ریاست ءِ زوراکی ءُ مئے گیرت

نبشتہ کار: ایچ این بلوچ آبادی

دنیا جوڑ کنگ بیتگ ءُ کساس اربانی (سد کروڑ) ھساب ءَ مردم آباد بیتگ ءُ گوستگ، آیانی تہ ءَ وڑ وڑیں مردم بیتگ باز نزور ءُ گریب، باز زوراور، باز ھاکم ءُ بادشاہ، بازیں دگہ دگہ ھساب ءَ آباد بیتگ اَنت۔ ھمیشانی تہ ءَ زالمیں بادشاہ ھم بیتگ کہ آیاں مردم وتی گلام جوڑ کتگ اَنت ءُ آیانی کسانیں چک ءُ زھگ کُشتگ اَنت۔ جنین ءُ زالبول بندیگ کُتگ اَنت، بلے زلم ءَ شریں آکبت نیست۔

یک بادشاھے ھمنچو گیش زلم ءُ زوراکی کنت بزانکہ آ تباھی ءُ زوال ءِ نیمگ ءَ روگ ءَ اَنت، پمیشکا گوش اَنت زلم ءَ داں دیراں برجاہ نہ بیت ءُ پد ءَ آئی ءِ تباھی اِنت۔ گْوستانک ءَ ھرچی زالم ءُ زوراور بیتگ اَنت، ھمنچو آیاں زُلم ءُ زوراکی کتگ۔ ھما ایردستیں کوم ءُ مردماں زالماں گون دیم پہ دیمی جنگ کتگ، گڑا زالم ءَ پْروش وارتگ ءُ تباہ بیتگ۔ ریاستے یا ھاکمے زلم ءُ زوراکیاں بندات کنت گڑا بہ زان ات آئی تباھی وھد اتکگ ءُ زوالی نیمگ ءَ روگ ءَ اِنت۔

مروچی کہ  پلیتیں ریاست کہ مئے مات ءُ گوھارانی سر ءَ زوراکی کنگ ءَ اَنت، آیانی سر ءَ تیرگواری کنگ ءَ اَنت، لٹّ شاپ کنگ ءُ شھید کنگ ءَ اِنت۔ ھرنیمگ ءَ بہ چار ھون ءُ ارسانی ھار اِنت، ھر نیمگ ءَ پریات ءُ زار اِنت۔ ھمے ناپاکیں ریاست کہ مئے مات ءُ گوھاراں کم شرپ کنگ ءَ اِنت، آیانی زنچک ءُ گُشان ءَ دور دیگ ءَ اِنت، سردر کنگ ءَ اِنت، بلے مئے گیرت ءُ ایمان جھ نہ جنت۔

مارا ھچ سُد ءُ سما نیست، ما وت ءَ بلوچ گْوش اِیں گوھرام ءِ دلبند ءُ چاکر ءِ اوبادگ گْوش اِیں ، بلے ریاست ءَ مارا گون چے کتگ ما انگت پوب ءُ گندلاں وش واب اِیں۔ مئے گیرت ءُ ایمان جھ نہ جنت، مئے زھرگ جوش نہ جنت، نہ زاناں ما پرچا بے سد ءُ سما اِیں؟

سِلّیں ءُ کمشرپ، بے ننگ ءُ بے آپیں کومے (پنجاپی)  مئے شرپداریں مات ءُ گْوھارانی سر ءَ زوراکی کنت ءُ آیانی گُشان ءَ پچ گیپت ءُ جھل ءَ دور دنت، پہ بلوچاں چے پشت کپتگ۔ بانکیں گْوھار کہ پہ مارا جھد کنگ ءَ اِنت مئے راج ءِ واستا ءُ راج ءِ بانداتے واستا وت ءَ زرواکیانی دیمپان کنگ ءَ اِنت ریاست ءِ کم شرپیاں اُوپار کنگ ءَ اِنت۔

راج ءِ توار ءُ راج ءِ اُوست کہ بانک سمّی دین ءُ بانک مھرنگ اَنت کہ آ مروچی ریاست ءِ تھاریں کوٹیاں بندیگ اَنت انگت مورے گُوش ءَ نہ وارت۔ نی مئے پاد آیگ ءِ وھد اِنت، ریاست ءَ مئے گیرت دز جتگ، مئے ھون انگت جوش نہ جنت، مئے ایمان انگت جھ نہ جنت۔

گڈسر ءَ گوش آں منی یکّین اِنت کہ مات ءُ گْوھارانی ارس ءُ ھون، زرواکیانی اُوپار کنگ، زلمانی دیپمان بوگ سرجم بلوچستان ءِ آجوئی ءِ برود اَنت ءُ اے زلم ءُ زوراکیانی پُشت ءَ الم رُوژنائی یے سھرا بیت، بلوچستان ءِ آجوئی ءِ رُوژنائی سھرا بوگ ءَ اِنت۔