اُرشاں پَد آیانی نبشتہ کاراں گوں وتی بَدیں ءُ سِلّیں نیّت ءَ مارا وتی جند ءِ سرزمین ءَ درامد کرتگ، بلے نوکیں لبزانک ءُ پولکار (ادب ءُ تحقیق) ءُ ڈاکٹر ساھب ءِ بازیں جھد ءُ جکانسری، پٹ ءُ لوٹ ءِ برورد اِنت کہ چیریں راستی دیم ءَ اتکگ کہ بلوچ ءِ نودربر ءُ مھلوک اے گپ ءِ باور کنگ ءَ ھچ چَک ءُ پد نہ بیت ءُ گوں دل ءَ بلوچ راج ءُ نودربر ڈاکٹر ساھب ءِ لیکہ ءِ پَدی ءَ کَن اَنت۔ بلوچ ءِ زمین ءُ راجدپتر ھست اِنت ءُ دائم مان اِیت۔

جور بیت جور جوابی بَدیں جْورانی دپ ءَ
شکّلیں زند گِھیں جور جوابانی پَد ءَ
(سید ھاشمی)