نبشتہ کار: مھناز ناگمان
دگنیا ءِ توکا ھما راج ایردست بنت کہ آ گلام اَنت، اگاں ما وت ءَ بہ چار اِیں گُڑا بلوچ راج یک زندگیں راجے ءُ یک سرزمینے ءِ وارس اِنت۔ آ مال ءُ مڈّیانی واجہ اِنت، پہ درور سُھر ءُ چاندی، رود ءُ گْرابھائیں سِنگ، تیل ءُ گیس، ایدگہ بازیں گْواجنے چہ بلوچستان ءَ در کپ اِیت، بلے اپسوز کہ بلوچستان ءِ مھلوک پہ چُنڈے نان ءَ در پہ در انت۔ چی ءَ کہ ما گلام اِیں، ھمے گلامی ءِ رستگیں مُزّ اِنت کہ مرچی مئے مات ءُ گْوھار دگانی سرءَ کپتگ اَنت۔ کسے ءِ برات ءُ کسے ءِ پت گار اِنت، کسے زھگ ءُ کسے ءِ لوگواجہ بیگواہ اِنت۔ ھمے ریاست لوٹ اِیت کہ کس بلوچستان ءِ نام ءَ مہ گیت، اگاں کسے بلوچ ءُ بلوچستان ءِ نام ءَ بہ گیت آ گار ءُ بیگواہ کنگ بیت یا آئی ءِ ژانگولیں لاش دور دیگ بیت۔
ھمے وڑ ءَ کبزہ ءَ بہ گر داں روچ ء مروچی زورگریں ریاست پاکستان بلوچانی ھونانی سودا ءَ جَنگ ءَ اِنت، بلوچ ءِ چُکچینی ءَ کنگ ءَ اِنت، آئی مال ءُ مڈّیاں لُٹّ ءُ پُل کنگ ءَ اِنت۔ آ ھمے لوٹ اِیت کہ بلوچ ھر وھد ءَ منی گلامی ءَ بہ کنت، بلے نوں بلوچ ءِ تہ ءَ زانت ودی بوتگ ءُ آ سرپد اِنت کہ آئی مال ءُ مڈّی چہ آئی ءَ پُلگ بوتگ ءُ بوَگ ءَ اَنت۔ آ ایردست پرے واستا جوڑ کنگ بوتگ کل وتی زرد ءِ دوھیں روچانی گْوازینگ ءَ ابید دگہ ھچ وڑیں راجی سُد ءُ سمایے مدار اِیت، بلے بلوچ نوں ھاموش نہ بیت ءُ وتی ھکّ ءِ لوٹ ءَ کنگ ءَ اِنت۔
مرچی ریاست ءِ ھمے زُلم ءُ زوراکیاں بلوچاناں پہ گْوانک ءُ توار ءِ چِست کنگ ءَ لاچار کتگ، بلوچ انچو ناوس کنگ بوتگ کہ آ وتی گس ءَ پہ ایمنی نشت نہ کنت۔ اگاں کسے ھمے جیڑ اِیت کہ من توار چست نہ کناں ھاموش باں، بلے ریاست اے نہ چار اِیت ءُ آ بس بلوچ کنت ءُ جنت۔
ریاست ھمے لوٹ اِیت کہ من بلوچ ءَ گار ءُ بیگواہ کناں یا آئی گوم ءَ زلم ءُ زوراکی کناں تُرس ءِ آماچ بیت، بلے بلوچ ھچبر تُرس ءِ آماچ نہ بوتگ ءُ انگت نہ بیت۔ آ گیشتر لاش دور دنت یا گار ءُ بیگواہ کنت بلوچ گیشتر مھکم بیت، شھیدانی ھون ءِ ھر رتگیں ترمپ بلوچ ءَ گیشتر مھکم ءُ پہ وتی مرادانی منزل ءَ سر کنت۔
چوش کہ بلوچ راج مرچی جْوانی ءَ سوھو ءُ سرپد اِنت کہ اے زلم ءُ زوراکی، گار ءُ بیگواہ کنگ، تیر سُپتگیں لاشانی دور دیگ بلوچ راج ءِ ایردست کنگ ءِ پندلے ءُ سبب گلامی انت۔ اگاں ما تپاک ءُ یک شت بہ بہ اِیں مارا ھچ وڑیں زلم پْروش دات نہ کنت، آجوئی مئے باندات ءُ منزل۔
