ائید ءُ تیر سپتیگیں جون ءِ سوگات

نبشتہ کار: بانی گُل

ائید ھما روچ اِنت کہ آئی آھگ ءَ درست مسلمان گل ءُ شادان بنت کہ ائید پیداک اِنت، چنچو  وھد ساری مردم تیاری کن اَنت کہ ائید بیت ما گل ءُ شادان بہ اِیں۔ کسے وتی گُدانی تیاری ءَ گوں گلائیش بیت، کسے وتی دگہ تیاری یے کنت، کسے گل بیت من وتی زھگ ءَ گنداں کسے گْوش اِیت من وتیی ماس ءُ پس ءَ گنداں، کسے وتی براس ءُ گْوھار ءِ گندگ ءَ گل بیت کہ ائید ءَ ما وت  ءَ گند اِیں، بلے ائید پہ گلامیں راج  ءَ نہ اِنت۔ پہ گلامیں راج ءَ ائید ھما روچ ءَ بیت کہ آیانی ڈیھ آجو بہ بیت۔

انچوش پہ مئے بلوچ راج ءَ ائید نہ اِنت، پرچا کہ ما گلام ءُ پہ گلام  ءَ ائید مانایے نہ دار اِیت۔ پہ گلامیں راج  ءَ ائید بہ بیت یا مہ بیت روچ،  ماہ ءُ سال یک وڑ ءَ روگ  ءَ اَنت۔ ھرروچ زار ءُ پریات اِنت، کسے ءِ بچّ زور بیگواہ کنگ بوتگ کسے ءِ ٹپّ ءُ ٹوریں جون دور دیگ بوتگ، گڑا گلامین راج چون ائید کنت؟ ھر گِس ءَ مئے ماس ءُ گْوھار گریوگ ءَ اَنت۔

مرچی بلوچستان ءَ چوشیں گِسے نیست آ گس ءَ کسے زور بیگوہ کنگ نہ بوتگ یا کہ زور بیگواہ نہ اِنت۔ ماس وداریگ اِنت کد منی بچ آجو بیت ءُ من وتی چمروک ءَ گنداں، کجام روچ ءَ ھمے وداری ئیں ماس ءِ بچّ واتر بیت ماس ھما روچ ءَ ائید کنت۔ بلے باز کم ماس وتی بچّاں پہ سلامتی گند اَنت گڑا بزان ماس ءَ وتی پچّ پد ءَ نوک پیداک کرتگ، گیشتر ماسانی بچ واتر کاینت بلے پیسری ئیں مردم نہ بہ اِنت۔ کسے دماگی ءِ ھالت شر نہ بیت ءُ کسے ءَ دگہ بیماری گون بنت۔

چوش کہ بازیں ماس ھست کہ زھگ ءِ ودار ءَ چنچو سال نشتگ اَنت کہ کد مئے زھگ واتر کئیت، بلے آئی ودار سرجم بیت ءُ زھگ کئیت، بلے پہ سلامتی نہ! بلکیں ٹپ ءُ ٹورین جون ءِ دْروشم ءَ کئیت ءُ ماس ءَ را سر بیت۔ گڑا اے ماس کج ءَ ائید کنت کہ آئی ءَ را ائید ءَ جون ءِ سوگاتے دیگ بیت؟

اے بلوچستان ءِ ھر گ٘س ءِ کسّہ اِنت، ھمے واستا پہ ما ائید نیست۔ مئے ائید ءِ وشی گوں گریوگاں بدل بہ اَنت، گڑا ما کج ءَ ائید کن اِیں؟ پہ ما ائید ائید نہ اِنت، پہ ما ائید یک کیامتے ءَ چہ ھچ رنگ ءَ کم نہ اِنت۔ کسے کہ اے شادھانی روچ ءَ وتی زھگ یا براس ءِ تیر سُپتگیں جون ءَ گند اِیت آ چوں ائید کنت؟

دومی مئے بچّ ءُ جِنک زالم ءِ زندان ءَ بند اَنت، اے نگیگیں جاورانی دیمپانی ءَ بلوچ کجام رنگ ءُ دْروشم ءَ ائید کنت ءُ شادمانی بیت۔ بلکیں آ ھمے وشیانی روچ ءَ زھگ ءِ ودار ءَ دگانی سر ءَ کپتگ، ھمے زھگ پہ وتی پتانی آجوئی ءَ دگانی سر ءَ در پہ در۔ جن پہ جود ءَ، گْوھار پہ برات ءَ کہ کد مئے چمانی روک کاینت ءُ ما ائید کن اِیں، ما  ھمے ائیدانی روچ ءَ پہ گریوگ گوازین اِیں، بلے ھمے ودار ءَ مئے بچّانی تیر سپتگین جوں مارا ائید  ءَ سوگات دیگ بہ اَنت۔

نوں مارا ودار کنگ نہ لوٹ اِیت کہ کد دگہ یکے ءِ تیر سُپتگیں جون ءَ زالم دور بہ دنت مارا گھگیری کنگ لوٹ اِیت۔ مارا یکمشت بوگ لوٹ اِیت، اے زلم ءِ ھلاپ ءَ جھد کنگ لوٹ اِیت، مارا وتی شیرزالیں جنک ءُ بچ چہ زالم ءِ زندان ءَ آجو کنگی اِنت، پہ آیانی آجوئی ءَ ءَ جنگ کنگ لوٹ اِیت۔ کجام وڑ بہ بیت توپک ءِ جنگ بہ بیت یا کلم ءِ جنگ بہ بیت مارا جھد کنگ لوٹ اِیت۔  اگاں ما زلم ءِ ھلاپ ءَ جھد نہ کُت، گڑا مارا گیش سکّیانی دیمپان بوگ لوٹ اِیت۔ اے نہ انت کہ منی براس منی پس زندان  ءَ بند اِنت ایوک ءَ من ءَ توار چست کنگی اِنت، بلکیں اے تیوگیں بلوچ کوم ءِ اے پرزندانی پرز اِنت۔

وھدے ما یکیں زمین ءِ سر ءَ نشتگ اِیں گڑا ما درست یک اِیں، مارا پرک کنگی نہ اِنت۔ گوں ھمے جھد ءَ دیم ءَ جُنزگی اِنت داں بیگواھیں بلوچ پُسّگ آجو ءُ ما وتی سرڈگار ءِ وتواجہ ءُ واھُند بہ بہ اِیں۔

دُرس بندیگ آجو باتاں

ما پہ آجوئی اِیمن باتاں